Taitaia Tikai te au Tamariki Apii

KO JENNIFER e 17 ona mataiti, koia tetai i roto i tona pupu apii e teitei tana maka. E piri ana aia ki roto i te au angaanga tarekareka e manganui a te apii, e kua rauka iaia te akangateitei anga a tona puapii e te aronga oronga tauturu i te apii. Inara i te mataiti i mua ake ka karatuati ei aia, kua akamata tona upoko i te mamae kino e te anininini putuputu. Kua manako aia e no te au ora e akapou ana aia i te akamanako oonu anga i tana au apii e te rava kore o te moe, no reira aia i makiia ai.

E manganui te aiteite ra to ratou manamanata ki to Jennifer. I te akaraanga, te maata ua atura te numero o te au tamariki apii te na roto ra i te taitaia maata i te apii, e te kimi ra tetai pae i te tauturu a te au taote rapakau maki manako. Tei tupu mai, kua akanoo tetai pupu puapii e te aronga angaanga i te apii i Marike i tetai porokaramu i te tauturu i te akaiti mai i te turanga taitaia maata i te apii. Kua tapaia te porokaramu, Puapingaia te Tuanga o te Akaaoanga.

Me e tamaiti apii koe, penei mei ia Jennifer rai, te tauta ra koe i te akakoromaki i te tu taitaia. Me e metua koe, ka kite atu koe i te taomianga putuputu ta taau tamaiti me kore tamaine e aro atura kia puapingaia i te apii. E tumuanga meitaki ainei tetai no te aratakianga ta te au tamariki e ta to ratou au metua ka rauka i te kimi atu no te tauturu?