Akapeea te Nga Metua i te Tauturu Anga?

E TAI akaaerenga apii i Marike tei raurau i te au tamariki apii i te apii teitei e: “E akaari i to kotou uaorai inangaro na te tauta maataanga kia tae te ope o to kotou maroiroi.” No te mea kua akakeuia kia itae i ta ratou au akakoroanga, kua tauta maata te au mapu i te rave i te ka rauka i to ratou maroiroi. Kua tata a Madeline Levine, tei taikuia i roto i te atikara i mua akenei e: “I roto i te au apii tere viviki ki mua, te au angaanga tarekareka e manganui a te apii, te akapapa vave anga no te apii teitei me kore no te kaoreti, te aronga tereni anga e te au puapii kite karape tei tutakiia ei tauturu i te tamariki apii i roto i te au mea ravarai kia puapingaia ta ratou apii, e manganui te au tamariki tei kite mai e e maata ua atu ta ratou apii te tuku ra i to ratou oraanga ki roto i te kino.” Ko te au tamariki apii tei roto i taua turanga ra ka kino ratou i te pae kopapa e te pae manako.

Me te manamanata ra koe no runga i te taitaia ta taau tamaiti e aro atura i te apii, e aere koe ki te apii. E tuatua atu ki te au puapii, ki te aronga tauturu, e te au akaaere o te apii. E akakite kia ratou eaa taau e kite ra. E tikaanga toou kia rave koe i te reira.

Te akamaroiroi maira te Pipiria i te au metua kia akara meitaki i te tupuanga o ta ratou tamariki. Kua akakite a Mose ki te au metua i roto i te iti tangata o Iseraela e: “E ka apii tamou tikai koe i te [au ture a te Atua] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.”​—⁠Deuteronomi 6:⁠7.

Te inangaro maataanga i te kite i te apii a taau tamaiti, kare te reira e tamanamanata atura i tona oraanga. Te akaari ra koe ki taau tamaiti e te turuturu aroa ra koe iaia. E e puapinga maata tikai te reira i te akaiti mai anga i te taitaia o taau tamaiti i te apii.

 [Tutu i te kapi 8, 9]

Tuatua no runga i te taitaia maata o taau tamaiti ki tona au puapii e ki te aronga tauturu