Ka Tutungiia Ainei te au Tangata Kino i Roto ia Era?
Te Manako o te Pipiria
Ka Tutungiia Ainei te au Tangata Kino i Roto ia Era?
KUA irinaki tikai a Gertrude, e vaine orometua Pentecostal, ki runga i te ai era. Te manako tikai e kare e ngai mei te reira rai, tuke rai ki tana e irinaki ra e ko te mea tika. Kua tamanako aia e me kare e ai era, kare e utunga no te au mea kino ravarai. Kua irinaki pakari rai a Gertrude ki runga i tana e irinaki ra. Kua karanga aia e, “Kare au e manako e ka inangaro au i te akamori i te Atua me kare e ai era no te aronga kino.”
Ka tutungiia ainei te au tangata kino i roto ia era, mei ta te au akonoanga e manganui e apii ra? Me kare ra, eaa te utunga te ka tukunaia kia ratou?
Te Utunga Mua a te Atua
Kia tau ki ta te Pipiria, kua anga te Atua i nga tangata mua ei nga tangata apa kore. (Genese 1:27; Deuteronomi 32:4) Kua tuku aia ia raua ki roto i tetai aua parataito, e kua oronga kia raua te atianga kia ora e tuatau ua atu. Inara, e tai ture tei orongaia ki te nga tangata mua, ko Adamu raua ko Eva. Kua akamatakite te Atua kia raua e: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.”—Genese 2:16, 17.
Te mea mii ra, kare i rauka ana i to tatou nga metua mua i te aru i taua timataanga mama ua no te tu irinaki mou e te akarongo. Kua tau rai i Tei Anga ra kia akautunga ia raua ki te mate. “E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.”—Genese 3:19.
Naringa e ka o atu a Adamu raua ko Eva ki roto i te kino no te tutungiia anga i roto ia era, Ezekiela 18:4. *
kare ainei e ka akamatakite atu te Atua ia raua no runga i taua utunga ra? Ko te tika ra, kare aia i taiku mai ana i tetai apinga no runga i te mamae te ka tupu i muri ake i te mate. Akapeea raua e mamae ei? Kare o raua vaerua mate kore te ka ora ua atu i muri ake i te mate. Te akataka maira te Pipiria i teia e: “Ko te vaerua e rave i te ara ra, ko te ka mate ïa.”—Ko Tei Oronga mai i te ora, kua kite Tei Anga mai ia tatou i te au mea ravarai no runga i te ora e te mate. I roto i tana Tuatua te akakite maira aia kia tatou e “kare ra a te aronga i mate ra e tuatua i kitea.” (Koheleta 9:5) No reira rai a Adamu raua ko Eva i kore ei i mamae i roto i tetai ai era i muri ake i to raua mate anga. Kua oki raua ki te one pueu e kare e ora akaou mai. ‘Kare e tuatua i kiteaia’ e raua.
Te Mamae ra Ainei Tatou i Muri Ake i te Mate Anga?
Te karanga ra te Pipiria i roto ia Roma 5:12 e: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate.” No reira, ka tau ainei i te irinaki e te mamae ra te au tangata i roto i te ai era no ta ratou au ara, i te mea e kua riro mai a Adamu ei one pueu, tei apai mai i te mate ki runga i te au tangata ravarai i muri ake i te mate anga?—1 Korinetia 15:22.
Tei raro ake tatou katoatoa i taua ture ra mei ia Adamu rai. “E utunga te mate no te ara.” Tei maata atu, me mate tetai tangata, ‘kua matara aia i te kino nei.’ (Roma 6:7, 23) Me mate te tangata meitaki e te tangata kino e kare tetai tangata e mamae ana i muri ake i te mate anga, teiea i reira te tu tau o te Atua?
Te tu Tau o te Atua
Kare ta te Atua akakoroanga no te au tangata akarongo i taui mei te taime mai i anga ai aia i nga tangata mua e te akaue anga ia raua kia anau tamariki e kia akono i te enua. (Genese 1:28) Te vai nei rai teia akakoroanga nona, iaia e akakite maira i muri mai e: “Ka riro te enua no te aronga tuatua-tika, ka noo tamou rai ratou i reira.”—Salamo 37:29.
E akara ana, ka noo te aronga tuatua tika ki runga i teia enua. E e oraanga kopapa apa kore e te mataora to ratou. “Ka manuia” to te Atua akakoroanga mua me akakiia te enua ki te au iti tangata tuatua tika. Ka tupu mai teia me mono aia i teia akatereanga o te au mea kino nei ki tetai ao ou.—Isaia 55:11; Daniela 2:44; Apokalupo 21:4.
Te au tangata e pirioni ua atu tei mate no tei kore i marama i te au umuumuanga a te Atua, ka puapingaia mei te tuakaouanga e ka rauka mai te ikuikuanga no te ora i roto i te ao ou o te Atua. (Isaia 11:9; Ioane 5:28, 29) Tetai tua ra, ko tetai ua atu tei patoi i te au ture a te Atua ka akautungaia ki “te rua o te mate.” E mate teia kare rava e tu akaou mai.—Apokalupo 21:8; Ieremia 51:57.
Te taka meitaki ra e, ei Atua aroa, kare a Iehova e tamamae i te au tangata i roto i te ai era. (1 Ioane 4:8) Kare katoa aia e akatika ua i te tu kino e tuatau ua atu. No reira, te akapapu maira a Salamo 145:20 kia tatou e “te tiaki nei a Iehova i te aronga katoa i inangaro iaia; kareka te aronga kino katoa ra, ka akapouia ïa e ia.” Kare ainei te reira i te tu aroa e te tu tau?
[Tataanga Rikiriki i Raro]
^ para. 8 I roto i te Pipiria, te aiteanga o te “vaerua” ko te tangata katoa—kare ko tetai apinga tei takake mai mei te kopapa. Te karanga ra a Genese 2:7 e: “E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora.” Kare i orongaia kia Adamu tetai vaerua takake mei tona kopapa. Inara e tangata ora a Adamu.
I MANAKO ANA AINEI KOE?
▪ E vaerua mate kore ainei to tatou?—Ezekiela 18:4.
▪ Eaa te turanga o te aronga tei mate?—Koheleta 9:5.
▪ Akapeea te Atua me akautunga i te aronga kino?—Salamo 145:20.
[Tataanga i te kapi 11]
“Kare ra a te aronga i mate ra e tuatua i kitea.”—Koheleta 9:5
[Akameitakianga no te Tutu i te kapi 10]
Photo: www.comstock.com