E Pou i Runga i te Tai

▪ I kite ana koe i tetai uriuri tu moana? Kua tupu mai tetai i te ra 25 o Titema mataiti 2005 i vao ake i te pae tai o Tahiti. Kua pou rai mei tetai 30 miniti te roa i tetai uriuri tu moana i te taviriviri anga i rotopu i te tai e te rangi. E oti kua taui marie te reira ki te kara teatea e ngaro ua atu.

E kapikiia ana te au uriuri tu moana i tetai taime e e puaioio, inara e paruparu ake to ratou ririnui i to te puaioio. Maataanga o te taime e taviriviri ana ratou mei tetai tai ngauru miniti te roa, noatu e taviriviri ana tetai pae e tai ora. No te mea e tupu ana ratou i te moana, no reira kare ratou e kite vaveia ana. E ngata i te aronga apii reva i te marama tikai i to ratou tu. Tei tau ki te au ripoti, e akatupu ana ratou i te turituri maata, tei aiteite ki tetai rerue tari kako.

Te akataka anga i tona manako ngakau taitaia, kua tata tetai tangata tata taramo Pipiria i te tuatau taito e: “Te kapiki nei tetai moana ki tetai moana i te aruru anga o to au vai rere.” (Salamo 42:⁠7) Te karanga ra tetai au tikitinari e ko te tuatua Epera tei uriia “au vai rere” te taiku ra ki taua uriuri tu moana ra. Me koia ia, penei te akakite maira te au manako ngakau o te tata taramo i teia au tupuanga umere tikai. Kua karanga aia e, “i taitaiaʼi” tona ngakau e kua “ngarepurepu” a roto iaia. Inara, kua akapumaanaia aia e tona Atua. “E irinaki i te Atua,” i tuatua ei aia kiaia uaorai, “ka akameitaki rai au iaia, ei ora ïa no toku nei mata, e ei Atua noku.”​—⁠Salamo 42:⁠11.

Mei te tata taramo rai, penei e na roto ana tatou i te au turanga taitaia tei aiteite ki te tu puaioio i runga i te tai. Me irinaki ra tatou i te Atua, ka riro aia ei ora mekameka no tatou.