Tauturu Manako Koreia Mei te E Ara!

TANGATA TATA O TE MAKATINI E ARA! I PENINI

▪ Te ikianga a Noël, e 23 ona mataiti, i te akaruke i te apii kia riro mai ei orometua tamou no te Au Kite o Iehova, kua ekoko tona kopu tangata me ka rava tana moni i te akono iaia uaorai. E tika rai, kua ngata iaia i te kimi i tetai angaanga tau no tetai au ora ua, kia rauka iaia te tuku taime no te tutu aere. No reira i te neneiia mai anga te makatini E Ara! e te atikara puapinga “E Rima Ravenga i te Kimi Angaanga,” e maata te taime kua tatau meitaki a Noël i te reira. * Kua tauturu ainei te reira iaia? Ae, inara kare i roto i te mataara tana e manako atura.

Kua kite atu te akaaere maata o tetai apii, kare na te kavamani, ia Noël e tutu aere ra mei tera are ki tera are e kua ui atu e me koia tetai o te Au Kite o Iehova. Te inangaro ra te akaaere maata o te apii i tetai puapii, e no tona kiteanga i te tukatau o te Au Kite o Iehova me apii mai, kua ui aia kia Noël me kua kite aia i tetai tangata ka inangaro i te angaanga puapii. I te karanga anga a Noël e kare, kua pau mai te akaaere maata e, “Akapeea koe?”

Kare rava a Noël i angaanga ana ei puapii, e e teetee ana tana tuatua i tetai taime. E tu manamanata teia i Penini no te mea e umuumuia ana e te aponga apii te au puapii kia tarereia i te akapapu e kare ratou e tuatua teetee ana. “Me rauka mai te pepa apii,” i taputou ei te akaaere maata, “naau tera ngai angaanga.”

Kua tere meitaki a Noël i roto i te Apii Orometua Teokaratiki, e apii tei akanooia kia akameitaki i te tareni no te tuatua anga ki te katoatoa, e e raveia ana i te au epetoma i roto i te au putuputuanga a te Au Kite o Iehova. E oronga katoa ana aia i te au tuatua anga ki te katoatoa i roto i tona uaorai putuputuanga. Noatu ra, kua apiapi aia i te tae anga mai no te tarere.

Kua oronga atu te tangata tarere i tetai makatini e kua pati atu kia tatau maata aia i te parakarapa makaia ki te peni muramura. Kua kaka te mata o Noël i te kiteanga i te atikara “E Rima Ravenga i te Kimi Angaanga.” Kua tatau meitaki aia i te parakarapa ma te kore e teetee e kua rauka mai tana pepa apii.

Kua akakite mai te tangata tarere i muri ake e, e tatau putuputu ana aia i te au makatini a te Au Kite o Iehova. “E puapinga e te meitaki tikai te tataia anga teia au makatini no reira au e taangaanga putuputu ei i te reira i roto i te au tarere,” i akamarama mai ei aia.

Kua akamata a Noël i te angaanga puapii, e kua inangaro te akaaere kia angaanga akaou aia i tera mai mataiti, inara e parani ke rai ta Noël. Kua patiia mai aia kia angaanga i ko i te opati manga o te Au Kite o Iehova, te ngai e tavini ra aia i teianei.

[Tataanga Rikiriki i Raro]