Te Manako o te Pipiria

Akaipoipo Tiratiratu Eaa Tikai te Aiteanga?

Te maataanga o te tangata te inangaro ra i te tokorua akaipoipo kia vai tiratiratu i roto i te pirianga ainga i rotopu ia raua uaorai. Te akatika ra teia manako no te tiratiratu i roto i te akaipoipo ki te Pipiria, tei karanga e: “Kia akameitakiia te akaipoipo i te tangata ravarai, e te viivii kore oki te roi.”​—⁠Ebera 13:⁠4.

MA TE kore e rave i te pirianga ainga ki tetai patana ke, ko te aiteanga tikai ainei e te vai tiratiratu ra i roto i te akaipoipo? Akapeea ra te au manako moemoea no te pirianga ainga te o maira tetai tangata ke kare e ko toou tokorua akaipoipo? Ka riro ainei tetai pirianga oa ki tetai tangata kare i te tokorua noou ei tu “tiratiratu kore”?

Kino Ainei te au Manako Moemoea i Roto i te Pirianga Ainga?

Te akakite maira te Pipiria e e tu natura ua te pirianga ainga e e tuanga tau tikai no te oraanga akaipoipo, e tumuanga no te rekarekaanga e te marekaanga tau tikai. (Maseli 5:​18, 19) Inara e manganui te aronga kite o teia tuatau te irinaki ra e e tu oraanga matau uaia​—⁠e te meitaki katoa​—⁠no tetai tangata akaipoipo kia manako moemoea no runga i tetai patana ke i roto i te pirianga ainga. E kino ainei taua au manako moemoea ra noatu e kare e raveia ana te akaturi?

Te akamou ra te au manako moemoea no te pirianga ainga ki runga i te inangaro i te akamarekaanga ia koe uaorai. Te manako ua anga i to tetai uaorai anoano kare e rotai ana ki te akoanga a te Pipiria no te aronga akaipoipo. No runga i te au pirianga ainga, te karanga ra te Tuatua a te Atua e: “Kare oki tei te vaine te tuatua i tona uaorai kopapa, tei te tane ra; mei te reira to te tane, kare tei iaia te tuatua i tona uaorai kopapa, tei te vaine ra.” (1 Korinetia 7:⁠4) Te aru anga i te akoanga a te Pipiria te kopae ra i te pirianga ainga kia kore e riro mai ei angaanga akakeu i te manako moemoea no te akamarekaanga i to tetai uaorai inangaro noinoi maata. Te ka tupu mai, ka maata atu te mataora o nga tokorua akaipoipo.​—⁠Angaanga 20:35; Philipi 2:⁠4.

Ko te au manako moemoea no te pirianga ainga i vao ake i te akaipoipo te o maira te manako i te inangaro i te rave i te akaturi, e me raveia te reira ka akatupu mai te mamae ngakau ki tona tokorua. Ka akamaata atu ainei te au manako moemoea pirianga ainga i te rave anga i te akaturi? Te pauanga mama ua, ae. Te akatutu maira te Pipiria i te pirianga i rotopu i te au manako e te au angaanga: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara.”​—⁠Iakobo 1:​14, 15.

Kua tuatua a Iesu e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28) Na te patoi anga i te au manako moemoea ua no runga i te akaturi, ka ‘paruru koe i toou ngakau’ e ka paruru koe i toou akaipoipo.​—⁠Maseli 4:⁠23.

Eaa ka Vai Tiratiratu ei i te Pae Manako Ngakau?

Ko tetai akaipoipo puapinga te umuumuia ra kia vai tiratiratu ua ki toou tokorua. (E Pe’e na  Solomona 8:6; Maseli 5:​15-18) Eaa te aiteanga o teia? Noatu e e mea matauia kia rauka mai tetai au oa i vao ake i te akaipoipo, e tikaanga ra to toou tokorua akaipoipo kia oronga atu koe i toou taime, toou manako, toou maroiroi i te pae manako ngakau kiaia. Ko tetai ua atu pirianga te tau tikai ra no toou tokorua e te oronga anga i te reira ki tetai tangata ke, e tu “tiratiratu kore” te reira, noatu kare i akatupuia te pirianga ainga. *

