E Aroa Ririnui Atu i te Uriia!

Te u anga te Gulf Coast o Marike i te Uriia Katrina e te Uriia Rita i te mataiti 2005, kua akatupu raua i te takinokino maata tikai, e e maata te tangata tei tamateia. E tauatini ua atu Au Kite o Iehova tei kapitiia mai ki te aronga tei taii atu ki roto i te uriia.

Akaaereia e te opati manga o te Au Kite o Iehova i Marike, kua akamata viviki te kumiti tauturu tumatetenga i te tauturu i te tangata. I roto ia Louisiana, kua akanoo ratou e 13 ngai akaaereanga tauturu, e 9 are mamaata vairanga apinga, e e 4 ngai vairanga penitini. Te maata o te ngai ka tauturu ratou i te tangata, vaitata atu i te 80,000 kiro mita kuea. Vaitata rai e e 17,000 Au Kite tauturu no te au tuanga ravarai o Marike, e mei tetai atu au enua e 13 tei aere mai i te tauturu i te rapakau i te aronga tei rokoia i te tumatetenga e te patu akaou i te au are. Te akaari maira te au mea tei tupu e kare e rauka kia akaaiteia atu te ririnui o te tu natura ki te aroa Kerititiano.​—⁠1 Korinetia 13:​1-8.

Kua ripea te aronga tauturu e tere atu i te 5,600 kainga o to ratou au taeake akarongo e e 90 Are Uipaanga Patireia, e au ngai uipaanga no te Au Kite o Iehova. Te akakite maira teia au numero e eia au are i takinokinoia. Kia rotai kia Galatia 6:10, tei akaue mai i te au Kerititiano ‘kia takinga-meitaki i te tangata ravarai,’ kua tauturu katoa te Au Kite o Iehova i te aronga kare i te Au Kite.

I TE raveanga i te angaanga tauturu kua riro ei akaatinga tikai; inara e manganui te au akameitakianga. E akamanako ana i te au akakiteanga a tetai Au Kite e itu tei riro ei akaaere i te au angaanga tuketuke.

“Tuanga Mataora Tikai no Toku Oraanga”

Robert: Te angaanga i runga i tetai kumiti tauturu tumatetenga kua riro ei tuanga mataora tikai i roto i toku oraanga. E 67 oku mataiti, ko au te mema pakarikari rava atu o te kumiti. Kua angaanga au e tetai pupu aronga tauturu te kapiti maira i te au mapu Kite tau tikai i te pae vaerua. Kua riro ei akamaroiroianga i te kite atu anga i te au mapu e akaari ra i te tu aroa akaatinga uaorai no Iehova, e no te au taeake Kerititiano!

E tauturu meitaki tikai taku vaine ko Veronica. E rauka ai ia maua kia oronga ia maua uaorai, kua turu aia i taku ikianga kia akaruke au i te ngai angaanga taku i reka ana no tetai 40 tuma mataiti. E angaanga ana maua i teianei e okotai po i te epetoma i te tama i te au opati. Kua kite maua i te akono i tetai oraanga meangiti ua te moni, e kua mataora i tetai oraanga mama ua. Te angaanga anga i te pae i te aronga e inangaro ra i te akamareka ia Iehova, te oronga maira te reira kia maua i te akameitakianga oonu no te tukuanga i te Patireia o te Atua ko te mea mua i roto i te oraanga. (Mataio 6:33) E kite putuputu ua ana maua i te akono meitaki anga a Iehova i tona au tangata.

Frank: Kua riro au ei akaaere i te tipatimani maani kai i ko i te ngai tauturu i Baton Rouge. I te akamataanga, kia rauka i te angai i te aronga tauturu e angaanga ana matou mei te 10 ki te 12 ora i te ra, e itu ra i te epetoma. Kareka ra, e maata te au akameitakianga, kapiti mai te kite mata anga i te mana o te aroa Kerititiano.

E manganui te aronga tauturu tei angaanga ana i roto i te ngai maani kai e tai epetoma me kore e tere atu, kua pati mai ratou ka oki  akaou mai, e na roto i te au kati e te ringi anga mai, kua akakite mai tetai pae i to ratou aroa ngakau tae no te tikaanga manea i te tauturu. Kua pumaana tikai maua ko taku vaine ko Veronica, no to ratou vaerua akaatinga uaorai.

