E au Akameitakianga Maata Atu Tetai i te Apinga Nui

E ANGAANGA puapinga tikai ta Jon, i Marike. Iaia rai e mapu ra, e teretere ana aia i teianei ao e e maata tana moni e rauka ana. E kainga manea tikai e e oraanga meitaki to raua ko tana vaine. Me akaraia mai e te tangata e manganui, kua akameitakiia tikai raua.

E akamanako ana i tetai akaraanga. I roto i te aronga kimi angaanga e 5,000 tuma, ko Kostas * tetai o te aronga e 80 rai i ikiia, kia tereniia ei tangata angaanga i roto i tetai pangika rongonui o Europa. I roto i tetai nga mataiti ua, kua rauka iaia tetai au angaanga memeitaki, e kua akariroia aia i te openga ei tangata akaaere no tetai tipatimani maata o tetai pangika ke. I te tuatau i akaruke ei aia i tera angaanga no te akamata i tana uaorai kamupani, e maata atu tana moni e rauka mai ana i roto i te mataiti okotai i ta te maataanga o te aronga angaanga i roto i to ratou oraanga katoa. Kua manako aia e kua akameitakiia aia.

Inara, kua papu tikai i teia nga tangata e e au akameitakianga maata atu tetai i te apinga nui pae materia. Ei akatauanga, i teia tuatau e tangata tauturu a Jon ei puapii i te apii i te Pipiria ki tetai ke kia akavaitata atu ki te Atua. “Kua kite mata au e kua kite ana au i te tupuanga o te apinga nui pae materia, kare e taki atu ana ki te tu mataora,” i karanga ai a Jon. “Te aruaru kia rauka mai te reira e te akono anga i te reira kare e rava te taime no tetai angaanga ke atu. I tetai tua, te aru anga i te au kaveinga o te Pipiria te oronga  maira i te au akameitakianga e manganui, mei te akaipoipo mataora, te manako au, e tetai akava ngakau meitaki.”

Kua kite katoa rai a Kostas e: “Kare te Atua e inangaro ana ia tatou kia akono i tetai oraanga e maata te apinga nui. Te irinaki pakari nei au e noatu eaa tana ka oronga mai kia tatou, tei maata atu i ta tatou e anoano ra i te au ra, e apainga i reira na tatou kia taangaanga i te reira kia tau ki tona anoano.” I nga taime ua akenei, kua akamata a Kostas e tona ngutuare tangata i te apii i tetai reo ke, kia apii atu i te au kaveinga Pipiria ki te au tangata e manganui. Kua karanga aia e: “Kua kite mai matou e e mataora atu matou i te oronga atu i te rave mai.”​—⁠Angaanga 20:⁠35.

E tika rai, kua kite mai a Jon raua ko Kostas e ko te au akameitakianga i te pae vaerua e puapinga maata atu te reira i te au apinga nui pae materia. Kua kite a Daniel Gilbert, e poropeta i Harvard, “e kua akapou [te aronga apii kite i te manako] e rau ngauru mataiti i te apiianga i te pirianga i rotopu i te apinga nui e te tu mataora, e kua taopenga ratou e te akamaata atura te apinga nui i te tu mataora o te tangata me taki atu te reira ia ratou, mei te turanga putaua ki tetai turanga meitaki atu.” Inara kua tuatua katoa aia e, “Kare ra e maata atu te tu mataora a muri ake.”

Te Apiianga te Kite Putuputuia ra te Mamae

“Me kare te tu putaua,” i akakite mai ei tetai tangata akarakara, “ko te maata atu i te moni ka rauka mai e mea poitirere e e meangiti ua te pirianga o te reira ki te tu mataora uaorai.” I te akamataanga o te anere mataiti i topa akenei, kua kite meitaki mai tetai tangata ripoti i taua apiianga ra, i tona uiui manako anga kia Andrew Carnegie, e tangata puapinga no te maani auri, koia te tangata ona mirioni roa atu i te reira taime i roto i teianei ao. “Kare au e tau kia vareaeia,” i akakite ei a Carnegie kiaia. “Akapeea taku apinga nui i te tauturu anga iaku? E ono ngauru oku mataiti e kare e rauka iaku i te ngau meitaki i taku kai. Ka oronga pouroa au i taku mirioni tara naringa ua  ake e ka rauka akaou toku tu mapu e te oraanga meitaki.”