Akapeea taua pirianga ra e tupu ei? Penei e manea atu me kore e tu tangi aroa atu tetai tangata ke i to tokorua. Te akapou anga i te taime ki tetai tangata i te ngai angaanga me kore te piri atu anga ki toou au oa, ka taki atu ki te uriuri manako anga i toou uaorai au turanga, kapiti mai te au manamanata me kore te au mea mareka kore i roto i toou akaipoipo. Penei ka akamata koe i te irinaki atu ki runga i tera tangata no te turuturu anga i te pae manako ngakau. Na te pukapuka anga ki tera tangata na runga i te terepaoni me kore na roto i te Internet, ka akakite atu koe i te au mea muna kiaia. Ka inangaro te au tokorua akaipoipo kia uriuri uaia tetai au manako ki rotopu ua ia raua, e ko ta raua “tuatua muna” kia vai ua i rotopu ia raua.​—⁠Maseli 25:⁠9.

Kia matakite ra e auraka e tuatua e, kare te manako inangaro e tupu ana, noatu e te tupu ra te reira! ‘E pikikaa maata to te ngakau,’ i tuatua ai a Ieremia 17:9. Me e pirianga vaitata toou ki tetai tangata kare i te tokorua noou, e ui kia koe uaorai e: ‘Te patoi ra ainei au me kore te uuna ra i teia pirianga? Ka meitaki ua ainei au me akarongo mai toku tokorua i ta maua e pukapuka nei? Eaa ra toku manako me akatupu toku tokorua i tetai pirianga mei te reira rai?’​—⁠Mataio 7:⁠12.

Ka taki atu tetai pirianga tau kore ki te takino anga i te akaipoipo, no te mea ka akatupu teia pirianga vaitata i tetai pirianga ainga a muri ake. Mei ta Iesu e akamatakite maira e, “no roto mai oki i te ngakau . . . te akaturi.” (Mataio 15:19) Noatu e kare te akaturi i tupu ana, e ngata tikai i te akatikatika i te kino tei akatupuia no te kare e irinaki akaou anga. Kua karanga tetai vaine ko Karen * tona ingoa e: “I toku kite anga e e maata te taime i te ra te tuatua muna ra a Mark ki tetai vaine i runga i te terepaoni, mamae tikai toku ngakau. E ngata tikai i te irinaki e kare raua e piri ana. Kare i papu iaku e me ka irinaki ua rai au iaia.”

E akono tau ua i te au pirianga oa ki te au tangata kare i te tokorua noou. Auraka e kopae ua i te au manako tau kore me kare i te akatika anga i te au akakeuanga tau kore. Me te kite ra koe e te takino ra taua pirianga ra i toou akaipoipo, e rave viviki i te kotinga i te reira me kore i te takore i te reira. Te karanga ra te Pipiria e: “E kite mamao te tangata pakari i te kino, e kua pipini iora.”​—⁠Maseli 22:⁠3.

Paruru i Toou Pirianga Kopapa Okotai

Kua akakoro Tei Anga mai ia tatou e kia riro te akaipoipo ei pirianga vaitata tikai i rotopu i nga tangata e rua. Kua tuatua aia e ko te tane e te vaine “ka riro oki raua ei kopapa okotai.” (Genese 2:24) E maata atu te o maira i te pirianga kopapa okotai i to te pirianga ainga ua. Te kapiti maira i tetai pirianga vaitata tikai i te pae manako ngakau, tei akaketaketaia e te tu karapii kore, te irinaki anga, e te akangateitei anga tau. (Maseli 31:11; Malaki 2:​14, 15; Ephesia 5:​28, 33) Na te taangaanga anga i teia au kaveinga e tauturu ei i te paruru i toou akaipoipo kia kore e takinoia e te manako moemoea e te manako ngakau o te tu tiratiratu kore.

[Au Tataanga Rikiriki i Raro]

I MANAKO ANA AINEI KOE?

▪ Ka taki atu ainei te au manako moemoea pirianga ainga i te rave i te akaturi?​—⁠Iakobo 1:​14, 15.

▪ Ka takino ainei tetai pirianga oa vaitata ki tetai tangata kare i te tokorua noou, i toou akaipoipo?​—⁠Ieremia 17:9; Mataio 15:⁠19.

▪ Akapeea koe i te akaketaketa anga i toou pirianga akaipoipo?​—⁠1 Korinetia 7:4; 13:8; Ephesia 5:​28, 33.

[Tataanga i te kapi 29]

“Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.”​—⁠Mataio 5:28