Tauturuia Au e te Atua Kia Autu i te au Timataanga

Akakiteia e Vazir Asanov

Rere viviki mai au no runga i toku roi, tapeka au i te Pipiria ki runga i toku taukupu e kua rapurapu i te akamanea. I mua ake ka rere ei au na roto i te maramarama, kua koukou au i tetai au kakau, tuku atu ki runga i te roi, e oti tapoki atu ki te parangikete kia manakoia e te moe ra rai au. I reira kua oro au ki ko i te Are Uipaanga Patireia, ma te pure ki te Atua no te tauturu. Kua tupu tera i te mataiti 1991, e 14 oku mataiti.

KUA anau ia au ki roto i tetai kopu tangata Kurd i roto i te oire i te tuanga tonga o te enua tei kitea i teianei e ko Katakatani, i te reira taime ko tetai o te au repapuriki e 15 o Toviete Unioni. Kua utuutuia au e toku nga metua e te kopu tangata kia irinaki e ka riro mai au ei arataki e ei akaora no toku iti tangata i te tuatau ki mua. Kua akatupu au i te tu makitakita no te au enemi o te iti tangata e kua papa ua au i te tamate i te tangata no te akarangatira anga i toku iti tangata mei te au taomianga.

I te openga o te au mataiti 1980, kua akamata toku mama, toku teina, e au i te apii i te Pipiria ma te Au Kite o Iehova. Inara, kua tureia matou e Papa auraka kia kapiti atu ki te au Kerititiano. Noatu rai, kua apii ua atu rai au. I roto i te kopu tangata Kurd, kare takiri e matauia ana i te kite i te tu akarongo kore ki te pu ngutuare. E inangaro au i toku papa, inara e inangaro katoa au i te apii i te tuatua mou o te Pipiria.

Patoianga i te Kainga e i te Apii

I tetai ra, kua kite tetai puapii i te kopi o te makatini Punanga Tiaki i roto i taku kiri puka apii e kua akakite aia i te reira ki toku nga metua. No tona riri kino, kua rutu maataia mai au ia Papa iaku e kua pititi mai te toto mei roto mai i toku putangiu. “Te aru ra rai koe i tera akonoanga?” i ava ai aia.

I muri ake i tera, kua akakite a Papa e kare aia e inangaro akaou iaku ei tamaiti nana. Mamae tikai toku ngakau i te akarongo anga i tera tuatua! I taua taime rai, e maata toku au oa apii tei matapiko mai iaku, e tetai pae e akakino mai ana iaku. Kua akatopa mai toku au puapii i taku au maka e kua aviri putuputu mai i toku akarongo i te taime apii, i te tautaanga kia taui au ki to ratou irinakianga atua kore.

Noatu taua patoianga ra, kua tauta rai au kia tae ki te au uipaanga Kerititiano e kia tutu aere i toku irinakianga ou ki etai ke. I tetai taime i muri mai, kua kite mai a Papa e te piri atura rai au ki te Au Kite e te tatau ra rai i te Pipiria. I tetai Tapati, kua kimi au i tetai kotoeanga kia akaruke i te kainga no te aere atu ki te uipaanga. I reira rai, kua akaue a Papa iaku kia aere kia moe. Kua maro mai aia e, “I teianei, i te au Tapati ravarai i teia ora tikai, tei runga koe i toou roi.” Kua tamataku mai aia iaku e ka papa kino mai aia iaku me kare au e akarongo, e kua papu iaku e ka rave aia i te reira.

Ma te aue, kua pure au ki te Atua mou, ko Iehova, kia akamaru i te ngakau o Papa, inara kare aia i taui ana. Kua maara iaku te takinokinoia  anga te tamariki o Iseraela i Aiphiti. Kua akamanako mai au i te tu o toku papa mei a Pharao rai, kare i akatika ana i to Iseraela kia aere e akamori ia Iehova.​—⁠Exodo 5:​1, 2.

Rave i te au Ikianga

I tetai Tapati, kua iki au i te aere ki te uipaanga. Kua tukituki ua taku pukuatu i te taitaia iaku e takoto ua ra ki runga i toku roi e te pure muteki ua kia Iehova. I te tomoanga mai toku nga metua ki roto i toku rumu, kua moe pikikaa au. Kua tuatua akaparau a papa e, “Akara ra, e tamaiti akarongo tikai taku.” Kua ongi mai aia iaku, e kua akaruke muteki ua atu raua. Kua pure ngakau tae ua atu rai au.

