E Meitaki Ainei te Toto Neneiia no te Paruru i te HIV?

NA TE TANGATA TATA O TE MAKATINI E ARA! I NAITERIA

▪ KUA tupu mai teia uianga i Naiteria i te kite angaia mai e kua tuia tetai pepe tamaine e te HIV na te pamuanga toto i roto i tetai are maki maata tikai o Naiteria.

Kua akakite te akaaere maata o te are maki e, i muri ua ake i te anauanga o Eniola, kua kitea mai e kua tuia aia e te maki rengarenga. Kua akaueia tetai taui anga toto ki tetai ke atu, e kua oronga mai te papa i tona toto. Inara kua kitea mai e kare te toto o te papa e tano ana, no reira kua taangaangaia te toto no roto mai i te vairanga toto a te are maki. Kare i roa ana, kua kitea te HIV i roto i te pepe, noatu e kare te reira i kitea i roto i tona nga metua. Kua akakite te are maki e, “ko te toto tei pamuia ki roto i te pepe kua neneiia e kare i kitea mai ana te HIV i te tuatau i pamuia ai ki roto i te pepe.”

Akapeea i reira, te pepe i tuia ai e te HIV? Kua kimiia e te kavamani Naiteria teia manamanata e kua taopenga e ko te tumu papu no teia maki piri koia oki ko te toto tei pamuia. Kua tata te nuti pepa Nigerian Tribune i te tuatua a te taineti apii vaireti e: “I te taime i orongaia mai ei te toto, tei roto te tangata nona te toto i te tuatau akamatamata anga o te maki HIV.”

E tupuanga okotai ua rai teia, inara te akamaata maira i te tikaanga e kia matakite i te kino o te pamuanga toto. I te akamaramaanga mai i te tuatau akamatamata anga o te HIV, te karanga ra te au Ngai Akaaerenga e te Paruruanga Maki o Marike e: I tetai taime ka roa te akatereanga paruru o te kopapa i te akatupu atu i te au apinga akakore maki no te kimikimi anga e kitea ai te maki, e i teia taime e tuketuke rai mei tetai tangata ki tetai. Ko teia te taime e matauia ana i te taikuia e ko te ‘tuatau akamatamata anga.’ Ko te maata anga o te tangata ka kitea to ratou apinga akakore maki mei te 2 ki te 8 epetoma (ko te avereti e 25 ra). Noatu ra, te vaira te turanga e ko tetai aronga ka roa atu e rauka ai to ratou au apinga akakore maki e kitea ai. . . . I roto i tetai tu takake rava, ka taea ia te 6 marama.”

No reira, noatu e kua neneiia te toto ei paruru atu i te HIV kare teia tikaanga e akapapu mai e e toto meitaki te reira no te rapakau maki. Te akamatakite maira te San Francisco AIDS Foundation e: “Noatu e kare te HIV e kiteaia i te taime e akarakara meitakiia ai i te tuatau akamatamata anga, ka rauka i te pati atu i te HIV i taua taime ra. Ko te tikaanga, ko te taime piri ngoie rava atu teia o te maki (i muri poto ua ake ka tuia ai koe e te HIV).”

E roa ua atu te tuatau i aru ei te Au Kite o Iehova i te aratakianga a te Pipiria e “auraka kotou e kai i . . . te toto.” (Angaanga 15:29) Kua riro te paruruanga ta teia i oronga kia ratou ei akaari i te puapinga o te pakari i te akono i te au ikuikuanga a te Atua. Kia maata atu te kite i te au ravenga rapakauanga kare e taangaanga i te toto, e akara ine, te poroutia How Can Blood Save Your Life? *

[Tataanga Rikiriki i Raro]