Ui te au Mapu E

Ka Akakite Ainei Au i Tei Raveia e Toku Oa?

“E ngata tikai te reira. E oa meitaki teia noku.”​—James. *

“I te akamataanga, kua tupu te manamanata. Kare au i inangaro akaouia e toku au oa no tei akakite au ia ratou.”⁠—Ann.

TE KARANGA ra te Pipiria e: “Te vai nei ra te oa e piri meitaki tona i to te taeake.” (Maseli 18:24) Kua kitea ainei e koe tetai oa mei tera? Me koia ia, kua kitea e koe tetai apinga akaperepereia.

Inara, akapeea me o atu tetai oa ki roto i te angaanga tarevake e te karanga ra aia e e Kerititiano aia? Ei akatauanga, akapeea me kua o atu aia ki roto i te tu tau kore, kai avaava, inu kava kare i tae te mataiti, kai apinga akakona, me kore tetai atu tarevake kino? (1 Korinetia 6:​9, 10; 1 Timoteo 1:​9, 10) Eaa taau ka rave? Ka tuatua ainei koe ki toou oa? Ka akakite ainei koe ki toou nga metua? Ka akakite ainei koe ki te nga metua o toou oa? Ka ripoti ainei koe ki tetai tangata pakari o te putuputuanga? * Me ka akakite koe, eaa te ka tupu ki toou pirianga oa? E meitaki atu ainei kia noo muteki ua?

Ka Akakite Ainei Koe me Kare?

E rave ana te katoatoa i te tarevake. E tika rai, te karanga ra te Pipiria e: “Kua rave katoatoa oki i te ara, e kua ngere i te akameitaki a te Atua.” (Roma 3:23) Inara, kua o atu tetai ki roto i te au ara kino pakari. Tetai pae tei rave i te “apa,” me kare e akatikatikaia te reira ka taki atu ki te manamanata maata. (Galatia 6:⁠1) Akamanako ana i te akaraanga tika tikai e aru mai nei.

▪ Kua kite mai tetai mapu Kerititiano, ko Susan, i te au tutu viivii e te au imene no runga i te ainga i roto i te Web page a tona oa, e Kerititiano katoa.

Akamanako ana: Eaa taau ka rave me ko Susan koe? Ka rave ainei koe i tetai apinga no teia turanga? Me kore ka iki ainei koe e na toou oa rai ia angaanga i te tuku i tana e inangaro ra ki runga i tana Web page e kare ia i te angaanga na tetai ke? Me ka aere mai a Susan kia koe i te pati i toou manako, eaa taau ka akakite atu kiaia?

․․․․․

Ta Susan i iki i te rave: I muri ake i te akamanakoanga i taua turanga ra, kua iki a Susan i te tuatua ki te nga metua o tona oa. “Mataku  tikai au,” i karanga ai aia, “no te mea e nga oa meitaki katoa raua noku. Kua akamata au i te aue no te mea e ngata tikai i te tuatua atu kia raua.”

Eaa toou manako? Kua rave ainei a Susan i te mea tika? Me e meitaki atu kia noo muteki ua aia?

E tauturu ei ia koe i te akamanako i teia tumu manako, teia tetai au tumu tikai kia akamanakoia:

Eaa ta te oa mou ka rave? Te karanga ra a Maseli 17:17 e: “E aroa mairai te [“oa mou,” NW] i te au tuatau katoa ra, i anau maira te taeake no te tuatau e tumatetengaʼi ra.” Me aru tetai tangata i tetai mataara tei aati i te au kaveinga Pipiria, te o atura tera tangata ki roto i te ‘tumatetenga,’ noatu e kua kite aia me kore kare aia i kite. E tarevake te “maata ua i te ketaketa kia tika” na te akamaataanga i te au mea rikiriki ua, inara kare te oa mou e kopae i te tu, kare e tau i te Kerititiano. (Koheleta 7:16) Ko te akaruke ua i teia turanga kare ia i te ikianga tau.​—⁠Levitiku 5:⁠1.

