Te Tuatau ki Mua o te Enua​—⁠Tei Roto i Toai Rima?

“TE ORONGA maira te maanaanga o te ao katoa i te timataanga pakari rava atu kia tatou te tangata nei, kare rava i aroia atu ana,” i akapapu mai ei te makatini National Geographic o Okotopa 2007. Me ka akatikatika tatou i taua manamanata ra kia puapinga, i tuatua ai te makatini, ka anoanoia tatou kia “neke viviki ma te manako papu​—⁠e ma te tu pakari kare tatou e akaari putuputu ana ei taiate me kore ei au tangata.”

Ka rauka ainei i te au tangata i te akono i teia au manamanata ma te tu pakari? E maata te au tumu e patoi ra i te reira: te manako kore, te noinoi, te kite kore, te au akatereanga te manako ra ia ratou uaorai, te aru i te apinga nui i te au enua puapingaia, e te au tu o te mirioni tangata tei inangaro i te rave ua atu i to ratou uaorai tu oraanga kaimoumou apinga.

Kua oronga mai tetai peroveta taito o te Atua kia tatou i tetai akaraanga tika tikai no to tatou turanga kia akatikatika i te au manamanata akono tau, te pirianga tangata e te kavamani. Kua tata aia e: “Kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Ieremia 10:23) Te akapapu maira te tuatua enua tumatetenga o te tangata i taua au tuatua ra. E i teia ra, noatu e maata te au tupuanga puapinga i roto i te taieni e te tekinoroti, te o atu nei tatou ki roto i te kino e te au turanga ngata kare i tapapaia atu ana i mua ana. No reira, akapeea tatou e papu ei e ka meitaki atu te tuatau ki mua?

E tika rai, e maata te au tuatua no runga i te akatikatika anga i te tauianga o te reva e tetai atu au aerenga kino, inara kare e apinga i raveia ana. Ei akaraanga, eaa ta te au pa enua i rave ana i te mataiti 2007, te akatuera anga ia mai te aerenga o te pai ka tai nei taime na te Ava Tokerau Opunga? Kua pau mai tetai tataanga i roto i te makatini New Scientist e: “Mei te tu noinoi tau kore i te aru anga i tetai potonga enua maata kia rauka ia ratou i te ko aere no te inu e te kati.”

Vaitata e e 2,000 mataiti i topa akenei, kua totou tika mai te Pipiria e ka tae te tangata ki tetai turanga e ‘ka mate te enua ia ratou.’ (Apokalupo 11:18) Te taka meitaki ra e te anoano ra teianei ao i tetai arataki tei iaia te pakari e te mana kia akatupu i te au akakoroanga tei anoanoia e te au tangata te ka kauraro kiaia. Ka rauka ainei tetai tangata poritiki me kore tetai taineti tu meitaki e te kite karape i te arataki? Te pau maira te Pipiria e: “Auraka e irinaki ki te ui ariki, i te tamaiti a te tangata nei, kare oki ona ora.”​—⁠Salamo 146:⁠3.

 Te Tuatau ki Mua o te Enua​—⁠Tei Roto i te Rima Meitaki

Okotai ua rai Arataki te ka rauka i te akatikatika meitaki i te au manamanata e aro atura teianei ao. No runga iaia, te totou maira te Pipiria e: “Ka noo ua mairai te Vaerua o Iehova [te Atua] ki runga iaia, te Vaerua o te pakari e no te karape; te Vaerua o te ako e no te mana; te Vaerua no te kite, e no te mataku ia Iehova . . . I te tuatua-tika ra ka akava mai ei aia i te aronga ao ra, . . . e i te aʼo o tona vaa e tamate ei aia i te tangata kino.”​—⁠Isaia 11:​2-5.

Koai Aia? Kare atu, mari ua ko Iesu Karaiti, tei oronga aroa mai i tona oraanga no tatou. (Ioane 3:16) E vaerua ririnui a Iesu i teianei e kua akamanaia aia e te Atua kia tutara ki rungao i te enua.​—⁠Daniela 7:​13, 14; Apokalupo 11:⁠15.

Kapitiia atu ki te au tu tau o Iesu, ko tona kite maata i te au mea angaia a te Atua, tei rauka iaia i mua ake ka aere mai ei aia ki te enua. Ko te tikaanga, e pirioni ua atu au mataiti i topa i te anga mai anga te Atua i te ao katoa e pini ua ake, ko Iesu tona “pu rave angaanga.” (Maseli 8:​22-31, NW) E akamanako ana: Ko Iesu te tangata tikai tei tauturu i te anga i te enua e te au mea ora ravarai, koia te ka arataki i te akatikatika anga i te au kino tei akatupuia e te tu kamakura o te tangata.

Koai ma te ka riro ei au tangata no te Karaiti? Ka riro mai ratou ei iti tangata maru e te tuatua tika, ko ratou tei kite i te Atua mou ko Iehova, e te akarongo anga kia Iesu Karaiti ei Tutara. (Salamo 37:​11, 29; 2 Tesalonia 1:​7, 8) Kua tuatua a Iesu e ka “riro oki te enua” ia ratou, e ka tauiia te enua ki roto i tetai parataito.​—⁠Mataio 5:5; Isaia 11:​6-9; Luka 23:⁠43.

Akapeea koe i te o atu anga ki roto i te akatupuanga i te au taputou a te Pipiria? Kua pau mai a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—⁠Ioane 17:⁠3.

Ae, i te akara anga, tei roto to tatou enua i te kino, inara, e mea papu e ka vai ua rai te enua ei kainga no te tangata. Ko te kino, te tatari maira i te aronga kare e akangateitei ana i te au mea angaia e te Atua e kare e akarongo ana kia Iesu Karaiti. No reira, te akamaroiroi atu nei te Au Kite o Iehova ia koe kia apii i te kite e taki atura ki te ora mutu kore.

[Pia i te kapi 8]

KARE E TAERIA E TE TAIENI

Noatu e kua kite pu tikai i te kino e o maira, e mirioni ua atu te au tangata e akakino ra i to ratou manako e to ratou kopapa na te taangaanga anga i te au apinga akakona, te akakino anga i te inu kava, e te kai avaava. Kia ratou, kare te oraanga i te apinga tapu aroa no ko mai i te Atua. (Salamo 36:9; 2 Korinetia 7:⁠1) Te mea tataraara ra, no te mea e kare te manganui e manako ana e e apinga aroa te enua no ko mai i te Atua, te rave ra ratou i te au mea te ka akatupu i te manamanata i roto i te aorangi.

Eaa i reira te rapakau anga? Ka kitea ainei i roto i te taieni e te apii a teianei ao? Kare paa. Ko te manamanata, kare te tangata e ariki ana i te manako o Iehova no runga i te enua, te ka anoanoia, koia oki kia akamaata atu ratou i to ratou kite no runga i te Atua. Te akapapu maira te Pipiria i teia tikaanga. No reira, te taputou maira te reira e ka tae mai tetai tuatau kare te tangata e takinokino i te enua, no te mea “ka ki te enua i te kite ia Iehova, mei te vairanga tai e ki i te tai ra.”​—⁠Isaia 11:9.

[Tutu i te kapi 8, 9]

I raro ake i ta Karaiti tutaraanga ka piri atu te aronga tuatua tika i te akariro anga i te enua katoa ei parataito