Kua Taui Tetai Puapii i Tona Manako

▪ I tetai nga mataiti i topa akenei, kua pati tetai puapii i Batumi, i roto i te enua ko Tiotia, ki tana aronga apii kia tata mai i te Ture Ngauru. Kua poitirere te puapii, i te taiku tano mai anga tikai tetai o te aronga tana e apii, ko Anna, i te reira. Kua pau katoa mai aia i tetai atu au uianga Pipiria na roto i tetai tu papu meitaki tikai. Ma te umere kua ui atu aia kiaia e akapeea aia i kite maata ai i te reira. Te pau mai anga a Anna e i apii ana aia i te Pipiria ma te Au Kite o Iehova, kua tapu viviki te puapii iaia, i te karanga anga e i tona manako e aronga marokiakia ratou.

I tetai atianga, kua pati te puapii i tana aronga apii kia tata mai i tetai atikara no runga i te oraanga i Tiotia e te au manamanata tukeke e tupu ra ki te au tangata o te enua. I te openga o tana atikara, kua tata a Anna e: “Ko tetai ua atu tauta anga a te tangata i te akatikatika maata i te taiate tangata ka puapinga kore ua, no te mea mei ta Ieremia 10:23 e karanga ra e: ‘Kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.’ Pouroa te au manamanata na te Patireia o te Atua anake ua e akatikatika.”

I tera mai ra, kua akameitaki te puapii i ta Anna atikara ki te pupu apii e kua tuatua e: “Kua reka tikai au i te tataanga tuke ake rai a Anna, tana i tata i roto i tana uaorai au tuatua. I roto i te reira kua akamarama mai aia e akapeea tikai te au turanga o teianei ao i te taui anga.” Kua umere katoa te puapii i to Anna tu, na te akapaapaa anga iaia i mua i tona pupu no tona tu meitaki e tona au kakau tau.

I te atoro atu anga te Au Kite o Iehova i te puapii i te kainga, kua akakite atu aia kia ratou e i mua ana i manako ana aia e e aronga marokiakia ratou, inara kua taui aia i tona manako no tana tamaine e apii ra, ko Anna. I te mataiti 2007, kua tae atu te puapii ki te Akamaaraanga o te mate o Iesu Karaiti ma te Au Kite o Iehova e kua akarongo meitaki atu ki te porokaramu.

I muri ake i te Akamaaraanga, kua akakite te puapii o Anna e kua umere tikai aia i te tu kite meitaki o te Au Kite o Iehova i te Pipiria. I teianei te apii putuputu nei te Au Kite i te Pipiria kiaia. Mei teia puapii rai, kare e ekoko e e manako maoraora toou te akakeu ra ia koe kia akara i te au irinakianga e te tu o tetai ke. Eaa koe ka kore ei e pati atu ki te Au Kite o Iehova no tetai apii Pipiria i te kainga, kare e tutakiia?

[Tutu i te kapi 29]

Te tata nei a Anna i tana atikara