Manakoia ei Tangata Puapinga Kore

“Toku mataiti mua i te apii a te tamariki rikiriki i Paniora, kapiki ingoa kino mai ana tetai au tamariki i roto i toku pupu iaku, no te akaraanga poto ake ia ratou. E aue ua ana au i te au ra me oki au ki te kainga.” ​—⁠Jennifer, tamaine na nga metua tuitarere Piripine.

“Toku neke anga ki tetai apii ou, kapiki ingoa kino mai ana te au tamariki papaa i te apii iaku. Kua kite au e te akariri maira ratou iaku kia tata atu kia ratou. Kua rauka ra iaku i te akamaru i toku riri​—⁠i roto ra iaku, mamae tikai au e te manako ra e kare au e inangaroia ana.”​—⁠Timothy, tangata Aperika-Marike.

“Tae anga toku mataiti ki te itu, kua tupu te ta i rotopu i te au tangata Igbo e te au tangata Hausa i Naiteria. Kua riri au, e kua akamata i te tatiaeae i tetai tamaiti Hausa i roto i toku pupu, noatu e e oa aia noku.” ​—⁠John, mema no te pupu tangata eteniki Igbo.

“Ia maua ko toku patana mitinari e tuatua ra i te karere Pipiria ki to maua tangata tupu, aru mai tetai au tamariki ia maua tei akamaroiroiia e te orometua i reira, kia pepei ia maua ki te toka. Inangaro te orometua kia akaruke maua i te taoni.”​—⁠Olga.

NA ROTO ana koe i teia tu akangateitei koreia no te tu akavaavaa tau kore, tei akatumuia ki runga i te manako papakitai? Penei no toou kara pakiri, taau akonoanga, toou turanga pae moni, toou tu ei tamaine me kore ei tamaroa, e no toou mataiti. Te aronga e akavaavaa putuputuia ana e mataku ana i te au takinga kinoanga ka tupu mai. Penei ka makiia ratou no te taitaia, me aere ratou na te pae i te pupu tangata, me aere ki te toa, me neke ki tetai apii ou, me kore me aere ki tetai akaputuputu anga tamataora.

Kapiti mai, kare e rauka ana i te aronga e akono papakitaiia ra e te akavaavaaia ra tetai ngai angaanga, me kore kare e orongaia ana te tu rapakauanga meitaki, tetai apiianga kare e meitaki, e e iti ua to ratou tikaanga ki te au apinga meitaki tei tau na te katoatoa, e te au tikaanga no te pae ture. Me akatikaia e te kavamani, ka akatupu te tu akavaavaa i te au kino rikarika mei te takore anga pupu tangata eteniki. Tei roto i te puka Pipiria o Esetera tetai akaraanga taito no tetai tauta anga i te takore i tetai pupu tangata. Akara i te tuanga makitakita e te papakitai.​—⁠Esetera 3:​5, 6.

Ka tupu ua rai te manako papakitai kino, noatu e ture tetai te patoi ra i te tu akavaavaa. Kua karanga tetai vaine Komitiona Teitei Taokotaianga Enua no te Au Tikaanga Tangata o mua ana e: “Ono ngauru mataiti i muri ake i te akatupuia anga te Akakiteanga a te Ao Katoa no te Au Tikaanga Tangata . . . , kare rai te au kaveinga no te turanga aiteite, e te tu akavaavaa kore, i akatupuia ake ki te au tangata ravarai i te ao e pini ua ake.” E turanga manamanata tikai teia no te mea te maata ua atura te au manuiri e te au tuitarere, tei taui maata tikai i te numero tangata o te au enua e manganui.

No reira, e moemoea ua ainei tetai taiate papakitai kore? Me kore ka rauka ainei i te autu atu i te papakitai e te akavaavaa? Ka pau mai te au atikara e aru mai nei i teia nga uianga.