Ii Tona Pakiri Rima

Gregory: Kua oko atu maua ko taku vaine ko Kathy i to maua kainga i Las Vegas, Nevada, e kua oko mai i tetai toroka meangiti e te terera tei riro ei kainga no maua. Na te akamama anga i to maua oraanga i rauka ai ia maua i te rave i te angaanga tauturu i Louisiana e rua tuma mataiti. Ko teia te taime maata rava atu i roto i to maua oraanga, te kite mata nei maua i te tikaanga o te au tuatua tei kiteaia i roto i te Pipiria ia Malaki 3:10 e: “Ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.”

E katakata putuputu ana maua kia maua uaorai me karanga mai te tangata e, “E aka akaatinga anga tikai tena!” E 30 mataiti i topa akenei, kua inangaro maua ko Kathy i te tavini i ko i te opati manga o te Au Kite o Iehova i Marike, inara te utuutu ra maua i te tamariki. Kua riro te angaanga tauturu ei akamerengo i to maua anoano kia rave maata ua atu i te tavini i te Atua. Ko tetai tikaanga manea, koia oki ko te angaanga piri vaitata ki te Au Kite, ko tetai ia ratou e aronga tu kite karape. Ei akaraanga, ko tetai o matou tangata tunu kai e kuki akaaere ana aia i roto i tetai are kaikai oko maata, e tetai atu i tunu kai ana aia no nga peretiteni e rua o Marike.

No te aronga tauturu e manganui, kua riro te angaanga tauturu tumatetenga ei taui anga tikai i te oraanga. Kua ii tikai te pakiri o tetai taeake e 57 ona mataiti i te akatakaanga mai aia i tana angaanga tauturu i te aronga tei rokoia e te uriia. Kua riro katoa tetai Au Kite tei kore i tae mai ei tumuanga no te akamaroiroi. Ei akaraanga, e rua nga tangata tama ninamoa kua oronga mai na maua tetai aka pepa tei maaniia e tei tainaia e te katoatoa rava​—⁠kapiti mai te tamariki​—⁠i roto i tetai putuputuanga e toru i roto i to ratou oire ko Nebraska.

‘Kua Kite Maua te Akono Anga te Atua i te Aronga Tei Mamae’

Wendell: I te ra i muri ake i tupu ei te Uriia Katrina, kua tae mai taku patianga mei te opati manga o Marike kia aere atu au e akara i te turanga kino o te au Are Uipaanga Patireia e te au kainga o te Au Kite o Iehova i Louisiana e Mississippi. I reira i akamata ai te tuanga angaanga e te tuanga apiianga iaku uaorai. I te nooanga no tetai 32 mataiti i roto i tetai ngai te anoano maataia ra te aronga tutu aere i te Patireia, kite meitaki tikai maua ko taku vaine ko Janine ia Iehova i te akono anga i tona iti tangata. Inara, i teianei, kua kite maua i ta te Atua akono anga i roto i tetai turanga maata rava atu.

E tikaanga manea tikai toku i te angaanga anga ei tiamana i runga i te kumiti tauturu tumatetenga i Baton Rouge. Noatu eaa te akaaoanga, kua oronga mai teia angaanga i te merengoanga maata kiaku. E tika rai, i roto i teia  tautaanga tauturu e anere ua atu te au taime kua kite to matou kumiti i te akatikatika anga te Atua i te au manamanata, i te akatupuanga i te au atianga, e te akono anga i te aronga tei mamae na roto i tetai ravenga, na tetai Metua aroa Mana Katoatoa anake ua i rave.

E manganui te ui mai ana e, “I akapeea i rauka ai ia korua ko taau vaine i te rave ua atu i te angaanga tauturu no te rua tuma mataiti?” Kare i te mea mama ua. E maata ua atu te au tauianga ta maua i rave i roto i to maua oraanga. I te tua meitaki ra, kua kite maua i te puapinga no te akono tamou anga i te ‘mata meitaki.’​—⁠Mataio 6:⁠22.

