E Mea Maaniia Ainei?

Rau Riri Vai Kare te Vai e Mou ki Runga

▪ E au kapu maani ua ainei te ka rauka i te tama iaia uaorai? E au maramarama ainei kare te vai e mou ana ki runga? E au matini rikiriki ua ainei te angaanga ua ra e kare te vai e o atu ki roto? Te karanga ra te au taineti e ko teia tetai au mea puapinga te ka rauka mai ia tatou, me kiteaia mai e tatou te au mea muna o te rau riri vai.

Akamanako Ana: Kua tapokiia a runga i te rau riri vai e te au pukupuku rikiriki, e kua tapokiia atu te reira ki te au tapou rikiriki kanapanapa. Ko te au topata vai tei topa ki runga i te rau te noo ua ra ki rungao i teia au mea, kia kore te vai e mou ki runga. I mua ake ka topa atu ei te vai ki runga i te rau, no te arara o te rau, kare te vai e mou ki runga i te rau. Eaa te ka tupu mai? Ka vai maro ua e ka ma ua te rau riri vai, no te mea kua tamaia te repo e te ungaunga repo na roto i te topata vai.

Te inangaro ra te au taineti i te maani i te au apinga te aru ra ki te au tu o te rau riri vai kare e mou te vai ki runga. Ko te au matini rikiriki, te ka takinoia e te vai, ka puapinga katoaia mei tetai apinga maaniia tei aiteite atu ki te rau riri vai. “Te taangaanga puapinga anga i te reira kare e ope ana,” i ripoti mai ei te Science Daily.

Eaa toou manako? E mea tupu ua mai ainei te rau riri vai? Me kore, e mea maaniia ainei?