Ui te au Mapu E

Akapeea Au e Mataora ai i Taku Tatauanga Pipiria?

Eia taime e tatau ana koe i te Pipiria? (Tiki e tai)

□ Au ra

□ Au epetoma

□ Tetai atu ․․․․․

Akaoti i te aerenga tuatua i raro ake.

Me kare au e mataora ana i te tatau i te Pipiria, maataanga o te taime . . . (Tiki i te ka tau)

□ No te inangaro kore

□ No te marama kore

□ Ngai ke te manako

□ Tetai atu ․․․․․

KARE ainei koe e mataora ana i te tatau i te Pipiria? Me koia ia, penei ka ariki koe i ta Will, e 18 ona mataiti, tei karanga e, “Akaraanga maromaroaia ra te tatauanga i te Pipiria.” Inara, kua tuatua katoa aia e, “No te mea kare koe e marama ana e akapeea i te tatau i te reira.”

Eaa ra ka apii ei e akapeea i te tatau i te Pipiria? Ka inangaro ainei koe i te kite maata atu e akapeea

▪ i te rave i te au ikianga meitaki?

▪ e rauka ai te au oa tika tikai?

▪ me akakoromaki i te taitaia?

Tei roto i te Pipiria te au akoanga meitaki no runga i taua au tumu manako, e te vai atura. E tika rai, te kimi anga i teia au akoanga meitaki te umuumuia ra te tautaanga pakari. Inara te rave anga i te reira tautaanga, aite rai ki te kimi anga i tetai apinga nui: Te ngata roa atu o te kimi anga, maata atu te mataora ka rauka mai me kitea mai te reira!​—⁠Maseli 2:​1-6.

Akapeea e rauka mai ei ia koe te au apinga nui i roto i te Pipiria? Te oronga maira te potonga ka pakoti koe i te tua katau i te manako e akapeea i te tatau i te Pipiria​—⁠e i tetai tua mai​—⁠ko teea akanoonoo anga ka tatauia. Akara katoa i te au manako i roto i te kapi ka aru mai taau e reka ra.

KIA AKAMANAKO

Karangaia ana e, ko taau ka rauka mai no te tautaanga, tei runga tikai te reira i taau ka tauta maata atu i te rave.

▪ Akapeea i tika ai te reira no runga i te tatauanga i te Pipiria?

▪ Eaa te taime e akanoo ana koe i te tatauanga i te Pipiria?

[Pia/​Tutu i te kapi 15]

TATAUANGA I TE PIPIRIA

I mua ake ka tatau ei koe . . .

▪ Akapapu e ngai muteki ua toou kia mou toou manako.

▪ Pure no te marama.

Ia koe e tatau ra . . .

▪ Akara i te au mapu e te au tutu o te au papaanga Pipiria ei tauturu ia koe kia akamanako i te au tutu i roto i te Pipiria.

▪ Akamanako i te akanoonoo anga, akara i te au akakiteanga.

▪ Akara i te au tataanga i raro ake e te au irava turuturu.

▪ Ui kia koe uaorai i teia au uianga:

AU TUPUANGA: I naea teia i tupu ei? Naai i tuatua i teia? Te tuatuaia ra teia kiaai?

AITEANGA: Akapeea au i te akamarama anga i teia ki tetai ke?

PUAPINGA: Eaa ra te Atua ko Iehova i kapiti mai ei i teia papaanga ki roto i tana Tuatua? Eaa ta te reira e akaari maira no runga i tona tu me kore te mataara e raveia ra te au mea? Eaa te au apiianga ka akono au i roto i toku oraanga?

Me oti ia koe te tatau . . .

▪ E rave i tetai kimikimi anga ke atu. E taangaanga i te au puka ta te Au Kite o Iehova i nenei, mei te puka Insight on the Scriptures e te “All Scripture Is Inspired of God and Beneficial.”

▪ E pure akaou. E akakite kia Iehova eaa taau i kite mai e akapeea koe i te parani anga i te taangaanga i te reira. E akameitaki iaia no tana Tuatua, te Pipiria.

 [Pia/​Tutu i te kapi 16]

NA ROTO I TEEA PAPAANGA KA TATAU EI KOE I TE PIPIRIA?

Au ikianga . . .

 □ Tatau mei tetai kapi ki tetai kapi.

□ Tatau i te au papaanga i roto i te tu i tataia te au puka me kore te tu i tupu ei te au tupuanga.

□ I te au ra tataki tai, tatau i te au tuanga tukeke o te au Tuatua Tapu.

