Te Manako o te Pipiria

Ka Mataku Ainei Koe i Tei Mate?

Te irinaki ra te au mema o te kopu tangata o Annang i Naiteria e me kare tei mate i tanuia ma te akapaapaa anga tau e te akangateitei anga, ka akatupu to ratou au tupapaku i te manamanata​—⁠pera katoa te mate​—⁠ki te au mema o te ngutuare. Te irinaki katoa ra te aronga Tinito e me kare te au peu tanuanga e aruia, ka takino te tupapaku o te aronga tei mate e ka tamate katoa i tetai ke.

E MEA matauia i roto i te au peu e manganui i teianei ao te irinakianga e me mate tetai, ka akaruke tetai apinga i te kopapa​—⁠te vaerua, te tupapaku. Te irinaki katoa ra te manganui e ka tamanamanata mai teia vaerua i te au angaanga a te au mema o te ngutuare me kore a te au oa.

Inara, e apinga ora ainei tetai te ora ra rai a muri ake me mate tetai tangata? Ka rauka ainei i taua “apinga” ra i te takino mai i te aronga e ora ra? Eaa te manako o te Pipiria?

Te Kite ra Ainei Tei Mate?

Te akakite maira te Pipiria e “kare ra a te aronga i mate ra e tuatua i kitea.” (Koheleta 9:⁠5) No runga i te tangata mua, ko Adamu, te akamarama maira te Tuatua a te Atua e: “E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora.”​—⁠Genese 2:⁠7.

Ka akara ana e kua angaia a Adamu ei tangata ora. Kia tau ki ta te Pipiria, kare i orongaia ana kia Adamu tetai vaerua te ka ora ua atu i vao ake i tona kopapa. No reira te ara anga a Adamu, kua mate aia. Kua riro mai aia ei “tangata mate.” (Numero 6:⁠6) Kua tuatua katoa te Pipiria e: “Ko te vaerua e rave i te ara ra, ko te ka mate ïa.” (Ezekiela 18:⁠4) Kua tu pouroa tatou i te ara, me kore kua apa, mei te tangata mua rai, ko Adamu. No reira me mate tatou, ka mate katoa te vaerua.​—⁠Roma 5:⁠12.

Te akataka mai anga te Pipiria i te turanga o tei mate, kare te reira e taangaanga ana i te au tuatua marama kore, inara te taangaanga ra i te au tuatua ka marama tatou, mei “te moe mate ra.” (Salamo 13:⁠3) Kua tuatua ana a Iesu no runga i tetai tamaine e 12 ona mataiti e: “Kare aia i mate, kua moe ra.” “Kua taitoito maira [te au tangata], kua kite oki ratou e kua mate aia.” Inara, te akamarama maira te Pipiria e kua akaara mai a Iesu iaia mei te mate.​—⁠Luka 8:​51-54.

Aiteite katoa te reira ki to Lazaro mate anga. Kua akakite a Iesu ki tana au pipi e te aere ra aia i te atoro ia Lazaro i te “akaara iaia.” Kare te au pipi i marama eaa te aiteanga o ta Iesu tuatua, no reira “kua akakite pu aturā Iesu kia ratou, Kua mate takiri a Lazaro.” Kua tuatua katoa te apotetoro ko Paulo no runga i ‘te aronga i moe’ e kua karanga e i to te Atua tuatau tau, ka akaora akaouia mai ratou.​—⁠Ioane 11:​11-14; 1 Tesalonia 4:​13-15.

Te mea puapinga maata, kare rava e ngai i roto i te Pipiria e apii ra e ka ora ua atu te vaerua i muri ake me mate tetai tangata. No reira kare e tumu anga kia mataku i tei mate. Koai i reira tei akatupu i te manako e ka ora atu tetai tuanga o te tangata i muri ake i te mate? Naai e akatupu ra i te mataku e ka takino te mate i te aronga e ora ra?

Te Pikikaa​—⁠Te Akavareanga

Na te au akonoanga pikikaa e akamaroiroi ana i te manako e me mate tetai tangata kare aia i mate tikai. Mei te akamataanga o te tuatua enua o te tangata, kua ariki maataia i te ao katoa te apiianga e ka ora ua atu te vaerua. Tei tupu mai, te mate anga tetai au tutara​—⁠mei ia Pharao rai o Aiphiti i taito​—⁠kua tamateia to ratou au tavini kia rauka ia ratou i te tavini ua atu i to ratou tutara i roto i te oraanga a muri atu.

E manganui te au tangata tei tamanamanataia no ta ratou i apiiia kia irinaki no runga i te au  vaerua o te aronga tei mate. Kua irinaki tikai ratou e ko taua tamanamanata anga, no ko mai i te au vaerua o te kopu tangata i mate me kore no ko mai i tetai ke, kare i mataora ana ia ratou. Inara, mei ta te au Tuatua Tapu e akaari maira, kare te reira i te mea tika. Ko te au vaerua ririnui kitea koreia tei tapaia ko te au temoni, ko ratou teia e akatupu nei i te au takino anga, e te mataora ra ratou i te tamanamanata anga e te tamatakutaku anga i te tangata.​—⁠Luka 9:​37-43; Ephesia 6:​11, 12.

Te tuatua ra te au Tuatua Tapu ia Satani e ko te “metua oki no te pikikaa,” ko “tei akatutu angela katoa iaia uaorai no te mārama.” Koia e tana au temoni “tei pikikaa i to te ao katoatoa nei.” (Ioane 8:44; 2 Korinetia 11:14; Apokalupo 12:⁠9) Ko te tikaanga, ko Satani te akatupu nei i te pikikaa e ka ora ua atu te vaerua e ka takino i te aronga e ora ra.

Inara, te paruruia ra te aronga irinaki i te Pipiria mei te akavareanga a taua au pikikaa ra. Kua kite mai ratou i te tikaanga no runga i ta Satani au tautaanga i te akavare i te tangata kia irinaki e, ka rauka i tei mate i te komunikeiti ki te aronga te ora ra. Ko te tikaanga, mei ta te Pipiria e tuatua ra: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea.” (Koheleta 9:⁠5) E tika rai, tei roto i te Tuatua a te Atua te au tuatua mou te ka akamatara mai ia tatou mei te au pikikaa no runga i te turanga o tei mate!​—⁠Ioane 8:⁠32.

I MANAKO ANA AINEI KOE?

▪ Te kite ra ainei tei mate i tetai apinga ?​—⁠Koheleta 9:⁠5.

▪ Eaa te tumu no te irinakianga tei matauia e te ora ra tetai tuanga o te kopapa tangata i muri ake i te mate?​—⁠Ioane 8:⁠44.

▪ Ka aere tatou kiea e rauka ai te tuatua mou no runga i te turanga o tei mate?​—⁠Ioane 8:32; 17:⁠17.

[Tataanga i te kapi 23]

Te au mea vaerua kino, kare ko te aronga tei mate, te mataora ra i te tamanamanata i te au tangata