Kare i te Apinga Kangakanga Ua

KUA maaniia e te au tangata o Aiphiti mei te au potopotonga rakau paraaraa, te au tangata o Tiapani mei te au pepa atuatuia, te au tangata o Tiamani mei te porcelain, e te au Eskimo mei te kiri manu. E akaputu ana te aronga mamaata ia ratou. E akaperepere ana te au tamariki ia ratou. Eaa ra ratou? E au pepe rakau.

Te akakite ra The World Book Encyclopedia e: “Ko te maata anga o te au apinga mei te pepe rakau rai no te au tuatau mua e au apinga purepure me kore e au apinga akonoanga, kare i te apinga kangakanga.” E peni ana te au tangata Aiphiti o taito i te au kakau toroia ki runga i te au potopotonga rakau tei taraiia mei te tu o te oe e ka akamanea ia ratou ki te au ei patapata karaea te mono ra i te rouru. E tuku ana ratou i teia au “pepe rakau oe” ki roto i te au tanumanga o to ratou aronga mate i te irinaki anga e ka riro mai teia au pepe rakau ei au tavini i te oraanga a muri. Te au tangata akakoro kino i te Indies Opunga e koputaputa ana i te au pine ki roto i te au pepe rakau voodoo ma te manakonakoanga i te akatupu i te kino ki to ratou au enemi.

I roto i te au peu e manganui, te kapitiia atura te au pepe rakau ki te au peu no te anau tamariki. Ei akatauanga, i Ereni i taito, i mua poto ua ake ka akaipoipo ei te au tamariki tamaine, e akaruke ana ratou i ta ratou au pepe rakau ki runga i tetai atarau no Diana, te atua vaine no te anau tamariki. I teia tuatau ko te au vaine no te kopu tangata Ashanti o Kaana, i Aperika, e apai aere ana i te pepe rakau i roto i to ratou au ruru kakau i te manakonakoanga e ka tauturu te reira ia ratou kia anau mai i te au tamariki manea. Tetai au tamariki tamaine i Turia e akatautau ana i ta ratou au pepe rakau ki runga i to ratou au maramarama i te akakite e kua taea e ratou te mataiti akaipoipo anga.

I te ra 3 o Mati i te au mataiti tataki tai, e taangaangaia ana te au pepe rakau i roto i tetai akonoanga e raveia ana i Tiapani tei kapikiia e ko te Akamaaraanga Pepe Rakau. Kua kitea katoa teia e ko te akamaaraanga no te au tamariki tamaine, tei “tupu mai mei te au peu tukeke,” i karanga ai a Japan​—⁠An Illustrated Encyclopedia. “Ko tetai e peu tamaanga Tinito e raveia ana i te pae kauvai i te tuanga mua o te toru o te marama i te karena ngati Iuda. I te tuatau Heian (794-1185) e tikiia mai ana e te aronga angaanga te aronga purepure i te ra toru o te toru o te marama i te akakore i to ratou au tu ma kore, i te tukuanga atu i te reira ki te au akatutuanga pepa . . . , te ka peiia ki roto i te kauvai me kore i te moana.”

 E au Apinga Kangakanga te au Pepe Rakau

I te tuatau Edo i Tiapani (1603-1867), te au pepe rakau tei maani tikaiia na te au tamariki kua maaniia kia aite ki te au tangata tika tikai e e akamaneaia ana ki te au kakau tuketuke. Ko tetai atu au tu pepe rakau kua maaniia kia neke aere na te taangaanga anga i te au uaea, au uaea panapana, te au apinga utiuti, e te au kia rakau. Ko tetai o teia au pepe rakau ka kite i te apai i te kapu ti na te manuiri e te oki mai ma te kapu kua pou te ti!

I te au enua o te pae Opunga i mua ake i te au mataiti 1700, “ko te tu tamariki o teia tuatau kare rava i kitea ana,” i karanga ai tetai encyclopedia. “E akariroia ana te au tamariki ei aronga mamaata rikiriki e e irinakiia ana kia akatutu mai i te tu o taua aronga mamaata ra.” Kua maaniia te au pepe rakau na te aronga mamaata pera katoa te au tamariki. I te au mataiti 1800 ra, kua kitea mai te puapinga o te taime kangakanga i roto i te tupuanga o te tamariki. Ei tupuanga, kua puapingaia te angaanga maani pepe rakau i Europa.

