Te Manako o te Pipiria

Ka Akamoriia Ainei te Atua na Roto i te au Tiki?

“Kua apiiia au e ka akavaitata atu te au tiki iaku ki te Atua.”​—⁠Mack.

“Kua ki to matou are i te au tiki akonoanga. Kua manako matou e te mareka maira te Atua i to matou kainga.”​—⁠Herta.

“E tupou ana matou ki raro i tetai au tiki. Kare matou e manako atu ana i to te Atua manako no runga i teia peu.”​—⁠Sandra.

EAA toou manako no runga i taua au tuatua ra? E manganui te irinaki ra e ka tauturu te au tiki akonoanga ia ratou i te akamori i te Atua. E tika ainei teia manako? Tei puapinga maata atu, eaa to te Atua manako no runga i teia? E akamanako ana e, eaa tana Tuatua tei tataia, te Pipiria Tapu, e karanga ra.

To te Atua Manako no Runga i te au Tiki Akonoanga

E au akatutuanga me kore e au akairo te au tiki akonoanga e te au itoro no tetai ua atu apinga te riro ra ei apinga akamoriia. Te kapitiia maira kia ratou te koroti, te au tiki, te au tutu, me kore tetai ua atu apinga e akaaiteia atura ki tetai tu i runga i te rangi me kore i runga i te enua. * Ka riro katoa te au reva akaepaepa enua ei apinga akamorianga.

No te au tauatini ua atu mataiti, kua taangaanga te au tangata i taua au apinga ra ei akamorianga. No reira, i te mataiti 1513 M.T.N., i te oronga anga i te Ture Ngauru ki te iti tangata akanoo ouia o Iseraela, kua akakite taka meitaki te Atua i tona manako no runga i te au tiki akonoanga. Kua tuatua aia e: “Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra: Auraka rava koe e tupou ki raro ia ratou, auraka oki e akamori atu ia ratou; e Atua vareae oki au ko te Atua noou nei ko Iehova [me kore, “ko au ko Iehova to kotou Atua e Atua te anoano ra kia akono anake uaia,” NW].”​—⁠Exodo 20:​4, 5.

E akamanako ana i ta te Atua ture e rua tuanga: Te mea mua, kare tona iti tangata e rapa i te au tiki no te akamorianga, e te rua, kare ratou “e tupou ki raro ia ratou” me kore e tavini ia ratou. Eaa ra to Tei Anga mai ia tatou i ture ei i te rapa anga i te au tiki? Ko tetai tumu i kore ei e  rapa i te au tiki no runga i te Atua, koia oki “kare ua e tangata i kite i te Atua.” Kare a Iehova i te kopapa tangata, inara e vaerua aia e te noo ra i te rangi. (Ioane 1:18; 4:24) Tetai tumu no te kore anga e rapa i te au tiki o tetai ua atu apinga, koia oki te raurau maira te Atua e kia “akono anake uaia” aia. “Kare au e oronga i toku ra kakā no tetai ke, e te akameitaki iaku ra no te au idolo akatikitikiia ra,” i karanga ai aia. (Isaia 42:⁠8) No teia tumu, e tarevake katoa i te rapa i tetai tiki ei tauturu i te akamorianga. Te raveanga tetai arataki o Iseraela i te reira, ko Aarona tona ingoa, kua riri otooto a Iehova.​—⁠Exodo 32:​4-10.

Eaa ka Kore ei e Tupou ki Raro ia Ratou?

No runga i te au itoro, te karanga ra te Pipiria e: “E vaa to ratou, kare ra e tuatua; e mata to ratou, kare ra e akara; E taringa to ratou, kare ra e akarongo.” Te kapiti katoa maira teia i tetai akamatakiteanga pakari e: “Ko te aronga i anga ia ratou, okotai o ratou tu ma ratou ra”​—⁠kare e ora!​—⁠Salamo 115:​4-8.

