“Kia Vai Matakite Ua!”

Uruoaanga Tapere a te Au Kite o Iehova

▪ Tauatini ua atu o teia au uruoaanga e toru ra, tei akapapaia kia akamata i te openga epetoma o Tiurai 31 kia Aukute 2, te ka raveia i te au marama e tu mai nei i te ao katoa. Ka akamata te au tuanga i te au ra tataki tai i te ora 9:20 i te popongi ma tetai porokaramu akatangianga imene. Te tumu tuatua maata a te Varaire, akatumuia ki runga ia Mataio 24:44, “Kia Vai Teateamamao rai Kotou.” I muri ake i ta te tiamana akakiteanga, ka aru mai te nga tuatua “Ka Tauturu te Au Uruoaanga ia Tatou kia Vai Matakite Ua” ko “Iehova​—⁠Te Atua no te ‘Au Atianga e te Au Tuatau.’” E oti, ka uriuri manako te tuatua kapipiti “Aru i te Aronga Akarongo Mou Tei Vai Matakite ua Ana” akapeea a Noa, Mose, e Ieremia i te rave anga i te reira. Ka taopenga te porokaramu i te popongi ki te tuatua puapinga maata, “Tauturu a Iehova ia Tatou ‘Kia Vai Matakite Ua.’”

Te tuanga mua a te avatea aiai Varaire ko te “Au Pauanga ki te Au Uianga no Runga i te ‘Tuatau Openga,’” aru mai ko te au tuatuaanga “‘Kare Kotou i Kite i te Rā, e te Ora’​—⁠No Teaa Ra?” e “Kia Kite e te Vaitata Maira te Openga.” I muri ake ko te tuatua kapipiti e ono tuanga “‘Kia Ara Ua’ ei Ngutuare Tangata Kerititiano!” Te nga tuanga mua e toru no runga tikai i te au tane, te au vaine, e te au tamariki. Te tuanga openga e toru, “Kia Meitaki ua To Mata,” “Kia Aruaru ua rai i te Au Akakoroanga Pae Vaerua,” e kia “Rave Tamou i te Akamorianga a te Ngutuare i te Aiai.” Ka taopenga te tuanga o te avatea aiai ki te tuatua “Au Irava te ka Akakeu ia Tatou ‘Kia Matakite.’”

Te tumu tuatua maata no te Maanakai, “E Akono Meitaki, e Matakite,” akatumuia ki runga ia 1 Petero 5:8. Te tuatua kapipiti e rima tuanga, “Tauturu i te Au Tangata kia Ara ua mei te Moe,” ka kapiti mai i te au tuanga “Ta Tatou Angaanga Orometua​—⁠Eaa i Puapinga Ai?,” “Kia Akamanako ua i ta Tatou Angaanga Orometua,” “Akamanako i te Akameitaki Mai i Toou Tu Karape,” “Auraka e Akangaropoina i Toou Au Kopu Tangata!,” e “Akono Tamou i Toou Tu Rapurapu!” I muri ake i te au tuatua e “Aru i to Iesu Akaraanga no te Tu Matakite” e kia “Matakite, ma te Pure,” ka taopenga te tuanga ki tetai tuatua no runga i te papetito, e i muri ake ka orongaia te atianga kia papetitoia te aronga tei tau.

Te porokaramu a te avatea aiai Maanakai ka oronga mai i te tuatua kapipiti e rima tuanga, “Kia Matakite i te Au Ereere a Satani!”​—⁠“Te Ai,” “Te Vaarua,” “Te Ereere,” “Te Ereere te ka Akapokia,” e “Te Ereere te ka Akaparuparu.” Ka aru mai tetai nuku puapinga, “E Mate ua Atu Au, Kare rai Au e Pa i te Tuatua-Tika Naku Ra.” Ka taopenga te au tuanga o te ra ki te au tuatua “Auraka e Akara ki ‘te Au Mea i Muri’” e te “Apii i te Tu Matakite mei te Au Apotetoro a Iesu.”

Te tumu tuatua maata a te Tapati, akatumuia ki runga ia Habakuka 2:3, “Ka Tapapa ua Atu Rai . . . Kare e Tavarevare.” I muri ake i tetai tuatua no runga i te tumu tuatua maata o taua ra ra, te tuatua kapipiti “Akara ua rai ki Runga i te Au Mea Kitea Koreia” ka uriuri manakoia te au tumu manako ka aru mai: “Nga Tara Okotai Ngauru . . . ka Akaviivii Ïa i Taua Vaine Akaturi Ra,” “Kia Kite te Au Pa Enua ia Iehova,” “Ka Akapueurikirikiia ‘Taua Au Basileia Katoa Ra,’” “Ko te Tiaporo ka Tapekaia kia Okotai Tausani i te Mataiti,” “Ka Patu Ratou i te Au Are e ka Tanu i te Au Kainga Vine,” “Te Luko e te Punua Mamoe Okotai rai Kai Katoa Anga,” “Na te Atua e Orei i to Ratou Roi-Mata Katoa,” “Te Aronga Katoa i Roto i te Au Menema Akamaara Anga . . . ka Aere Mai ki Vao (NW),” e “Kia Riro ko te Atua i Rungao i te ‘Au Mea Katoa i te Au Ngai Ravarai.’” Te akoanga ki te papuriki, “Akapeea Koe e Ora ai i te Openga o Teianei Ao?,” e akaoti atu i te tuanga popongi.

Te nuku puapinga no te avatea aiai a te Tapati e nuku no runga i teia tuatau “Ko To Teina nei oki i Mate Ana, e kua Ora Mai,” akatumuia ki runga i ta Iesu parapore no te tamaiti kaimoumou apinga. Aru mai i te Apii Punanga Tiaki o te epetoma, ka taopenga te uruoaanga ma te tuatua e “Ka Tapapa Atu rai, Akara i te Ra o Iehova!.”

Paraniia i teianei kia tae mai koe. Te kimianga i te ngai vaitata mai kia koe, atoroia atu te Are Patireia Uipaanga o te Au Kite o Iehova i toou ngai me kore tata mai ki te aronga nenei o teia makatini. Tei roto i te itiu o Te Punanga Tiaki o Aperira-Tiunu, te tokorua o ta tatou makatini, te papaanga o te au ngai uruoaanga katoatoa i roto i te au enua o te Patipika Tonga, kapiti mai te uruoaanga pa enua.