Ka Rauka Ainei i te Enua i te Akono i te Uki o Mua?

TANGATA TATA O TE MAKATINI E ARA! I KANATA

▪ E a mataiti i muri ake i te raveanga i tetai apii nakirokiro meitaki no runga i te ecosystem o te ao, ko tetai pupu no te aronga apii e te au arataki i te apii aorangi​—e tuanga ratou no te apii tei kapikiia e ko te Millennium Ecosystem Assessment [MA]​—kua nenei i ta ratou ripoti mua. Teia ta ratou i kite mai: I te 50 mataiti i topa akenei, no te inangaro noinoi i te kai, te vai, te rakau, te uruuru, te taura, te naeroni, te penitini e te inu, kua taui maata tikai te reira i te ecosystem o te enua, i te akakino anga i te turanga o te enua i te akono i te uki o mua. Kua kino takiri te tu natura o te enua i te akapua i te au mea tanu, i te tama i te reva e te oronga mai i te okitene na te taangaanga i te au rakau ngangaere, e te akaou i te au mea meitaki o te moana. Te vaitata katoa nei te paraneta i te takore takiri anga i te katiri o te au mea ora.

“Te akakino pakari nei te tangata i te enua, no reira te akamaata atura i te kino i roto i te au apinga natura te ka akatupu mai i te maki, te tipu anga i te rakau, me kore te au ngai kare e apinga ora i roto i te tai,” i karanga ai te nutipepa Globe and Mail o Kanata. Te karanga katoa ra te nutipepa e: “Kare e rauka i te rapakau akaou i te au ngai vai, te vaorakau, te ara vai ki taatai, te ngai tautai e tetai atu au ngai te akaou ra i te reva, te vai e te au apinga meitaki no te au apinga ora katoatoa.” Noatu e te akatika ra te aponga akaaere o te MA i ta ratou i kite mai, tei te taiate tangata te mana i te akaiti mai i te akakino anga tei tukuia ki runga i te ecosystem, te karanga ra ratou e e rauka ai te reira “te anoanoia ra te au tauianga maata tikai i te akono anga i te tu natura i roto i te au turanga ravarai no te au ikianga te ka raveia.”

Ka rauka ainei i te akaora i te Enua? Papu tikai te pauanga e ae! Ei aronga akono i ta te Atua au mea angaia, kia maroiroi tatou i te akono i te aorangi. (Salamo 115:16) Inara, na te akao ua mai anga te Atua e rauka ai i te ecosystem i te akaoki akaou mai i te tu tau. Te taputou maira ‘Tei Anga’ mai ia tatou e ka anga mai aia i tona manako i te enua e ka oronga mai i te ‘meitaki maata.’ (Iobu 35:10; Salamo 65:​9-​13) Te kapiti maira teia i te tai e te au mea ravarai i roto i reira, no te mea ko Tei Anga mai, te Atua ko Iehova, tei iaia te mana i rungao i te tai. (Salamo 95:5; 104:​24-​31) E ka papu e ka akatupu aia i tana i taputou no te mea ‘kare te Atua e pikikaa.’​—Tito 1:⁠2.

E pumaana tikai i te kite e ka akonoia te enua no te uki o mua. Ka akakeu teia i te katoatoa te mataku ra i te Atua kia akapaapaa iaia no tona pakari, mana, e te meitaki maata e te akangateitei iaia no tona aroa ravarai no te au angaanga a tona rima.​—Salamo 150:​1-6.

[Akameitakianga no te Tutu i te kapi 22]

Globe: NASA photo