E angaanga tika kore katoa te akamorianga itoro. E ui kia koe uaorai, ‘Eaa toku manako me oronga au i tetai apinga aroa oko maata ki taku tamaiti e kua aere aia i te akameitaki atu i tetai tangata ke me kore i te akameitaki atu i tetai apinga ora kore?’ Penei ka tauturu teia akatutuanga ia koe kia ariki mai e eaa ra te manako o Tei Anga mai ia tatou e Tei Oronga mai i te Ora, me orongaia atu te akameitakianga e te akamorianga tei tau ra kiaia ki tetai ke, kapitiia mai te au itoro ora kore.​—⁠Apokalupo 4:⁠11.

E akamanako katoa i te tu viivii o te reira no te tangata​—⁠tei angaia i roto i to te Atua tu​—⁠te akamori ra i tetai apinga mate! (Genese 1:27) No runga i te aronga tei rave i te reira, kua tata te peroveta ko Isaia e: “Kua akamori ratou i te angaanga a to ratou uaorai rima, i ta to ratou uaorai maikao-rima i anga. E kua tupou te tangata rikiriki ki raro; e kua taakaaka te tangata taoiau iaia uaorai; kare koe [e Iehova te Atua] e akakore i ta ratou ara.”​—⁠Isaia 2:​8, 9.

Ko tei akariro i te akamorianga pikikaa ei mea viivii kino ki te Atua koia oki, ko te tikaanga, e akamorianga te reira i te au temoni​—⁠te au enemi o te Atua. I te kopae anga te ngati Iseraela ia Iehova no te au itoro, “kua apai ratou i te atinga ki te au demoni, kare ki te Atua,” i karanga ai a Deuteronomi 32:⁠17.

Kua akamori ainei te au pipi a Iesu Karaiti i te au tiki me kore kua taangaanga ainei ratou i te reira ei tauturu no te akamorianga? Kare! Kua tata te apotetoro a Iesu, ko Ioane e: “E aku au tamariki ra, e matakite ia kotou i te au idolo ra.” (1 Ioane 5:21) Te akakite maira te puka Early Church History to the Death of Constantine e: “E apinga rikarika maata te akamorianga tiki ki te au pipi o te tuatau mua.”

Te Akamori Mou

Kua tuatua a Iesu e: “E akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.” (Ioane 4:23) Ae, te inangaro nei te Atua ia tatou kia kite iaia ei peretana​—⁠tana e reka ra, tana e reka kore ra, tona au turanga, e tona akakoroanga no tatou. (Ioane 17:⁠3) Ko te tikaanga, no reira aia i tuku mai ei kia tataia te Pipiria. (2 Timoteo 3:16) Pera katoa, no te mea ‘kare te Atua i atea ke atu ia tatou katoa nei,’ ka rauka ia tatou i te pure kiaia i tetai ua atu taime, i tetai ua atu ngai, e ma te kore e tauturu a te au tiki akonoanga.​—⁠Angaanga 17:⁠27.

“I toku tomo anga ki roto i tetai Are Uipaanga Patireia o te Au Kite o Iehova, kare au i kite ana i tetai au tiki akamorianga,” i karanga ai a Sandra, tei taikuia mai i mua akenei. “Kua taangaanga te Au Kite i te Pipiria kia akaari mai kiaku i te au tu e te au umuumuanga a te Atua. No reira, kua apii au i te pure kia akarongoia mai e te Atua. I teianei te manako nei au e e maramaanga tika toku i Tei Anga mai e e pirianga vaitata toku kiaia.” Ae, kua kite mai a Sandra i te tu maoraora e te tu rangatira tikai o te au tuatua mou o te Pipiria. (Ioane 8:32) E ka rauka katoa ia koe.

[Tataanga Rikiriki i Raro]

I MANAKO ANA AINEI KOE?

▪ Eaa tatou ka kopae ei i te au tiki ravarai i roto i te akamorianga?​—⁠Salamo 115:​4-8; 1 Ioane 5:⁠21.

▪ Akapeea te Atua mou i te akamoriia anga?​—⁠Ioane 4:⁠24.

▪ Akapeea koe e kite ei i te tuatua mou no runga i te Atua, e akapeea koe e puapingaia ai no runga i te reira?​—⁠Ioane 8:32; 17:3.