E Mea Maaniia Ainei?

Toou tu Tongi Anga

▪ Me kakati koe i taau kai reka rava atu, ka tongi koe i te reira i taua taime rai. Inara akapeea tikai teia tu umere i te tupuanga?

Akamanako ana: Toou arero​—⁠pera katoa tetai au tuanga o toou vaa e te karaponga​—⁠kapitiia mai te au putunga teera pakiri te kapikiia ra e e au mero tongi anga. E maata ratou e kiteaia ana i roto i te au pukupuku rikiriki (papillae) i runga ake i te arero. I roto i te mero tongi anga okotai, e anere ua atu teera uaua, ka rauka ia ratou tataki tai i te akataka mai i tetai o te au tu tongi anga e a​—⁠ko te kavakava, mitimiti, venevene, me kore te kavangu. E tuanga ke takiri te kai veravera. E akakeu ana te au apinga veravera i te mero mamae​—⁠kare i te mero tongi anga! Noatu ra, e piri ana te au teera uaua tongi anga ki te ara uaua kite mai i te tu tukeke, me akakeuia e te au kemikara i roto i te kai, i taua taime rai ka tikinara atu te reira ki te tumu o te roro.

Inara, kare e ko toou vaa ua te tongi ra. Te au mero ongianga e rima mirioni i roto i toou putangiu​—⁠te akariro ra ia koe kia kite mai e 10,000 tu aunga takake rava⁠—​e tuanga puapinga tikai te reira no te tongi anga. Kua tamanakoia e mei te 75 patene o ta tatou e tongi ra, no ko mai i ta tatou e ongi ra.

Kua maaniia e te au taineti tetai putangiu matini uira kia ongi i te au tu aunga. Noatu ra, kua tata a John Kauer, e taote apii i te aerenga o te ara uaua, ki roto i te Research/Penn State, e: “Ko tetai ua atu matini maaniia e te tangata, ka riro ei mea mama tikai me akaaiteia atu ki te mero tangata natura tei anga manea meitakiia e te umere tikai.”

Kua kite ua te tangata e, ko te tongi anga ka akareka tikai i te kai manga. Inara, te umere nei rai te aronga kimikimi e eaa tetai au tangata i reka ai i tetai au kai e kare ra i tetai atu. “Penei ka marama ua te au taineti i te au turanga o te kopapa tangata,” i karanga ai te Science Daily, “inara to tatou tongi anga e te tu aunga e ongi ra tatou, te riro nei rai ei mea marama koreia e te tangata.”

Eaa toou manako? E mea tupu ua mai ainei toou tongi anga? Me e mea maaniia ainei?

[Au Tutu i te kapi 26]

(No teia i runga, akara i te puka)

Akara anga ia roto i te arero

[Tutu]

Pukupuku rikiriki

[Akameitakianga]

© Dr. John D. Cunningham/Visuals Unlimited