Te Manako o te Pipiria

Inangaro Ainei te Atua Kia Maata Taau Moni?

“E ra ou ta te Atua e oronga mai nei kiaku! Ka maata taku moni!”

“Inangaro au kia maata taku moni no te mea te inangaro maira te Atua e te au angera kia maata taku moni.”

“Te oronga maira te Atua i te mana kia tatou kia rauka te apinga nui.”

“Te puapinga nei au no te Puka [te Pipiria].”

TE AKAARI mai nei teia au akakiteanga i te manako o tetai au pupu akonoanga te manako ra e ko te apinga nui pae kopapa e akameitakianga ia no ko mai i te Atua. Te akakitekite aere ra ratou e me rave koe i ta te Atua e inangaro ra ka oronga mai aia i te au mea meitaki i roto i teia oraanga, e pera katoa ka tutaki mai aia ia koe a muri mai. E rekaia ana teia manako i te au ngai ravarai, e kua riro te au puka akamaroiroi anga no runga i te reira ei au puka oko maata. Inara te rotai ra ainei teia “manako no runga i te turanga puapinga” ki te Pipiria?

E tika rai, te inangaro maira Tei Anga ia tatou, ta te Pipiria i kapiki e ko te “Atua mataora,” e kia akono tatou i tetai oraanga mataora e te puapinga. (1 Timoteo 1:11, NW; Salamo 1:​1-3) Pera katoa, ka akameitaki mai aia i te aronga tei akamareka iaia. (Maseli 10:22) Inara no tatou i teia tuatau, e tu ainei te reira akameitakianga kia puapingaia i te pae kopapa? Takataka ua te pauanga me marama tatou e teiea tatou i roto i te aerenga o te tuatau, tei tau ki to te Atua ra akakoroanga.

E Tuatau Ainei Teia Kia Maata te Moni?

I te tuatau i topa, kua akameitaki te Atua ko Iehova i tetai o tona au tavini ki te au apinga nui pae kopapa, ko te pateriareka ko Iobu raua ko te Ariki ko Solomona tetai akaraanga meitaki no te reira. (1 Ariki 10:23; Iobu 42:12) Inara, kare e maata ana te apinga a tetai au tangata te mataku tau ra i te Atua, ko Ioane Papetito raua ko Iesu Karaiti tetai. (Mareko 1:6; Luka 9:58) Eaa ra te tumu? Kia tau ki ta te Pipiria, kua akono te Atua i tona au tavini tei rotai ki tona akakoroanga no ratou i taua taime ra. (Koheleta 3:⁠1) Akapeea taua kaveinga ra e tau ei kia tatou i teia tuatau?

Te akakite maira te totou Pipiria e te noo nei tatou i roto i “te openga o teianei ao,” me kore i te “tuatau openga” o te ao nei. Kua akairoia teia tuatau e te tamaki, te au maki, te onge, te ngaruerue enua, e te kino anga o te taiate tangata​—⁠e au turanga te akakino maata nei i te au tangata ravarai mei te mataiti 1914 mai. (Mataio 24:3; 2 Timoteo 3:​1-5; Luka 21:​10, 11; Apokalupo 6:​3-8) Mei tetai pai rai teianei ao, te vaitata atura i te tomo! I te akamanako anga i teia au tumu manako, ka tau ainei i te akamanako e ka akameitaki mai te Atua i tona au tavini tataki tai ki te au apinga nui pae kopapa, me kore e akakoroanga puapinga ke atu ainei to te Atua no tatou?

Kua akaaite a Iesu Karaiti i to tatou tuatau ki to Noa tuatau. Kua tuatua a Iesu e: “Mei tei te tuatau i muao i te diluvi ra, te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te  araka, Kare rava i kite, e rokoia iora ratou e te diluvi, e ope takiri akera ratou i te mate; koia katoa te aerenga mai o te Tamaiti a te tangata nei.” (Mataio 24:​37-39) Kua akaaite katoa a Iesu i to tatou tuatau ki to Lota tuatau. Ko te au tangata i roto ia Sodoma raua ko Gomora i te pae mai ia Lota te ‘kaikai ra, te inu ra, te oko atura, te oko maira, te tanu ra, e te akatu ra i te are.’ “Kia tae ra ki te rā i akaruke atu ei a Lota ia Sodoma, kua topa maira te ai e te teio no runga i te rangi, ope atura ratou i te mate,” kua tuatua katoa a Iesu e: “Ka pera katoa kia tae ki te rā e akakiteia mai ei te Tamaiti a te tangata.”​—⁠Luka 17:​28-30.