Monite: Tuatua enua reka tikai (Genese kia Esetera)

Ruirua: Oraanga e te apiianga a Iesu (Mataio kia Ioane)

Ruitoru: Akonoanga Kerititiano mua (Angaanga)

Paraparau: Totou e te au aratakianga tau (Isaia kia Malaki, e Apokalupo)

Varaire: Au pee e te au imene akakeuanga (Iobu, Salamo, E Peʼe na Solomona)

Maanakai: Tu pakari no runga i te oraanga (Maseli, Koheleta)

Tapati: Au reta ki te au putuputuanga (Roma kia Iuda)

Noatu eaa taau papaanga ka iki, akapapu e te tamou ra koe i taau e tatau ra! E tiki ✔ i te pae i te au pene tataki tai me oti koe i te tatau i te reira, me kore tetai atu au mataara i te tata i tetai rekoti no te au pene taau i tatau.

Pakoti i teia pia e tuku ki roto i taau Pipiria!

[Pia/​Tutu i te kapi 16]

AKAORA MAI I TE AU IRAVA!

Kimi i tetai ravenga kia rekaia taau tatauanga. Ei akaraanga:

□ Akapapa te au ingoa ki roto i tetai papaanga kopu tangata.

□ Toroa i te au piapia raini rikiriki. Ei akaraanga, ia koe e tatau ra no runga i tetai tangata akarongo mou, akapiri atu i te au tu e te au angaanga a taua tangata ra ki te au akameitakianga i rauka mai iaia.​—⁠Maseli 28:⁠20.

[Tutu]

Oa no te Atua

↑ Kauraro

↑ Akarongo

↑ ↑

Aberahama

□ Toroa i te au tutu i te akatutu mai i te papaanga.

□ Toroa i te au tutu mama ua i te akatutu mai i te au tupuanga tei akapapaia. Akataka mai eaa te tupu ra i roto i te au tutu tataki tai.

□ Maani i tetai au apinga, mei te araka rai o Noa.​—⁠Ei akaranga, e akara i te Awake! o Tianuare 2007, kapi 22.

□ Tatau maata ki te au oa me kore ki te au mema ngutuare. Tamanakoanga: Iki e tai tangata ei tatau i te tua. E tuku i tetai pae kia tatau mai i te tuatua a te tangata i roto i te pene taau e tatau ra.

□ Iki e tai papaanga, taui i te reira ki roto i tetai au nuti. Ripoti mai i te au tupuanga mei tetai au manako tukeke na te kapiti mai anga i te “au uiuianga” ki te aronga akatutu e te aronga akarakara.

□ Akara e ko teea tangata tei rave i te ikianga puapinga kore e e akamanako i tetai taopenga anga tuke! Ei akaraanga, e akamanako i to Petero pikikaa anga ia Iesu. (Mareko 14:​66-72) Akapeea a Petero i te ariu meitaki atu anga ki te taomianga?

□ Akara me kore e akarongo ki te au tepu nuku Pipiria.

□ Tata i taau uaorai nuku. Kapiti mai i te au apiianga te ka apiiia mai mei te papaanga.​—⁠Roma 15:⁠4.

MANAKO: E akatutu i teia nuku ki mua i tetai manga pupu o toou au oa.

 [Pia/​Tutu i te kapi 17]

KIA AKAKEUIA

▪ Akanoo i tetai akakoroanga! Tata ki raro ake te ra ka inangaro koe i te akamata i taau porokaramu tatau Pipiria.

․․․․․

▪ Iki i tetai tuanga o te Pipiria taau e reka ra. (Akara i te pia  “Na Roto i Teea Papaanga ka Tatau ei Koe i te Pipiria?”) E oti tata ki raro ake teea tuanga o te Pipiria taau ka tatau na mua.

․․․․․

▪ Akamata meangiti ua. Meitaki atu te tatau i te Pipiria e 15 miniti i te kore rava. Tata i raro ake eaa te roa ka akanoo koe no teia tatauanga.

․․․․․

Tamanakoanga: Akono e tai Pipiria no taau apii. Tata i te au manako ki roto i reira. Akairo i te au irava te puapinga ra kia koe.

[Pia/​Au Tutu i te kapi 17]

TA TOOU AU OA E TUATUA RA

“Manga ua taku e tatau ana i roto i te Pipiria i te au po ravarai i mua ake ka moe ei au. Na teia e tauturu mai iaku kia akamanako i te au mea meitaki i mua ake ka moe ei au.”​—⁠Megan.

“E 15 miniti e tatau ana au e tai irava. E tatau ana au i te au tataanga ravarai o raro ake, i te akara anga i te au irava turuturu, e te rave anga i tetai au kimikimi anga ke atu. I tetai taime kare e oti ana iaku i te akara i tetai irava i roto i te apiianga okotai, inara e maata taku i rauka mai i roto i taku tatauanga, i te aru anga i teia ravenga!”​—⁠Corey.

