Akaraanga i te Ao
Akaraanga i te Ao
▪ “Mei tetai tai toru o te au tamariki tamaine i Marike kua nui i mua ake ka tae ei te mataiti ki te 20.”—AU NGAI MAATA NO TE AKAAERE E TE PARURU MAKI, MARIKE.
▪ Kua kiteaia mai i roto i tetai apiianga i Marike e 420 tane “tei takinokinoia i roto i te ngutuare” e “vaitata rai e e toru i roto i te 10 tane tei taiaia me kore tei takinokinoia.” —AMERICAN JOURNAL OF PREVENTIVE MEDICINE.
Tukeke Ainei te Reo?
E maata te au metua te mataku ra e me akatika ratou i ta ratou tamariki kia tuatua i tetai reo ke, ka tamanamanata mai te reira i te tamariki i te kite mai anga i te tuatua i to ratou reo enua tikai. Inara, kare te reira e tika ana i karanga ai tetai o te pupu kimikimianga tei aratakiia e te vaine taineti apii ara uaua ko Laura-Ann Petitto i Toronto, i Kanata. “Ko te teera uaua tei anauia mai koe . . . kua papa ua e kua tano meitaki i te apii i te au reo,” i karanga ai a Petitto, “e ka rauka te reira i te apii i te au reo tukeke.” I te apii, e meitaki atu te au tamariki e tuatua ra i te au reo ke ke i to te au tamariki te tuatua ua ra e tai reo. Inara, “na te au metua e rave i te takainga mua i te apii i te au tamariki rikiriki i tetai reo ke me ka inangaro ratou kia rauka i ta ratou au tamariki te au akameitakianga mei te tuatua anga i tetai reo ke,” i karanga ai te Toronto Star.
Taitaia te Tamariki no te Ravenga Ainga Viivii
Te kite ua ra te au tamariki i te au tutu ainga viivii e te au vitio kino i runga i te Internet mei to ratou rikiriki anga mai. Kia tau ki ta Heinz-Peter Meidinger, te tiamana no te Taokotaianga no te Apii Reo Ke Ke o Tiamani, kua kite mai te au tamariki tamaroa mei te mataiti 12 e pakari atu, e akapeea e kiea e kiteaia ai te au ngai i runga i te Web te akaari maira i te au mea kino e te au ravenga ainga viivii tikai. I vao ake akaraanga ketaketa te au tamariki e kare e manamanata atu ana, inara i roto ake ra e manganui tei poitirere e tei taitaia i te akara anga i te reira. Kua raurau a Meidinger i te au metua kia akamanako e eaa to roto i te manako o ta ratou tamariki e to runga i te komupiuta.
Parani no te Kopaeanga
E maata te au tangata Autireria e taina ra i te au pepa koreromotu i mua ake ka akaipoipo ei, te umuumu ra i to ratou patana kia akono i te au turanga taka meitaki o te oraanga, i ripoti mai ei te Sunday Telegraph o Sydney. Te akakite maira teia au pepa koreromotu e akapeea te nga tokorua i te tua tua anga i ta raua apinga me tupu mai te kopaeanga. I teianei e manganui te au koreromotu te akataka maira e eaa ta te patana tataki tai ka rave i roto i to raua oraanga kia roa te akaipoipo. Ka rauka i te au ture koreromotu i te akataka mai e naai e tunu i te kai, naai e tama, me kore naai e akaoro, pera katoa ka akatikaia te au manu i te aere kiea, e eaa te teiaa o te patana, e naai e taki aere i te puakaoa, e naai e apai i te tita ki vao. Kua akakite mai te roia ko Christine Jeffress e “kare [te au tangata] e tapapa atu ana e ka vai ua rai to ratou pirianga e mutu kore ua atu.”
Ngata i te au Metua i te Akaari i te Aroa
“E maata te au metua te anoano ra i te au ikuikuanga tataia e akapeea i te akono anga i ta ratou tamariki rikiriki, no te mea kare ratou e tukatau ana i te akaari i te tu aroa natura ua ki te au tamariki,” i karanga ai te makatini Newsweek Polska o Porani. Ka anoanoia te au metua kia apii i te au tu mama ua, koia oki te mou anga i ta ratou tamariki, te kangakanga anga kia ratou, e te imene anga kia ratou. E puapinga teia au tu no te tupuanga tau o te tamariki. Inara, kua akaari mai te kimikimianga e “i rotopu i te au ngutuare Porani, ko te akarakara tivi e te aere anga i te okooko ko te mea muaia ta te au metua e rave ana i to te akapou anga i te taime ki ta ratou tamariki.” Kua tukunaia te kangakanga kapiti anga ki te tuanga ono.