I te raveanga maua i ta maua angaanga kimi tangata e te akaora tangata i New Orleans, kare e taime akangaroi. Ei akamaata atu i te tamanamanata, kua tukunaia te oire ki raro ake i te ture vaeau no te maata te kino keikeia e te ta tangata i runga i te mataara. Mama ua i te manako taitaia no te maata rava te angaanga te ka raveia.

Kua aravei maua e tauatini ua atu Au Kite kua ngaro ta ratou apinga. Kua pure kapiti matou ma te akapumaana atu ia ratou. I reira, ma te tauturu a Iehova kua rave matou i te angaanga. I tetai au taime, e manako ana au e e rua oku nga tu oraanga i roto ua i teia rua mataiti.

I tetai atu au taime, me manako mai au e kua roiroi tikai au e kua paruparu toku manako ngakau, kua tae akaou mai te aronga tauturu ou​—⁠tetai ia ratou no tetai au marama ua, e tetai atu no tetai tuatau roa. I te akara atu i te aronga tauturu puareinga ua e te mataora e manganui, kapitiia mai te au mapu, kua riro ratou ei akamaroiroi anga ia maua kia rave ua atu i te angaanga.

Maata te taime, kua tauturu mai a Iehova ia maua. Ei akaraanga, i to maua taeanga mai, kua kite mai maua i te au pu rakau tei atiati ki  runga i te au kainga e tere atu e 1,000 o to tatou au taeake. No te mea kare a matou apinga me kore aronga angaanga ei rave i teia angaanga kino pakari i te akaateaanga i te au pu rakau, kua pure to matou kumiti no runga i te reira. I tera mai ra, kua tae mai tetai taeake i runga i tona toroka i te apai mai i te apinga angaanga tikai ta matou e anoano ra, e kua oronga mai i te tauturu. I tetai atianga kua pauia mai te pure i roto i te 15 miniti, e i tetai atu atianga, te aere maira te apinga angaanga ta matou e pure ra i mua ake ka karanga ai matou e, amene! Ae, ko Iehova “tei akarongo i te pure.”​—⁠Salamo 65:⁠2.

“Rekareka Tikai au e e Kite au no Iehova”

Matthew: I te ra i muri ake i tupu ei te Uriia Katrina, kua rauka iaku i te akaaere i te tari anga e 15 tane kai, vai, e te au apinga anoanoia tei orongaia mai no te ngai i rokoia e te kino. Kua akapapu mai tikai te iti tangata o Iehova i to ratou tu oronga ua!

Kia meitaki atu ta maua tautaanga kua neke atu maua ko taku vaine ko Darline, ki tetai ngai vaitata atu e e rua ora me na runga i te toroka ki te ngai i rokoia e te kino. Kua oronga mai tetai taeake no te reira ngai i tetai angaanga tuku taime na maua kia akapou maataia to maua taime ki te angaanga tauturu. Kua oronga mai tetai atu Kite i te apatimani no maua. Kua riro tikai te pirianga ki teia au taeake aroa ei akapumaana i toku ngakau e e rekareka tikai au e e Kite au no Iehova.

Ted: I muri poto ua ake i te Uriia Katrina, kua aere atu maua ko taku vaine ko Debbie, i te tauturu i te angaanga tauturu. I roto i nga mea ra ua, kua kiteaia mai e au tetai terera e iva mita te roa ka maranga ua i to maua toroka i te kika aere, e mama ua i te oko​—⁠ka peke ua ia maua e e pauanga no ta maua pure. Kua riro teia terera ei kainga no maua no tetai rua mataiti.

I te va anga mai te angaanga, kua oko maua i to maua are e te maataanga o ta maua apinga, kia rauka ia maua i te rave i tetai atu au angaanga i New Orleans, te ngai i tavini ei au ei tangata akaaere angaanga. E tuanga mataora ta maua i kite mai i te akaraanga e akapeea a Iehova i riro mai ei e ‘Atua pumaana’ no te aronga akamori iaia. I te akaateaia anga te tangata, kare o ratou kainga e kare o ratou Are Uipaanga Patireia, pera katoa kare o ratou putuputuanga e kare o ratou ngai tutu aere i te tuatua meitaki.​—⁠2 Korinetia 1:⁠3.