I te pae mua o te mataiti 1824, kua rauka i te aronga maani pepe rakau o Tiamani tetai apinga te ka rauka i ta ratou au pepe rakau kia tuatua e “mama” e “papa.” I muri mai i roto rai i taua anere mataiti ra, kua rauka ia ratou te maani i te au pepe rakau ka kite i te aere. Kua rauka katoa i te tangata Marike maani apinga ko Thomas Edison i te maani i tetai apinga rekotianga meangiti rava tei maani i tetai au pepe rakau kia akaraanga e ka kite i te tuatua. I taua taime rai, kua maani te Varani i tetai pepe rakau tei tapaia e ko Bébé Gourmand, te ka kite i te kaikai. Kua rongonui katoa te Varani no te au kakau manea o ta ratou au pepe rakau, tei okoia no tei akamaneaia ki te au kakau tukeke e te manea tikai. Te aronga na ratou teia au pepe rakau ka rauka ia ratou te oko i te au apinga akamanea mei te au peru, te au uru manu, te au tairiiri, e te au apinga no roto i te are.

I roto i te au mataiti 1900 kua kiteaia e kua tupu maata tikai te angaanga maani pepe rakau tei kore i kitea ana i mua ana. Na te taangaangaia anga te paratiki i te au mataiti 1940 i akatika i te aronga maani pepe rakau kia maani i te au pepe rakau oko mama inara e kite karape tikai te tu i to ratou maaniia anga. Ko te pepe paratiki, te pepe rakau ko Barbie te mea oko maata rava ia atu e te tangata mei tona oko mua ia anga i te mataiti 1959. E tere atu i te tai pirioni o ratou i okoia, e i roto anake ua i te mataiti 1997, kua rauka i te aronga maani ia ratou e $1.8 pirioni (U.S.).

E au Puapii te au Pepe Rakau

Te apii i te au tamariki i to ratou au atua kopu tangata, e taangaanga ana te au Initia Pueblo o te pae tonga opunga o Marike i te au pepe rakau kachina, taraiia mei te au aka o te rakau taratara me kore e paina. I te taime o tetai peu takake, kua akamanea tetai mema o te kopu tangata iaia e kua akatutu mai iaia mei tetai o te au atua. I muri ake, ka oronga te au metua i tetai pepe rakau taraiia mei tera atua rai ki ta ratou au tamariki no te mea ia ratou e kanga ra ma te reira, te kite vaitata maira ratou i taua atua ra.

Te riro ra te au pepe rakau ei “oronga i tetai ravenga no te tamaiti kia akakite mai i tona au manako mamae, te riri, e tetai atu au manako ngakau,” i karanga ai The World Book Encyclopedia. “Te kanga anga i te au pepe rakau te apii ra i te tamariki kia akatutu mai i te au angaanga ta ratou e tapapa atura i te rave me mamaata mai ratou.” Tetai pepe rakau tei akaariariia i te tuatau o te Ra Akamaaraanga o te Tamariki e raveia ana i Tiapani i te au marama o Me, te akatutu maira i tetai mapu tane tei akamaneaia ki te kakau tamaki katoa o tetai toa i taito. E taangaangaia ana taua pepe rakau ra ei akaraanga meitaki i te akamaroiroi i te au tamariki tamaroa ou kia tupu mei​—⁠tei tau ki te peu o te reira ngai​—⁠kia matutu, ei au mema akangateiteiia o te taiate.

No te pirianga manako ngakau tei akatupuia i rotopu i te tamariki e ta ratou au pepe rakau, ka tau te au metua manako pakari kia matakite i te akakeuanga penei a te au pepe rakau ki runga i te tupuanga o ta ratou tamaiti. Ei akaraanga, te irinaki nei tetai aronga e ko te tu kopapa e te maata o te au kakau o  tetai au pepe rakau penei ka akatupu i te kino ki te au tamariki tamaine. Te karanga ra tetai vaine e ka riro tera tu pepe rakau i te akakino i te “au tamariki tamaine ou ma te au karere tarevake e turu ra i te akatutuanga kare i te tu tikai.”

Te mea kitea ngoie ia ki tetai ua atu tei kite ana i te tamariki i te kanga e te pepe rakau koia oki e noatu e kua maaniia ki te kakau, ki te pepa, ki te rakau, ki te paratiki, me kore ki tetai atu au apinga ke, e maata atu te reira ei apinga kangakanga ua. E oa te reira, e patana kangakanga, pera katoa ei tangata irinakiia e piri atura kia ratou i to ratou tamarikianga.