“E tai taime, e 10 marama i toku tatauanga i te Pipiria. Na roto i te reira aerenga tatau, kua kite mai au i te au pirianga i rotopu i te au tuanga tukeke o te Pipiria, kare rava au i kite ana i mua atu ana.”​—⁠John.

[Pia i te kapi 17]

NAAU E IKI!

□ Iki e tai tupuanga. E maata te au tua tika tikai e te mataora i roto i te Pipiria. E iki e tai papaanga te reka ra koe, tatau i te reira mei te akamataanga ki te openga.

Tamanakoanga: No tetai au manako akapeea koe e kite maata atu ei i te papaanga, akara i te kapi 292 o te puka Questions Young People Ask​—⁠Answers That Work, Voriumu 2, neneiia e te Au Kite o Iehova.

□ Iki e tai Evangeria. Tatau ia Mataio (te Evangeria tei tata muaia), ia Mareko (te akataka maira i te au tupuanga mataora e manganui), ia Luka (te akakite maira i te manako tikai no runga i te pure e te au vaine), me kore ia Ioane (te akakite maira i te au manako e manganui kare i taikuia i roto i tetai atu au Evangeria).

Tamanakoanga: I mua ake ka tatau ei, akara poto i te au manako no runga i te puka Pipiria e te tangata i tata ai i te reira, kia marama meitaki koe, eaa taua Evangeria ra i tuke ei mei tetai au Evangeria.

□ Iki e tai taramo. Ei akaraanga:

Me ko koe ua e kare oou oa, tatau ia Salamo 142.

Me maromaroa koe no runga i toou tu paruparu, tatau ia Salamo 51.

Me ekoko koe i te puapinga o to te Atua au turanga, tatau ia Salamo 73.

Tamanakoanga: Akono i tetai papaanga no runga i te taramo taau i tatau ana, tei riro ei akamaroiroi anga tikai kia koe.

 [Pia i te kapi 18]

KIMIKIMI MARIE

▪ Akamanako i te akanoonoo anga. Akara i te tuatau, te ngai, e te au turanga no runga i te au irava i te pae mai.

Akaraanga: Tatau ia Ezekiela 14:14. Eaa to Daniela mataiti te taiku anga a Iehova iaia ei akaraanga meitaki i te pae mai ia Noa raua ko Iobu?

Taikuanga: E rima ua rai mataiti i te tataia anga a Ezekiela pene 14 i muri ake te apainaia anga a Daniela ei tuikaa ki Babulonia​—⁠penei e mapu ua aia.

Apinga nui uunaia: E tamariki ua ainei a Daniela i to Iehova kite mai anga i tona tu akarongo mou? Eaa ra te au ikianga meitaki i akameitakiia ai aia? (Daniela 1:​8-17) Akapeea te akaraanga o Daniela i te tauturu anga ia koe kia rave koe i te au ikianga meitaki?

▪ Akara i te au akakiteanga. I tetai au taime, e tai me kore e rua ua tuatua puapinga.

Akaraanga: Akaaite ia Mataio 28:7 kia Mareko 16:7. Eaa a Mareko i kapiti mai ei i te au akakiteanga e kare e roa atu ana ka mama mai a Iesu ki te au pipi e “e Petero”?

Taikuanga: Kare a Mareko i kite mata ana i teia au tupuanga; papu e, na Petero i oronga atu i teia akakiteanga kiaia.

Apinga nui uunaia: Eaa ra a Petero i akapumaanaia ai i te akarongo anga e te inangaro ra a Iesu i te kite akaou iaia? (Mareko 14:​66-72) Akapeea a Iesu i te akapapu anga iaia uaorai ei oa tika tikai no Petero? Akapeea koe i te aru anga ia Iesu e kia riro mai ei oa tika tikai no tetai ke?

▪ Kimikimi anga ke. Akara i te au puka Pipiria no te au akamaramaanga.

Akaraanga: Tatau ia Mataio 2:​7-15. I naea te aronga akara etu i atoro ei ia Iesu?

Taikuanga: Akara i Te Punanga Tiaki o Tianuare-Mati, 2008, kapi 31, neneiia e te Au Kite o Iehova.

Apinga nui uunaia: Akapeea a Iehova i te oronga anga mai i te apinga pae materia no te ngutuare o Iesu ia ratou i Aiphiti? Akapeea te irinaki anga i roto i te Atua i te tauturu anga ia koe kia akakoromaki ua i te au turanga taitaia?​—⁠Mataio 6:​33, 34.