E tika rai e, kare i te mea kino te kaikai anga, te inu anga, te akaipoipo anga, e te oko maira, e te oko atura. Tei runga ra te kino i te akapou anga i te taime i roto i taua au mea ra, e kare rava tatou e akamanako atu ana i te tu rapurapu o te tuatau. No reira e ui kia koe uaorai e, ‘Te rave ra ainei te Atua i tetai mea meitaki no tatou me ka akameitaki mai aia ia tatou ki te au mea tikai te akaki ra i to tatou oraanga ki te au mea te tavarenga ra ia tatou?’ * Kare, ka riro te reira ei takino anga ia tatou. No reira, kare ko te tu ia o te Atua aroa!​—⁠1 Timoteo 6:17; 1 Ioane 4:⁠8.

E Tuatau Akaora Anga i te Tangata!

I teia tuatau kino i roto i te tuatua enua o te tangata, e angaanga rapurapu ta te au tangata o te Atua ka rave. Kua tuatua a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) E akamanako pakari ana te Au Kite o Iehova i taua au tuatua ra. No reira, te akamaroiroi nei ratou i to ratou au tangata tupu kia apii no runga i te Patireia e te au umuumuanga a te Atua no te ora mutu kore.​—⁠Ioane 17:⁠3.

Inara, kare te Atua e tapapa mai ana i tona au tavini akarongo mou kia akangere ia ratou uaorai. Kareka ra, te inangaro maira aia ia ratou kia mareka ua i te au mea e anoanoia ra no te oraanga, kia rauka ia ratou i te akamou i te manako i te tavini anga iaia. (Mataio 6:33) Te ka tupu mai, ka akapapu aia e ka akatupu aia i ta ratou au mea e anoano ra. Te karanga ra a Ebera 13:5 e: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’ ”

Ka akatupu te Atua i taua taputou na roto i tetai tu umere tikai, me akaora mai aia i te “aronga maata rava” o te aronga akamori mou, e tae ua atu ki te openga o teia akatereanga o te au mea nei, e ki roto i te ao ou ponuiaau e te turanga puapinga tikai. (Apokalupo 7:​9, 14) Kua tuatua a Iesu e: “I aere mai nei ra au kia rauka to ratou ora [tana au pipi akarongo mou], e kia maata ua atu te ora.” (Ioane 10:10) Te taiku ra taua ‘ora maata ra,’ kare ki tetai oraanga e maata te apinga i te pae kopapa i teianei, inara ki tetai oraanga ope kore i roto i te Parataito i raro ake i te tutaraanga o te Patireia o te Atua.​—⁠Luka 23:⁠43.

Auraka e ariki i te au mea puapinga kore ua na te akavareia anga e te manako no te turanga puapinga, te tikaanga, e manako tavarenga ua. Mari ra, e akarongo ki ta Iesu au tuatua aroa e te rapurapu e: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra.”​—⁠Luka 21:​34, 35.

[Tataanga Rikiriki i Raro]

I MANAKO ANA AINEI KOE?

▪ No teaa ra te tuatau tei akatakaia i teianei?​—⁠Mataio 24:⁠14.

▪ Kua akaaite a Iesu i to tatou tuatau ki toai ma tuatau i roto i te Pipiria?​—⁠Mataio 24:​37-39; Luka 17:​28-30.

▪ Eaa ta tatou ka kopae me ka inangaro tatou kia rauka mai te ora mutu kore?​—⁠Luka 21:⁠34.

[Tataanga i te kapi 11]

Te manako no te turanga puapinga, te tikaanga, e manako tavarenga ua