[Pia i te kapi 27]

Akaouia te Inangaro no te au Pepe Rakau Taito

Te riro nei te akaputuanga pepe rakau ei angaanga inangaroia tikai. I te au mataiti i rotopu i te 1970 ki te 1979, kua tupu viviki tikai te reira, e kua akamataia te makete ki te au pa enua katoa. Te kimiia ra e te aronga akaputu pepe rakau te au pepe rakau paratiki oko mama penei e nga mea tara ua te oko me kore te au pepe rakau taki tai ua ake mei te au pepe rakau Kämmer e te Reinhardt. Maaniia ki Tiamani i te tuanga mua o te au mataiti i rotopu i te 1900 ki te 1995, kua okoia okotai o teia au pepe rakau e $350,228, i ko i tetai okooko anga! Okotai o tetai akaputuanga maatamaata rava atu​—⁠tei raveia ki ko i te Strong National Museum of Play i te oire o Rochester, i New York, U.S.A.​—⁠mei tetai 12,000 pepe rakau i reira.

[Pia/​Tutu i te kapi 28]

Te au Pepe Rakau Tumu Kia Matakite te Metua

Akapeea te au metua i te paruruanga i ta ratou tamariki mei te au kino ka tupu mai te ka akakeuia e tetai au pepe rakau? Te akaapa nei te The Washington Post e: “Mei te angaanga maani avaava o mua ana, te pitiniti tamataoraanga e te angaanga maani pepe rakau kare e ariki ana i tetai ua atu apainga e kare rai e rave i tetai au tauianga na ratou uaorai.” Te taka meitaki ra e, ka anoanoia te au metua kia rave i te apainga.

Te akaue maira te Pipiria i te au metua kia oronga i te au ikuikuanga meitaki tikai ki ta ratou au tamariki i te au ra ravarai. (Deuteronomi 6:​6-9; Maseli 22:⁠6) Akapeea te reira i te orongaia anga kia akamanakoia atu te tu kino ka akakeuia e tetai au pepe rakau? Te karanga ra tetai mama e e tatau ana aia ki tana tamaine no runga i te tu akamanea tau, tei akamaramaia mai i roto ia 1 Timoteo 2:9, e oti e uriuri ana raua no te reira manako. Mei teia te tu i ta raua uriurianga:

Mama: Eaa te akaraanga o teia au pepe rakau, mei te tamaine rai me e vaine?

Tamaine: E vaine.

Mama: Eaa koe i akapera ei?

Tamaine: No te mea e kopapa vaine to ratou, e to ratou kakau e te tamaka no te vaine rai.

Mama: Tano rai taau. E i muri ake i ta taua tatauanga i te Pipiria, toou manako e te au kakau e aao ra teia au pepe rakau ko te tu ia o te kakau ka tau te au Kerititiano kia aao?

Tamaine: Kare.

Mama: Eaa ra?

Tamaine: No te mea e poto roa te au pirikoti, . . . e te au pona e akaaka tikai a mua, . . . e e pipiri rava te kakau ki runga i to ratou kopapa.

E tika rai, te apiianga i taau tamariki i te au kaveinga tu Atua kia taea e ratou taua au taopenga anga ra ka anoanoia te tautaanga pakari. Inara ka pauna meitakiia te taime! E manganui ua atu te au metua tei puapingaia e te tauturu tei orongaia mai e te puka Learn From the Great Teacher, neneiia e te Au Kite o Iehova ei tauturu i te au metua i te apii i te au kaveinga tu Atua ki ta ratou tamariki.

Te patiia atu nei koe kia tata mai ki te Jehovah’s Witnesses, PO Box 75142, Manurewa, Manukau 2243, New Zealand, me ka inangaro koe i tetai kopi o teia puka e 256 kapi ma te au tutu. Akakite mai me ka inangaro koe i te kopi o te puka Learn From the Great Teacher.

[Tutu i te kapi 26]

E pepe rakau apai kapu ti Tiapani

[Tutu i te kapi 26]

E pepe rakau Bru Varani

[Au Akameitakianga no te Tutu i te kapi 26]

Top: © SHOBEI Tamaya IX; middle: Courtesy, Strong National Museum of Play, Rochester, New York; bottom: © Christie’s Images Ltd