Araveiia te Animara Kikite e Coati

TANGATA TATA O TE MAKATINI E ARA! I PARATIRI

TE ORI aere ua ra koe i roto i te vaorakau i toou kite poitirere atu anga i tetai anana coati e aere tika maira ki konei ia koe. Ma te mataku, ka manako koe e me ka kakati rai ratou ia koe. Eiaa e mataku! Noatu e kua kakati ana te coati i te tangata i tetai taime, te inangaro ua ra teia au animara i te kite e eaa to roto i taau pute e apai ra koe. E kimi aere ua ana te coati i tetai apinga ei kai. Te tikaanga, ka kai ratou i tetai ua atu apinga ka kitea e ratou, kapitiia mai te toke, te moko, te tukutukuraonui, te kiore toka, te ua rakau, e te uamoa a te manu.

Mei te rakunu rai te coati, inara e roroa ake tona kopapa e tona iku, e e roaroa katoa tona putangiu. E 66 teni mita tona vaito​—⁠e mei te reira rai te roa o tona iku​—⁠teia animara toropika no Marike e kiteaia ana i te tonga opunga o Marike e i te pae tokerau o Atenetina.

E aere ana te au ua coati i roto i te anana ka taea te 20, kareka te au toa, koia anake ua ka aere. I te mataiti tataki tai i te tuatau tauani, e tai toa ka kapiti mai ki te anana ua. Mei tetai itu ki te varu epetoma i muri mai, ka akaruke te au mama tei nui i te anana, kia maani i to ratou koanga i runga i te pu rakau. E anau ana te mama e toru me kore e a punupunua. Mei tetai ono epetoma i muri ake i te anau anga, ka kapiti akaou mai te au mama ou e ta ratou punupunua ki te anana. Aiteite ua te punua coati ki tetai poro uruuru meangiti te oriori ua ra.

E ongi ua ana te coati i te reva e e ko ko aere ana ratou i to ratou maikuku ki roto i te one ia ratou e aaere ra i roto i te vaorakau. Kare rava ratou e rekaia ana e te aronga tanutanu, no te mea e takinokino ana ratou i te au aua koni e te au are moa. Me ka arumakiia ratou, e kite tikai te coati i te akono ia ratou kia kore ratou e opuia. Ko teia au animara rikiriki e te kikite e oro ana ratou ki to ratou ngai pipini anga i runga i te pu rakau. E ravenga ke katoa atu ta ratou i te akaora ia ratou. Me aruru te pupui me kore te pokarakara rima, ka topa ua ratou ki runga i te one i te akamea ua e, kua mate ratou! Me vaitata atu ra te tangata opu ia ratou, ka ngaro ratou i te oro!

Me ka atoro mai koe ia Paratiri, penei ka aravei koe i tetai anana coati. Me koia ia, eiaa e mataku. Kare ratou e kakati ia koe. Inara, ka rekareka ratou me pepei atu koe i tetai au kai na ratou!