I muri ua ake i te akaruke anga toku nga metua i te rumu, tei taikuia i te akamataanga, kua tu viviki au ki runga, rave mai i toku tamaka no raro mai i toku roi, e kua rere ki vao na roto i te maramarama. Kua tere viviki te rua ora i ko i te uipaanga, e kua manako mai au e eaa te ka tupu me oki atu au ki te kainga. Ma te mataora ra, noatu e kua kite a Mama e e kakau to roto i te roi e kare e ko au, kare aia i akakite ana kia Papa. Inara, kua akamatakite mai aia iaku e kare aia e uuna akaou i te reira tu mei ia Papa.

I te mataiti 1992, kua akakite au ki toku nga metua e e akamaara anga puapinga ta toku oa e kua pati mai aia iaku kia aere atu. Ko te tikaanga, ko te tupuanga takake taku e parani ra kia tae atu, ko te akaputuputuanga a te Au Kite o Iehova i te oire ko Taraz, mei tetai 100 kiro mita te mamao mei toku kainga i Karatau. Ka papetitoia au ki reira ei akairo i toku akatapuanga kia Iehova. Kua pati au kia Mama i tetai pakete ua tiare no roto mai i te are vairanga kai a te manu. Kua tunutunu au i taua au ua ra e kua oko i te reira i ko i te makete, e i akapera i rava ai taku moni kia tae atu au ki te akaputuputuanga.

I toku okianga mai, kua ui mai a Papa e me kua mataora au i ko i toku oa. Kua akapapu atu au e, ae. Kua manako mai au e kua turuturu mai a Iehova iaku, no te mea kare a Papa i uiui akaou mai ana no runga i te reira. Kua reka tikai au i te au tuatua a Maseli 3:​5, 6 e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”

Paruparu Au i te Pae Vaerua

Kare te patoianga a Papa i akamutu ana i toku papetitoanga. Iaku e kapiti ua ra rai ki te Au Kite, kua taia kinoia au e papa, me e au tangata to reira me kore ko maua ua. Vaitata e i te au ra ravarai e taakamaia ana au e e maroia ana kia akaruke, e e aue putuputu ua ana au. Koia i rauka ua maira ia Katakatani te tutara iaia uaorai mei te Toviete Unioni, e kua tauta toku nga metua e te kopu tangata i te akakeu iaku kia akatupu i te au akakoroanga meitaki ei tangata poritiki. Kua manako ratou e te ngere nei au i teia atianga puapinga.

Kua puapingaia te au akakoroanga a toku tuakana i roto i te tarekareka tipoti, e e akamaroiroi ua ana a Papa iaku kia aru i tona akaraanga. I na, i te openga o te mataiti 1994, kua piri katoa atu au ki roto i te au tipoti. No taku tareni meitaki, kua rauka aere mai taku au re e te akapaapaa anga no toku kite karape i te tueporo tarape e te tipoti taviriviri. Kua akamata katoa au i te apii ture kia rauka iaku te tauturu i te paruru i te au anoano o te iti tangata Kurd. Kua inangaro katoa au i te piri atu ki te angaanga poritiki e te akamata i tetai pati na te au mapu Kurd. I teianei kua akamata a Papa i te akapaapaa iaku.

“Kua re Koe e Papa”

Kua paruparu tikai au i te pae vaerua e kare e tatau akaou ana i te Pipiria e te aere atu ki te au uipaanga a te Au Kite o Iehova. Kua akapumaana au iaku uaorai i te manako anga e me maata mai au ka tavini akaou au ia Iehova. I tetai ra, kua ui mai a Papa e me te piri atura rai au ki te Au Kite o Iehova. “Kare. Kua re koe e Papa,” i pau atu ei au. “Kua mataora koe i reira?” I tona akarongo anga i teia, kua rekareka tikai aia. “I teianei, e tamaiti tikai koe naku!” i tuatua akaparau mai ei aia.

Kare au i aere ana ki te uipaanga no tetai rua mataiti, noatu rai e e inangaro ana au i te aere i  tetai taime. Inara no toku manako akama kare au i aru ana i toku inangaro. Kua manako au e kare te aronga i roto i te putuputuanga e marama mai i toku turanga.

I taua taime rai, kua papu iaku e ko te mea meitaki rava atu, ko te tavini anga ia Iehova. ‘Te tikaanga, e inangaro rai au ia Iehova!’ i akakite putuputu ei au kiaku uaorai. I reira kua maro mai a Papa iaku kia aere ki te univetiti. Kua tuku au i te au e kua taputou katoa au e ka akaoti au i te apii ma te turanga teitei atu. Inara, i roto i toku ngakau, kua manako au e me tae au ki te univetiti i Almaty, e oire maatamaata ou i te tua tonga o Katakatani, ka kimi au i te Au Kite.

Tauianga ki te Turanga Mataora

Kare i roa ana i muri mai i te akamata anga au i te apii i ko i te univetiti, kua aravei au i nga Kite ia raua e tutu aere ra i roto i te angaanga orometua i te pae mataara, i Almaty. Kua aravei mai raua iaku e kua ui mai e, “Koai toou manako te tutara nei i teianei ao?”

