Akapeea te Noo Kapiti Anga i Mua Ake ka Akaipoipo Ei?
Te Manako o te Pipiria
Akapeea te Noo Kapiti Anga i Mua Ake ka Akaipoipo Ei?
KA OKO ainei koe i tetai pereue me kore i tetai pona i mua ake ka taru ei koe i te reira? Kare. No te mea, me kite ake koe e kare te kakau e o meitaki ana, kua kaimoumou koe i toou taime e taau moni.
E manganui te au tangata e manako akapera ana no runga i te akaipoipo. Kua manako ratou e e meitaki atu no tetai tangata e tetai vaine i te noo kapiti i mua ake ka rave ei i tetai papauanga ei tane e te vaine. ‘Me kare e puapingaia,’ i karanga ai ratou, ‘ka rauka ua i tetai tangata e tetai vaine i te akaruke ma te kore e o atu ki roto i te tu ngata e te au ravenga ka pou te moni no te kopaeanga.’
Penei ko tetai aronga tei manako i te reira kua kite mai i tetai oa akaipoipo e akakoromaki ua ra i tetai pirianga takinokino. Me kore kua kite ana ratou i tetai akaipoipo kare e aroa i roto. Tei tupu mai, kua manako mai ratou e e meitaki atu i te noo kapiti ua.
Eaa ra te manako o te Pipiria no runga i teia? E pau ei i te reira, ka anoanoia tatou kia akamanako na mua eaa ta te Tuatua a te Atua e tuatua ra no runga i te akanoonooanga o te akaipoipo.
“Kopapa Okotai”
Te turuturu ra te Pipiria i te manako akangateitei no te akaipoipo, e kare teia i te mea poitirere no te mea kua akamanaia e kua akanooia mai te akanoonooanga e te Atua ko Iehova. (Genese 2:21-24) Mei te akamataanga mai, kua akakoro a Iehova e na roto i te akaipoipo ka riro mai te tane e te vaine ei “kopapa okotai.” (Genese 2:24) I muri ake i te taikuanga i te irava i roto i te Pipiria te ngai i akakiteia mai ei te reira, kua tuatua a Iesu e: “E ta te Atua i topiri ra, auraka te tangata e akataka ke atu.”—Mataio 19:6.
E tika rai, ko tetai pae tei akaipoipo ka kopae i muri mai. * Inara, me tupu teia, kare e te ngere ra tetai apinga i roto i te akanoonooanga o te akaipoipo; inara, no te kare i rauka i tetai me kore i nga tokorua i te akono i ta raua tia no runga i te akaipoipo.
Ei akatutuanga: Penei e motoka to te tane e te vaine, inara kare raua e aru ana i te au ikuikuanga kia tau ki ta te aronga maani motoka e akakite maira. Me kino mai te motoka, koai tei akaapaia? Ko te aronga tei maani i te motoka me ko te aronga no ratou te motoka kare i akono putuputu ana i te reira?
Te tau katoa ra te reira kaveinga ki te akaipoipo. Me akono tetai tane e te vaine i to raua pirianga e te tauta ra i te akatikatika i to raua manamanata na te taangaanga anga i te au kaveinga
Pipiria, kare i reira te kopaeanga e tupu mai. Ka tupu mai te manako tinamou i roto i te akaipoipo no te mea kua raveia tetai papauanga ki tetai e tetai. Kua riro mai te akaipoipo ei tumuanga no tetai pirianga aroa.“Kia Kopae Kotou i te Moeaana”
Penei te manako ra tetai pae e: ‘Eaa ka kore ei e noo kapiti ua na mua? Kare ainei e ko te tamata anga i te noo kapiti i mua ake ka rave ei i tetai papauanga te akaari ra rai i te tu tapu no te akaipoipo?’
Te taka ua ra te pauanga a te Pipiria. Kua tata a Paulo e: “Kia kopae kotou i te moeaana.” (1 Tesalonia 4:3, NW) Te taiku ra te tuatua “moeaana” ki te au pirianga ainga ravarai i vao ake i te akaipoipo. Te kapiti maira te reira i te ainga i rotopu i nga tokorua e noo kapiti ra, noatu e te manako ra raua i te akaipoipo. Kia tau ki ta te Pipiria, e mea tarevake no tetai nga tokorua i te noo kapiti—noatu e te manako ra raua i te akaipoipo a muri ake.