‘Kua Akakeuia to Maua Ngakau no to Ratou Akarongo’

Justin: I roto ia Okotopa 2005, kua tae mai te patianga no te aronga tauturu kia rave i te angaanga tauturu tumatetenga i ko i te Gulf Coast. Kua tuku viviki atu maua ko taku vaine ko Tiffany i ta maua pepa patianga, e i roto ia Peperuare 2006 kua patiia mai maua kia tauturu i te pupu tapoki are i ko i te ngai tauturu tumatetenga i Kenner, vaitata atu ki New Orleans.

I te ra tataki tai ka angaanga matou ki runga i tetai are e ka aravei atu i te Au Kite o te reira ngai, e no to ratou akarongo e te irinaki i te Atua kua akakeuia to maua ngakau. E i te au ra ravarai kua akamaara pakariia mai kia maua te tu puapinga kore no te irinaki anga i te au apinga materia. E mea umere tikai te rekareka tei rauka mai ia maua i te tauturuanga i te au taeake Kerititiano e i te kiteanga e eaa ta Iehova i rave ana kia rauka i tona iti tangata i te rave i te angaanga.

[Pia/Tutu i te kapi 18]

Te au Tupuanga i te Ngai Tauturu

No te pupu maani kai i ko i te ngai tauturu tumatetenga, e akamata ana ratou i te angaanga i te apa no te ora a i te popongi. I te ora itu e akaputuputu katoatoa mai ana te aronga angaanga ki roto i te ngai kaikaianga, i te uriuri i te tia Pipiria no tetai tai ngauru miniti i mua ake ka kai ti ei ratou. Penei i teia atianga rai ka turou te tiamana i te aronga ou tei tae mai, e ka akakite atu aia i tetai tupuanga akamaroiroi.

I muri ake i te pure, e mataora ana te katoatoa i tetai kai ti anga meitaki, me oti mai kua aere i reira ratou ki te angaanga. Ka noo mai tetai pae, penei i te angaanga i roto i te au opati, te ngai pua kakau, me kore i te ngai tunu kai. Ka akapapa te au kuki i te au kai no te tuaero te ka tikinaia mai e te komono o te pupu angaanga tataki tai o tetai ngai ke atu.

I te au po Monite e akaputuputu mai ana te “pamiri” no tetai apii Pipiria o te makatini Punanga Tiaki, neneiia e te Au Kite o Iehova. E riro ana taua apii ra ei tauturu i te katoatoa kia vai maroiroi i te pae vaerua​—⁠te tumu no te akakoromaki ma te rekareka e te akamanako tau anga i te angaanga a tetai ke.​—⁠Mataio 4:4; 5:3.

[Pia i te kapi 19]

“Tarevake Toku Manakoanga ia Kotou”

Ko tetai vaine i New Orleans e tataanga tana i runga i tona ngutupa te tatau ra e: “Te Au Kite o Iehova​—⁠Auraka e Atoro Mai.” I tetai ra kua akamata tetai pupu aronga tauturu i te akaou i tetai kainga tei akakinoia e te uriia, i tetai tua mai i te mataara o tona kainga. I te au ra ravarai, kua kite aia i te mataora e te tu oaoa o te aronga angaanga. No tona inangaro i te kite, kua aere atu aia i te akara. I te kiteanga e e Au Kite no Iehova te aronga tauturu, kua karanga aia e kare e tangata no ko mai i tana akonoanga i ringi mai ana iaia mei te taime i tupu ei te uriia. “Marama ua e, e tarevake toku manakoanga ia kotou,” i nana ai. Tei tupu? Kua kiriti aia i tana tataanga e kua pati i te Au Kite kia atoro mai iaia.

[Tutu i te kapi 16, 17]

Robert e Veronica

[Tutu i te kapi 16, 17]

Frank e Veronica

[Tutu i te kapi 17]

Gregory e Kathy

[Tutu i te kapi 17]

Wendell e Janine

[Tutu i te kapi 18]

Matthew e Darline

[Tutu i te kapi 18]

Ted e Debbie

[Tutu i te kapi 18]

Justin e Tiffany