Te Mana Akavare o te Akakitekiteanga

TANGATA TATA O TE MAKATINI E ARA! I PORANI

Te akara tamou ra a Tomek i te tivi. Te akarongo meitaki ra aia ki te karere okooko e akakeu ra i te aronga e akarongo maira e: “Me aao taau tamaiti i teia, ka matutu aia, ka oro, e ka rekaia e tona au oa. Okoia tetai!” Kua oro a Tomek ki ko i tona Tati, iaia e imene ra i te tangianga imene tana i akarongo ua akenei. “Tati, ka oko koe tetai noku?” i ui ei aia.

▪ Eaa ra te tamariki e inangaro ei i te apinga e akakitekiteia maira? “No te mea kua tu tetai atu i taua apinga ra, ka inangaro katoa ratou i te reira. Te inangaro ra ratou kia manako meitakiia mai ratou e to ratou au oa,” i akamarama mai ei tetai tangata apii tei tata ki roto i te makatini Rewia i Porani. Me patipati ua, me aue, e me akariri te tamariki, ka akatika ua tetai au metua i te oko i ta te anau e inangaro ra.

Akapeea tetai akakitekiteanga te takete ra i te tamariki i riro ei ei mea akavareanga tikai? Te akamarama maira te taote no te manako ko Jolanta Wąs e “kare te reira e akakite ana i te moni oko, te tu, me kore te puapinga o te apinga.” Te maaniia ra te akakitekiteanga “kia akakeu i te manako ngakau.” Kua kite mai a Wąs e: “Kare te tamariki rikiriki e akara matatio ana i te tua i roto i tetai akakitekiteanga. . . . Kare ratou e akaaite ana i te ikuikuanga e orongaia maira ki ta ratou e kite ra e e tika.” E noatu e te tauta ra ratou i te rave i te reira, kua kotinga ravaia to ratou maramaanga i te akara matatio anga i te apinga.

Akapeea koe me paruru i taau tamaiti mei te mana akavare o te akakitekiteanga? Te mea mua, “ka anoanoia koe kia akapou i te taime e taau tamaiti e kia akamarama ua atu kiaia e kare e tau kia vaitoia te puapinga o te tangata ki tetai au tamaka [me kore kakau] e aao ra aia,” i karanga ai te Rewia. E apii i taau tamaiti e ka rauka ua kia mataora te oraanga noatu e kare ana apinga kangakanga ou. Te rua, ka anoanoia kia kite te au metua e akapeea te akakitekiteanga i te akakeu anga i ta ratou tamariki. Ko te tumu manako maata koia oki, auraka e “akatika i te akakitekiteanga kia apii mai ia tatou e eaa te mea meitaki no ta tatou tamariki,” i akamaroiroi mai ei a Wąs.

Te openga, ka puapingaia te au metua katoatoa mei te akoanga i roto i te Pipiria. Kua tata te apotetoro a Ioane e: “Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.”​—⁠1 Ioane 2:​15, 16.

Kare ainei koe e akatika e e manganui te akakitekiteanga te tau ra ki “te anoano tika kore o te mata” e te akakeu ra i te aronga ou e te aronga pakari kia rave i te “akatietie o [to ratou] ora anga”? E tika rai, kua ako ua atu te apotetoro a Ioane na te tataanga e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—⁠1 Ioane 2:⁠17.

Ko te au metua e akapou putuputu ana i te taime i te pukapuka akamaroiroianga ki ta ratou tamariki, ka rauka i te apii tamou tikai i te au kaveinga a te Atua e te au tumu puapinga. (Deuteronomi 6:5 -7) I reira, kare te tamariki e akakeu ngoie uaia e te mana akavare o te akakitekiteanga o teia ao, tei maaniia kia maro te tamariki i to ratou au metua i te oko mai i te au apinga na ratou.