Akapeea me ko koe te metua? E ui kia koe uaorai e: ‘Me e metua au e e Web page ta taku tamaiti me kore tamaine ma te au mea ainga viivii, ka inangaro ainei au kia kite i te reira? Eaa toku manako me e oa to taku tamaiti me kore tamaine tei kite i te reira, inara kare i akakite mai ana kiaku?’

Akapeea te au turanga a te Atua? Kare teia i te tuatau noo muteki ua. Kareka ra, e aru koe i te ture tau a te Atua tei akanooia i roto i te Pipiria. Te tikaanga, me turu koe i te mea tika, ka akarekareka koe i te ngakau o Tei Anga ia koe. (Maseli 27:11) Pera katoa, ka mataora koe no te mea kua kite koe e kua rave koe i te mea meitaki no toou oa.​—⁠Ezekiela 33:⁠8.

“E Tuatau to te Tuatua”

Te karanga ra te Pipiria e “e tuatau to te muteki ua, e e tuatau to te tuatua.” (Koheleta 3:⁠7) E maata te taime kare te tamariki rikiriki i kite e ko teea te mataara tau i te aru. Me rave tetai oa i te tarevake ka manako ratou e: ‘Kare au e inangaro i toku oa kia o atu ki roto i te manamanata’ me kore ‘Kare au e inangaro i toku oa kia riri mai iaku.’ Me ko tera ua te au tumu manako ka akamanakoia, ka ngoie ua te ikianga​—⁠ko teia te ‘tuatau muteki ua.’

Inara, ia koe e maatamaata maira, ka akamata koe i te akara i taua tumu manako ra mei te manako rai o te aronga mamaata. Ka kite koe i reira e kua o takere toou oa ki roto i te manamanata e te anoanoia ra te tauturu​—⁠e tauturu te ka rauka ia koe i te rave. Tera tikai e, eaa taau ka rave me akarongo koe e kua o tera oa ki roto i te peu te aati ra i te au ture me kore i te au kaveinga a te Pipiria?

Te mea mua, e akapapu e e tika te tuatua taau i akarongo. Penei e tuatua pikikaa ua. (Maseli 14:15) Te maara ra i tetai mapu ko Katie tona ingoa e: “Kua akamata tetai oa oku i te akakite i te au tuatua pikikaa no runga iaku, e kua manako te au tangata piri vaitata kiaku e e tika tana au tuatua. Mataku tikai au e kare rava tetai tangata e irinaki mai iaku!” Kua totou mai te Pipiria e “kare katoa [a Iesu] e akatika ua i ta ona taringa i akarongo ra.” (Isaia 11:⁠3) Eaa te apiianga? Auraka e manako viviki e e tika te au mea katoatoa taau e akarongo ra. E tauta i te kimi i te tika. Akamanako ana i tetai tupuanga tika tikai.

▪ Ko James, tei taikuia mai i mua akenei i roto i teia atikara, kua akarongo aia e kua taangaanga ana tona oa meitaki i te au apinga akakona i ko i tetai pati.

Akamanako ana: Eaa taau ka rave me ko koe a James? Akapeea koe e kite ei e e mea tika taau i akarongo ana?

․․․․․

 Ta James i iki i te rave. I te akamataanga, kua maani ua a James e kare aia i akarongo ana i tetai apinga e kare ana apinga i kite. “I reira, kua tamanamanata toku akava ngakau iaku,” i karanga ai aia. “Kua kite mai au e ka anoanoia au kia tuatua ki toku oa no runga i te reira.”

Eaa toou manako? Eaa ra te au akameitakianga me tuatua koe na mua ki te tangata tei ripotiia mai e kua rave aia i tetai tu, kare e tau ei Kerititiano?

