E Mea Maaniia Ainei?

Te Vaa o te Tukani

▪ Kare e rere meitaki ana, inara, e rererere aere ua ana te tukani (toucan) o Marike Rotopu e Marike Tonga. Te tangi a tetai o teia au manu aiteite ua ki ta te rana, inara e maata atu te tangi anga. Ko te tika, e akarongoia ana aia mei tetai kiromita te mamao i roto i te vaorakau. Inara, penei ko te tu umere maata ki te au taineti no runga i te tukani, koia oki, ko tona vaa.

Akamanako ana: Ko te vaa o tetai au tukani e toru taime i te roaroa i te kopapa o te manu. E akaraanga teimaa, inara kare te reira e teimaa ana. “Kua maaniia a runga ki te keratin, e apinga tei aiteite i roto i te au maikuku rima e te rouru,” i akamarama mai ei te tangata taineti apii apinga, ko Marc André Meyers. “E au papa paraaraa rikiriki e manganui e ono tua, e na runga ra i tetai e tetai mei te papa kirikiri toka tapoki are rai.”

Kua akaaiteia te tu o te vaa o te tukani ki tetai oma pakari tikai. Tetai au tuanga te va ua ra, kareka tetai au tuanga kua maaniia ki te au oka e te au pakiri angiangi. Tei rauka mai ko te vaa mamangika ketaketa tikai. “Kua vaitata rai e e kite oonu to te tukani no te angaanga maani matini,” i karanga ai a Meyers.

Ko te maanianga i te vaa o te tukani te rauka ra i te manu i te paruru mei te au u anga kino tikai. Te irinaki nei te au taineti e ka tau te vaa ei akaraanga na te au enitinia i roto i te ngai maani pairere e te ngai maani apinga akaoro. “Ko te au arai tei maaniia mei te vaa rai o te tukani penei ka oronga mai i te paruru anga meitaki atu no te aronga akaoro motoka i roto i te au u anga,” i karanga ai a Meyers.

Eaa toou manako? E mea tupu ua mai ainei te vaa pakari tikai e te mamangika o te tukani? Me kore, e mea maaniia ainei?

[Au Tutu i te kapi 9]

(No runga i teia, akara i te puka)

Va i rotopu

Mei te oma rai te tu