Kua taito ainei te manako o te Pipiria? Te manako ra tetai pae e ae. No te mea, i roto i te au enua e manganui, te noo kapiti anga—me te manako ra e ka akaipoipo me kore kare e akaipoipo—e mea matauia i te raveia. Inara e akamanako ana i te au tupuanga. Kua kite ainei te aronga te noo kapiti ra i te taviri e puapingaia ai te ngutuare? Mataora atu ainei ratou i te au tokorua tei akaipoipo? Ko te nga tokorua e noo kapiti ana i mua ake ka akaipoipo ei, ka vai tiratiratu ua atu ainei raua i muri ake i te akaipoipoanga? Te akakite maira te au apiianga e kare. E tika rai, ko te au tokorua akaipoipo tei noo kapiti ana i mua atu ana, kua kite mai e e maata atu te au manamanata i roto i te akaipoipo e kua taopenga mai ki te kopaeanga.
Te tuatua ra tetai aronga kite e kua tarevake taua apiianga ra. “Ko te au tangata tei iki i te akaipoipo kare i [noo kapiti ana] na mua e tuke rai to ratou manako ki to te aronga tei iki i te [noo kapiti] na mua,” i tata ei tetai vaine apii manako. Kua karanga aia e ko te noo kapiti anga kare ko te ravenga puapinga ia; ko te mea puapinga ra ko te “akaperepere anga i te turanga akaipoipo.”
Noatu e e tika te reira, te akakite maira te reira i te puapinga i te taangaanga anga i te manako o te Atua no runga i te akaipoipo. Te karanga ra te Pipiria e: “Kia vai te akaipoipoanga ei mea ngateitei i rotopu i te katoatoa.” (Ebera 13:4, NW) Me tia tetai tangata e tetai vaine kia vai ei kopapa okotai e kia akaari i te akangateitei anga no te akanoonooanga o te akaipoipo, e pirianga mou to raua kare e rauka i te tataraia.—Koheleta 4:12.
No reira i te akamanako akaou anga i te tuatua akamataanga, e mea tau rai kia aao i te pereue me kore i te pona i mua ake ka oko ei i te reira. Inara, te aiteanga o te reira auraka e noo kapiti. Mari ra, kia kite meitaki tikai koe i te tangata taau e manako ra ei tokorua akaipoipo noou. Ko teia takainga puapinga tei akangaropoinaia i te au taime ravarai, ko tetai ia o te au taviri e manganui e puapinga ai te ngutuare.
[Tataanga Rikiriki i Raro]
^ para. 9 Te akatika ra te Pipiria i te kopaeanga e te akaipoipo akaou me kua rave tetai tokorua i te pirianga ainga i vao ake i te akaipoipo.—Mataio 19:9.
I MANAKO ANA AINEI KOE?
▪ Eaa ra te Pipiria i kotinga ai i te pirianga ainga ki te au tokorua akaipoipo? —Salamo 84:11; 1 Korinetia 6:18.
▪ Eaa te au tu taau ka akara atu i roto i tetai tokorua?—Ruta 1:16, 17; Maseli 31:10-31.
[Pia i te kapi 29]
“TE ARA RA I TONA UAORAI KOPAPA”
Te akakite ra te Pipiria e: “Ko te tangata te rave ua ra i te moeaana te ara ra i tona uaorai kopapa.” (1 Korinetia 6:18, NW) I roto i te au ngauru mataiti i topa akenei, kua akatupuia te tikaanga o taua au tuatua ra no te au mirioni ua atu tangata tei mate mei te maki AIDS e tetai atu au maki piri anga ainga. Inara kare ko te reira ua. Kua akakite mai te au apiianga e te tupu maata ra te manako taitaia e te tauta anga i te tamate iaia uaorai i rotopu i te au mapu te manako maata ra no runga i te ainga. Ka taki katoa atu te tu ori ki te nui anga anoano koreia, e i roto i tetai au turanga e tupu mai ana te titiri anga pepe. I te akamanako anga i te au tikaanga, ka rauka ia tatou i te manako taopenga e kare te ture akono tau a te Pipiria i te mea taito.