Rapakauia e “Tetai Puka Taito Tikai”

▪ Te atoro atura tetai o te Au Kite o Iehova i Paratiri, i Marike Apatonga, i te au tangata i ko i to ratou kainga, i aravei ei aia i tetai vaine tei akakite kiaia e, kua rapakauia tona metua vaine ongai e tetai puka. No tona inangaro i te kite, kua ui te Kite e eaa te puka. “E puka taito tikai,” i karanga ai te vaine, e kua apai mai aia i te puka veruveru a tana tamaiti e kopi no te My Book of Bible Stories.

Kua akamarama mai te vaine e kua rokoia tona metua vaine ongai e te taitaia e e mataku tikai aia i te mate e te poiri, no reira kare aia e akaruke i tona roi. Kua rave mai te tamaiti a teia vaine i tana puka Bible Stories, e kua tatau ki tona mama kereni. Kua akamaroiroiia te mama kereni no te tatau anga tana utaro kiaia, i meitaki mai ei aia mei tona manamanata.

Kua akakite mai te Kite e: “I toku akakite anga ki te vaine e na te Au Kite o Iehova i nenei i te puka e ka rauka mai iaku tetai puka ou nana, kua pati mai aia kia apai mai au e rua puka​—⁠e tai na tona metua vaine ongai e tai nana. I te kave anga atu au i te puka, kua pati akaou mai aia i tetai. I te openga, e 16 ana puka na tona au oa!”

Ka rauka ia koe i te pati i tetai kopi o te puka My Book of Bible Stories, e 116 tua te uriuri manako ra no runga i te au tangata e te au tupuanga i roto i te Pipiria. No te 30 mataiti i topa mei te neneiia anga mai teia puka, e tere atu i te 72 mirioni kopi tei neneiia. Kia pati i tetai kopi, e akaki ua i teia kuponi e e mere atu ki te ngai nooanga e orongaia maira me kore ki tetai ngai nooanga tau tei papaia i te kapi 5 o teia makatini.

□ Ma te kore e tutaki, ka inangaro au i tetai kopi o te puka e akaariia maira i konei.

□ Tata mai kiaku no runga i tetai apii Pipiria oronga ua i te kainga, ine.