․․․․․

Me e ngata ia koe i te tuatua ki te reira tangata no runga i te reira, eaa ua atu taau ka rave?

․․․․․

Kua akakite mai te oa o James e kua kai aia i te au mea akakona i ko i te pati. Inara, kua pati aia kia James e auraka e akakite ki tetai tangata no runga i te reira. Kua inangaro a James i te rave i te mea tika. Inara kua inangaro katoa aia i tona oa kia rave i te mea tika. No reira, kua akakite aia ki tona oa e ka oronga aia e okotai epetoma nona kia ripoti i te reira ki te aronga pakari i roto i tana putuputuanga. Me kare aia e rave i te reira, na James tikai e ripoti iaia.

I toou manako kua tano rai ta James i rave? Eaa ra i tano ei me kore eaa i kore ei i tano?

․․․․․

Kare te oa o James i aere ana ki ko i te aronga pakari, no reira a James i ripoti ei i te reira. Inara, i muri mai, kua rako tangata tona oa. Kua tauturuia aia e te aronga pakari kia kite e te anoanoia ra te tu tataraara e kia akatupu akaou i te pirianga ma kia Iehova.

E Tangata Taritari Tuatua Ainei Koe?

Penei, ka ui koe e: ‘E tangata taritari tuatua ainei au me akakite au no runga i toku oa? Kare ainei e mama ake i te maani e kare aku apinga i kite?’ Me tei roto koe i tera turanga, eaa taau ka rave?

Te mea mua, kia kite e ko te mea mama ua i te rave kare te reira i te tu aroa e te rave anga i te apinga aroa kare te reira e mama ua ana. Te anoanoia ra te tu mataku kore i te ripoti i te tarevake o tetai oa. Eaa ka kore ei koe e pure ki te Atua no runga i te reira? E pati kiaia no te tu pakari e te mataku kore taau e anoano ra. Ka tauturu aia ia koe.​—⁠Philipi 4:⁠6.

Te rua, e akamanako e akapeea taau ripotianga i teia turanga i te akameitakianga i toou oa. Ei akatutuanga, penei te aaere ra korua ko toou oa i runga i tetai tuaivi, no te tarevake o te takai anga, kua topa atu toou oa ki runga i tetai papa i raro ake. E marama ua e, ka anoano toou oa i te tauturu. Ka akapeea ra, no tona tu akama, kua akakite atu aia kia koe e ka inangaro aia e nana rai e kake ki runga i tera tuaivi ? Ka akatika ainei koe iaia kia akakino i tona oraanga mei tera rai?

Aiteite ua te reira ki tetai oa tei topa mei te arataa Kerititiano. Penei ka manako tera tamaiti me kore tera tamaine e ka rauka i te akaora iaia i te pae vaerua ma te kore e tauturu. Inara e manako neneva tera. E tika rai, ka akama toou oa no runga i tei tupu. Inara, no taau ‘kapiki i te tauturu’ penei ka akaora mai koe i toou oa!​—⁠Iakobo 5:⁠15.

No reira, auraka e mataku i te akakite atu me kua rave tetai oa i te tarevake. Na te kimi anga i te tauturu no te reira oa, te akaari ra koe i toou tu tiratiratu ki te Atua ko Iehova e toou tu tiratiratu ki toou oa, penei a tetai ra ka akameitaki mai aia ia koe no taau tauturu aroa.

[Au Tataanga Rikiriki i Raro]

KIA AKAMANAKO

▪ Akapeea te ripoti anga i te tu tarevake o toou oa i riro ei ei akaarianga i te tu tiratiratu ki toou oa?

▪ Koai ma te aronga i roto i te Pipiria taau e manako ra kua timataia to ratou tu tiratiratu ki tetai oa? Eaa taau ka kite mai mei ia ratou?

[Tutu i te kapi 28]

Me topa tetai oa mei te arataa Kerititiano, ka anoanoia koe kia akapapu e ka rauka iaia te tauturu