Kua tuatua katoa te tangata ripoti e: “Kua uri poitirere mai te Tane ko Carnegie, e i roto i tetai reo meangiti rava, ki i te riri e te manako ngakau oonu kare e rauka i te akataka, e kua tuatua mai e ‘Ka rekareka rava atu au i te oko i tetai ua atu apinga naringa ua ake e ka rauka i te akaoki akaou mai i toku oraanga.’ ” Kua akatika rai tetai tangata ona mirioni no te inu, ko J. Paul Getty, i muri mai e: “Kare e pirianga o te moni ki te tu mataora. Penei ua ake ra ki te tu mataora kore.”

Penei ka akatika koe ki te tangata tata Pipiria tei pati e: “E tukuia mai te putaua e te apinga nui iaku nei: e akaangai mai koe iaku ki te kai e tau iaku ra: Ko te ki ua aea oki au, e kua uuna iora au ia koe, ko te karanga aea oki au e, Koai a Iehova? e ko te putaua aea oki au, e kua keia iora au, e ko te akaiki puapinga kore ua aea au i te ingoa o taku Atua ra.”​—⁠Maseli 30:​8, 9.

Kua akataka mai te Ariki ko Solomona o Iseraela i taito e: “Riro atura au ei tangata maata, e te apinga maata taku i te aronga katoa i noo i Ierusalema i mua iaku ra.” Inara, kua tuatua katoa aia e: “E mea puapinga kore anake, e te kai i te matangi.” Kua akakite katoa a Solomona e: “Na Iehova te meitaki i apingaʼi te apinga, kare oki e kapiti katoaia mai te kino i te reira.”⁠—​Koheleta 2:​9-11; 5:​12, 13; Maseli 10:⁠22.

Te Mataara ki te au Akameitakianga Mutu Kore

Te taka meitaki ra e, ka kitea uaia mai e tatou te mataora tinamou tikai i muri ake i te akamerengo meitaki anga tatou i to tatou au anoano i te pae vaerua. Me tuku tatou i te Atua na mua, ka kite mai tatou e ka riro mai te au tuanga ravarai o to tatou oraanga ei apinga nui e ei mea puapinga maata atu.

Ko te mea meitaki, ka rauka ia tatou i te karanga e kare tatou e manamanata ua rai i te moni. Te akapapu maira te Pipiria kia tatou no tetai tuatau ki mua e ka akakore takiriia te au okookoanga noinoi e te au ravenga pikikaa. (1 Ioane 2:​15-17) Te akatereanga o te au mea ou a te Atua e aru maira, ka akaaereia e tana au kaveinga tuatua tika. Ka tauiia te enua ei parataito mei ta te Atua rai i akakoro mua ana i tona tuku anga i nga tokorua mua ki runga i reira. E akameitakianga tikai i te kite atu i te enua katoa, kua kiia e te mataora, te au, e te aroa!​—⁠Isaia 2:​2-4; 2 Petero 3:13; 1 Ioane 4:​8-11.

Kare te oraanga i te reira taime e ngere i te mataora me kore kare e maromaroa. Ka kapitiia mai te akameitakianga pae materia ki te pae vaerua, i te akatupu anga te Atua i tona akakoroanga mua no te au tangata kia noo ki runga i te enua parataito e tuatau ua atu. Te akapapuia maira kia tatou e ka rava meitaki te kai, te ngai nooanga, e te angaanga puapinga tikai na te katoatoa. Ka takore takiriia te tu putaua.​—⁠Salamo 72:16; Isaia 65:​21-23; Mika 4:⁠4.

Ko te aronga katoatoa e taangaanga ngakau tae ra i te akarongo ia Iehova, te Atua o te Pipiria, kare ratou e mareka kore. (Roma 10:​11-13) No reira, e tu pakari tikai i te aruaru i teianei, i te au akameitakianga tei maata atu i te apinga nui!​—⁠1 Timoteo 6:​6-10.

[Tataanga Rikiriki i Raro]

[Tataanga i te kapi 8]

Me tuku tatou i te Atua na mua, ka riro mai to tatou oraanga ei mea puapinga maata atu

[Tutu i te kapi 8]

Te akaaere meitaki anga i te moni ka akariro i te oraanga kia mataora atu