“Ko Satani te Tiaporo,” i pau atu ei au, “te enemi o Iehova e te au tangata ravarai.” (2 Korinetia 4:​3, 4) Kua akamarama atu au e kua papetitoia au ei Kite inara kare au e maroiroi akaou ana.

I te openga o te mataiti 1996, kua akamata akaou au i te apii i te Pipiria ma te Au Kite. I muri ake i tetai au apiianga, kua tupu maroiroi akaou mai toku inangaro i te tavini ia Iehova, e kua akamata akaou au i te piri atu ki roto i te au angaanga katoatoa a te Au Kite i Almaty. I roto ia Tepetema 1997, kua akamata au i te tavini ei painia, me kore ei orometua tamou.

I tetai mataiti i muri mai, kua atoro mai a Papa iaku. Kua oro atu au ki ko iaia e kua takave maua. Kua pati mai aia kia akakore atu au i tona tu i mua ana. Kua akakite mai aia e kare aia i marama ana iaku e toku akarongo. Kua karanga atu au e, “Papa, inangaro tikai au ia koe.”

Aka mataora tikai toku no tei ariki mai a Papa i tetai au puka Pipiria e te pati mai i tetai Pipiria, i te karanga mai anga e, ka inangaro aia i te tatau i te reira mei te akamataanga ki te openga! I tetai mataiti i muri mai, kua atoro akaou mai aia iaku, e i teia taime ko raua ko Mama. I ko i te Are Uipaanga Patireia, kua aravei ngakau tae mai te au tangata mei te au pa enua tukeke ia raua ma te akakite mai i to ratou ingoa. Kua mareka tikai a Papa, e kua akamata aia i te tatau i te au puka a te Au Kite ma te tu inangaro tikai.

Au Akameitakianga Puapinga

Ia Tepetema 2001, kua akaipoipo au i tetai tamaine Rutia meitaki tikai ko Yelena. Kua papetitoia aia ei Kite mei te mataiti 1997 e kua akamata aia i te painia i roto ia Me 2003. Ma to maua rekareka maata, kua kite mai maua e kua akamata toku nga metua i te apii i te Pipiria ma te Au Kite e te tere meitaki ra i te pae vaerua. Tika rai, kare rai au i irinaki ana i teia nuti kia akarongo rava au mei ko tikai ia Papa. Kua akakite mai aia i runga i te terepaoni e, ko Iehova anake ua te Atua mou!

E mataora tikai au i konei i Almaty no te mea kua rauka iaku te atianga kia rave i te au apii Pipiria ki te au tangata no te au ngai e manganui, kapitiia mai a Tinito, Irana, Pakitana,Turia, e Tureki. Kare i roa akenei, kua pati mai tetai orometua Irana kia apii au i te Pipiria kiaia i roto i tona uaorai reo Peresia. Kua mareka tikai tetai tangata e tianara vaeau i mua ana, no Avikanitana mai i tona apiianga no runga ia Iehova. E mataora katoa i te apii ki tetai tangata Turia i roto i toku reo Kurd, pera katoa te apii i te au tangata i roto i te reo Kataka e te Rutia, e etai atu au reo ke o toku tamarikianga.

I teianei, te tavini nei maua ko Yelena, i roto i tetai putuputuanga reo Kataka​—⁠ko tetai o te au putuputuanga o te Au Kite o Iehova e 35 i Almaty. I te mataiti i topa akenei, kua riro ei akameitakianga no maua ko Yelena i te tavini no tetai tuatau poto ua i ko i te opati manga o te Au Kite o Iehova, koi oti ua akenei i te akatuia, vaitata atu ki Almaty.

I tetai tuatau, kua apiiia au kia makitakita atu, inara kua apii mai a Iehova iaku kia aroa. Kua papu iaku e, noatu e te maroia maira tatou e te kopu tangata e te au oa te manako meitaki maira, ka tau tatou kia kore rava e akakeuia i te rave i tetai mea ke atu. (Galatia 6:⁠9) I teianei te mataora nei au no maua ko taku vaine no te mea te “maata nei te rave anga i te angaanga a te Atu.”​—⁠1 Korinetia 15:⁠58.

[Tataanga i te kapi 13]

Kua akamatakite mai a Mama iaku e kare aia e uuna akaou i te reira tu mei ia Papa

 [Tutu i te kapi 15]

Te Are Uipaanga Patireia i Karatau, i aere ana au i toku mapuanga

[Tutu i te kapi 15]

Toku nga metua, tei mareka i ta tatou angaanga i teianei

[Tutu i te kapi 15]

Maua ko Yelena i to maua ra akaipoipo

[Tutu i te kapi 15]

Maua ko Yelena, i ko i te opati manga ou vaitata atu ki Almaty