Te Manako o te Pipiria

Ka Patoi Ainei Koe i te Tareuanga?

Te manako ra tetai pae e ko te tareuanga ​—⁠koia oki, ko te takoreanga i te kopapa mate na te tauanga ki te ai⁠—​te akangateitei kore ra i te kopapa e te manako o te tangata tei mate. Ta ratou tamanakoanga ‘e akamataanga peikani te reira, e no reira ka tau kia kopaeia e te aronga te karanga ra e te akamori ra ratou i te Atua.’ Te irinaki ra tetai pae i te tareuanga e e matara meitaki ua e te ngateitei no te takoreanga i te kopapa tangata mate. Eaa toou manako no runga i teia?

I TE tuatau Pipiria e mea matauia i te tanu i te tangata mate. Ei akaraanga, kua tanu a Aberahama i tana vaine ia Sara, ki roto i tetai ana. Kua tukuia te kopapa mate o Iesu ki roto i te tanumanga tei paoia i roto i te mato. (Genese 23:9; Mataio 27:60) Te akataka maira ainei te Pipiria e ko te tanuanga te mataara anake ua no te takore i te kopapa tangata mate? Te akakite maira ainei e kua patoi te au tavini o te Atua i taito i te tareuanga?

Akakiteanga Ainei i te tu Mareka Kore o te Atua?

Me kare e tatau meitakiia te aiteanga, penei i te akaraanga o tetai au irava Pipiria, kua tareuia tetai au tangata tei mate no to te Atua tu mareka kore. Ei akatauanga, kua akakite te Ture a Mose e me kua akaturi te tamaine a tetai taunga o Iehova, ka “taʼuia aia ki te ai” i muri ake i tona tamateia anga. (Levitiku 20:10; 21:⁠9) Pera katoa, i te akarongo kore anga a Akana e tona ngutuare tangata e kua akaviia a Iseraela i Ai, kua pepeiia ratou e to ratou au tangata ki te toka e kua “taʼuia ratou ki te ai.” (Iosua 7:25) Kua tamanako tetai aronga apii kite e ko teia te akonoanga tei raveia ki te aronga tei mate taakamaia e kua tareuia te aronga kino, kare i tau kia tanu ngateiteiia.

Tetai atu, i te tauta anga te Ariki ko Iosia i te tama i te akamori itoro i roto ia Iuda, kua vavai aia i te au ngai tanumanga o te au taunga tei akaatinga kia Baala e kua tau i to ratou au ivi ki rungao i ta  ratou atarau. (2 Paraleipomeno 34:​4, 5) Te akaari maira ainei taua au akaraanga ra e tei runga te tu mareka kore o te Atua i taua au kopapa mate ra tei tareuia? Kare, mei tei akaariia mai e tetai tataanga Pipiria ke.

I te autuanga to Philiseti i te tamakianga ki te Ariki o Iseraela ko Saula, kua patiatiaia e ratou tona kopapa mate, pera katoa te kopapa o tana tamariki tamaroa e toru, ki runga i te patu o te oire ko Bete-sani. Inara, te akarongo anga te iti tangata o Iseraela e noo ra i Iabesa-gileada, no runga i teia tu akangateitei kore i te au kopapa mate, kua apai ke atura ratou i te reira e kua tau ki te ai, i muri ake kua tanu ratou i te au ivi. (1 Samuela 31:​2, 8-13) I te akara anga mua, penei te akapapu maira teia tataanga i te manako tarevake no te tareuanga. No te mea, e tangata kino katoa a Saula; kua tamaki aia kia Davida, tei akatainuia e Iehova, e kua mate i roto i te tu mareka kore o te Atua.

Inara, e akamanako ana i tetai tei mate i te pae ia Saula. Ko tetai o tana tamaiti, tei tau katoaia te kopapa ki te ai, ko Ionatana. Kare aia i te tangata kino. Ei tukeanga, e oa piri mou a Ionatana no Davida e e tangata turuturu tikai iaia. No Ionatana, kua kite to Iseraela e: “Ko te Atua oki ma ia katoa tei rave i te angaanga.” (1 Samuela 14:45) I te kite mai anga a Davida i te angaanga a te au tangata o Iabesa-gileada, kua akapaapaa e kua akameitaki aia ia ratou no ta ratou i rave: “Kia akameitakiia mai kotou e Iehova, i tei akapera i te takinga-meitaki i to kotou pu ia Saula.” Te taka meitaki ra e, kare te tau angaia te kopapa o Saula raua ko Ionatana i tamanamanata ana ia Davida.​—⁠2 Samuela 2:​4-6.

Kare e Arai Anga no te Tuakaouanga

Te apii meitaki maira te Pipiria e ka akaora akaou mai te Atua ko Iehova i te manganui te moe ra i teianei i roto i te mate. (Koheleta 9:​5, 10; Ioane 5:​28, 29) I te akataka anga mai na roto i te totou i te tuatau ka akaoraia mai te aronga tei mate, te karanga ra te puka Pipiria o Apokalupo e: “E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra.” (Apokalupo 20:13) Kia akatupu i teia, kare e tukeanga ki te Atua Mana Katoatoa e me kua tanuia, kua tauia ki te ai, kua ngaro ki te moana, kua kaingaia e te animara taetaevao, me kore kua tangaro takiriia e tetai aruruanga pomu te kopapa mate o tetai tangata.

Kare te Pipiria i oronga mai ana i tetai aratakianga taka meitaki no runga i te ka raveia ki te au kopapa mate. Kare a Iehova i patoi ana i te tareuanga. Te taka meitaki ra e, te anoanoia ra te au akanoonoo anga no te tanumanga kia ngateitei e kia tau meitaki te reira.

Ko tetai apinga te ka akakeu i te au ikianga a tetai tangata no runga i teia au akanoonoo anga no te tanumanga, ka anoanoia kia tau ki te au peu tei matauia e te au tangata o te reira ngai. Ko te aronga e aru ra i te au kaveinga Pipiria, kare ratou e anoano kia rave i tetai ua atu apinga te ka akariri atu i to ratou tangata tupu. Kare katoa e tau kia raveia tetai tu te akaari maira i te irinakianga i te au apiianga akonoanga pikikaa, mei te meta rai kare e mate. I te pae mai i te akamanako anga i teia, noatu e eaa te ikianga a tetai tangata e ka akapeea tona uaorai kopapa i te takoreia anga me mate aia, me kore tetai kopapa ke atu, e ikianga teia na te tangata uaorai me kore na te ngutuare tangata.

KUA MANAKO ANA KOE?

▪ Koai te tangata akamori tiratiratu tei taikuia i roto i te Pipiria e kua tareuia?​—⁠1 Samuela 31:​2, 12.

▪ Akapeea a Davida i te akono anga i te au tangata tei tau i te kopapa o Saula ki te ai?​—⁠2 Samuela 2:​4-6.

▪ Eaa te akaari maira e me tareuia te tangata kare te reira e arai i tona akatuakaou anga? ​—⁠Apokalupo 20:⁠13.

[Tataanga i te kapi 11]

Kare te Pipiria i oronga mai ana i tetai aratakianga taka meitaki no runga i te ka raveia ki te au kopapa mate