Te Manako o te Pipiria

Eaa to te Atua Tu?

TE AKAMARAMA maira te Pipiria e: “E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.” Te akaari mai nei teia akakiteanga i tetai tuatua mou tikai no runga i te tu o te Atua​—⁠e vaerua aia! (Ioane 4:​19-24) Noatu ra, te akatakaia maira aia i roto i te Pipiria ei peretana, okotai rai ia. Ko Iehova tona ingoa.​—⁠Salamo 83:⁠18.

Kua akakite mai tetai aronga tatau Pipiria i te manako oripu no runga i te tu o te Atua. I te mea e e vaerua kitea koreia te Atua, kare i te tu kopapa tangata, eaa ra i maata ai te au tataanga i roto i te Pipiria e tuatua ra no runga i te Atua mei te mea e e mata, e taringa, e putaiu, e ngakau, e rima e e vaevae tona? * Penei ka manako tetai pae e e kopapa tangata to te Atua, no te mea te karanga ra te Pipiria e kua angaia te tangata i roto i tona tu. Na te akara matatioanga e eaa ta te Pipiria e tuatua maira ka rauka i te akakore atu i taua manako oripu ra.​—⁠Genese 1:⁠26.

Eaa te Atua i Akatakaia ai ki te tu Tangata?

Ei tauturu i te au tangata kia marama i te tu o te Atua, kua akauruia te aronga tata Pipiria e te Atua kia akaaite i te au tu o te tangata ki te Atua Mana Katoatoa. Te kapiki ra te aronga apii i tera manako e e anthropomorphic, te aiteanga “te akataka maira me kore te manakoia maira e mei te tu tangata rai.” Te akaata maira teia au tuatua i te au kotinga o te reo tangata i te akataka mai i te Atua mou, ko Iehova. Ko te akakoroanga koia oki kia akamarama mai i te tu puapinga rava o te Atua e kia oronga i teia na roto i te au matara kia maramaia e te au tangata. Kare te aiteanga o teia e kia ariki tika tikai tatou i teia tuatua mei ta tatou rai i marama ana i roto i te au tataanga Pipiria te akaaite ra i te Atua ki “te Mato,” “e rā,” me kore “te paruru.”​—⁠Deuteronomi 32:4; Salamo 84:⁠11.

Pera katoa, kia akakite i te manako e e au tu kotingaia to te tangata, kare i aite ki to Iehova tu teitei maata rava, te karanga ra te Pipiria e kua angaia te tangata i roto i to te Atua tu. Te taka meitaki ra e, kare te aiteanga e e au vaerua te tangata me kore e kopapa tangata to te Atua.

E Tane me Kore e Vaine Ainei te Atua?

I te akatakaanga i te Atua na te taangaanga anga i te tu tangata, kare e tau kia marama tika tikaiia, te akatakaanga i te Atua ei tane kare  katoa e tau kia ariki tika tikaiia. Te akatakaanga o te tane e te vaine ka tau anake ua no te au mea ora kopapa, e e ravenga teia no te reo te akaata maira i te tu kotinga o te reo o te tangata kia marama pu tikai i te aiteanga no runga i te Atua Mana Katoatoa, ko Iehova.

Te taangaanga ra te Pipiria i te tuatua “Metua” i te tauturu ia tatou kia marama e kua akaaiteia Tei Anga mai ia tatou ki tetai metua aroa, paruru, e te akono meitaki. (Mataio 6:⁠9) Kare te aiteanga o te reira e kia manako tatou i te Atua, me kore i tetai ua atu mea ora vaerua i runga i te rangi, ei tane me kore ei vaine. Kare te tu vaine e te tane i te tu natura no ratou. E tika rai, te akakite maira te Pipiria e ko te aronga tei kapikiia ei aronga akatuangaia ma te Karaiti i roto i tona Patireia i runga i te rangi, kare ratou e vai ua i roto i to ratou kopapa tangata ei vaine me kore ei tane, me riro mai ratou ei au tamariki vaerua akakakaia na te Atua. Kua akamaara te apotetoro ko Paulo kia ratou e “kare e tane, kare e vaine” i roto i to ratou pupu me riro mai ratou ei au tamariki vaerua akakakaia na te Atua. Kua akatutu katoaia mai ratou ei “vaine akaipoipo” na te Punua Mamoe, ko Iesu Karaiti. Te akatutu katoatoa maira teia e ko te au tu tangata tei orongaia ki te Atua​—⁠pera katoa ki tana Tamaiti anau tai, ko Iesu e te au mea ora vaerua​—⁠kare e tau kia marama tika tikaiia​—⁠Galatia 3:​26, 28; Apokalupo 21:9; 1 Ioane 3:​1, 2.

Te marama meitakianga te tuanga a te tane, kua taangaanga te au tata Pipiria i te tu tane me taikuia ki te Atua. Kua kite ratou i roto i te tane, i te akatupu tau anga i tana tuanga, e akaataanga tau meitaki no to Iehova tu aroa, e te akamanakoanga mai ei metua tane no tana tamariki i te enua nei.​—⁠Malaki 3:17; Mataio 5:45; Luka 11:​11-13.

Tu Maata Rava Atu o te Atua

Noatu e e vaerua aia, kare Tei Teitei rava e atea mamao ana, e uunaia ana e te tu muna, me kore kare e komunikeiti ana. Kare tona tu vaerua e riro ana ei arai ketaketa i te aronga ngakau ma tikai, te inangaro ra i te kite e te akaperepere i tona aroa, mana, pakari, e te tu tika, e te akataka katoa maira i tona tu e kitea ra i roto i te au mea angaia.​—⁠Roma 1:​19-21.

Penei ka tau to te Atua tu kia akakite potoia i roto i tona tu maata tikai, ko te aroa. E meitaki maata tikai tona aroa no reira i karangaia ai e koia oki te aroa. (1 Ioane 4:⁠8) Te kapitiia maira teia tu i tetai ua atu o tona au tu mei te akaaroa, te akakore anga i te ara, e te akakoromaki maata. (Exodo 34:6; Salamo 103:​8-14; Isaia 55:7; Roma 5:⁠8) E Atua aroa tikai a Iehova e te pati maira ia tatou te tangata nei kia akavaitata atu kiaia.​—⁠Ioane 4:⁠23.

[Tataanga Rikiriki i Raro]

I MANAKO ANA AINEI KOE?

▪ Koai to te Atua ingoa?​—⁠Salamo 83:⁠18.

▪ Te akakiteanga i to te Atua au tu, ka kite tatou i te reira kiea?​—⁠Roma 1:​19-21.

▪ Eaa to te Atua tu maata rava atu?​—⁠1 Ioane 4:8.