Au Akaraanga Puapinga—Tuanga 1

Mei ta teia itiu takake o te makatini E Ara! i akaari takere mai, i tetai au taime e manamanata ana te au ngutuare e puapinga ra. Kare tatou e poitirere no te mea te noo nei tatou i te tuatua ta te Pipiria e akataka ra e “ka tupu te kino maata i taua tuatau openga ra.” (2 Timoteo 3:⁠1) Papu e ka tupu mai te au manamanata tukeke i roto i te au ngutuare ravarai.

E akamaara e, kare te tu puapinga e tei runga i ta te tangata e manako ra e e au turanga meitaki tikai. Tei tuke ra, kua tuatua a Iesu e: “E mataora to te aronga tei manako i to ratou anoano i te pae vaerua.” (Mataio 5:3, NW) Ko te au ngutuare tei akono i to ratou anoano pae vaerua na te aru anga i te au kaveinga Pipiria kua kite mai i te au ravenga puapinga​—⁠noatu e turanga papu kore to ratou. E akamanako ana i tetai au akaraanga.

Akono anga i tetai tamaiti pakipakitai. Te tuku ra te Pipiria i te akono anga i te au mema o te ngutuare ko te mea puapinga, kapiti mai te aronga e anoano takake to ratou. Te akakite ra te reira e: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.”​—⁠1 Timoteo 5:⁠8.

I te kapi 15, kua akakite mai a Victor, tetai metua i Aperika Tonga, e akapeea raua ko tana vaine i te akono anga i ta raua tamaiti pakipakitai e a ngauru mataiti.

Mamaata mai anga ei tamaine angai. Ka rauka i te au kaveinga Pipiria i te tauturu i tetai kia rauka te tu manako tau no runga iaia uaorai​—⁠noatu kua akarukeia e tona nga metua anau. E tika rai, te karanga ra te Pipiria e ko te Atua ko Iehova te “tauturu” o te aronga matiroeroe.​—⁠Salamo 10:⁠14.

I te kapi 16, te akataka maira a Kenyatta, e vaine mapu i Marike, e akapeea aia i te akakoromaki anga i te au tupuanga mamae ngakau no te mea kare aia i aravei ana i tona nga metua anau.

Akakoromaki anga i te mate o tetai metua. Te takake anga o tetai metua vaine me kore metua tane ka akatupu mai i te au mamae ngakau kare e rauka i te akakoreia. Ka rauka i te Pipiria i te tauturu mai. Ko tona Tumutata, ko Iehova “te Atua nona anake te pumaana.”​—⁠2 Korinetia 1:⁠3.

I te kapi 17, te akamarama maira a Angela, e vaine mapu i Autireria, e akapeea tona pirianga ki te Atua i te tauturu anga iaia kia akakoromaki i te mamae te takake anga tona metua tane.

E au akaaoanga tetai ta te au ngutuare ravarai ka akakoromaki atu. Mei ta te au tua i roto i te au kapi e aru mai nei e akatutu maira, te aronga te aru ra i te au kaveinga Pipiria kua kite mai i te ravenga puapinga tei tauturu ia ratou kia autu meitaki i te au akaaoanga ta ratou ka aro atu.

 [Pia/​Au Tutu i te kapi 15]

Akono Anga i Tetai Tamaiti Pakipakitai

Akakiteia e Victor Maynes, i Aperika Tonga

“Mei tona anau mai anga, kua irinaki ua mai a Andrew ki runga ia maua i te akakakau, e te akapai iaia, e i tetai au taime i te angai iaia. E 44 ona mataiti i teianei.”

KUA tarotokaka mai maua e e apinga tarevake tetai, te kore anga e rauka ia Andrew i te aere, te tae anga aia ki te tai mataiti. Mei te reira taime rai, kua tupu mai te maki uti kiaia. Kua apai viviki atu maua ia Andrew ki te are maki, i kite mai ei maua e e maki uti tona. Inara kare ko te reira ua. Kua akapapu mai tetai atu au kimikimianga e kua kino te roro o Andrew.

I muri ake i te au tautaanga rapakauanga tukeke, kua rauka ia maua i te akono i to Andrew maki uti. No tetai tuatau, e a vairakau tukeke e kai ana aia e toru taime i te ra. E tika rai, kare tona maki manako e rauka i te akameitakiia mai e te vairakau. Noatu e 44 ona mataiti i teianei, aiteite ua te manako o Andrew ki to tetai tamaiti e rima me kore e ono mataiti.

Kua akakite mai te au taote kia maua e e tuku ia Andrew ki roto i tetai ngai te ka akono mai i tona turanga, inara kare maua e inangaro i te rave i te reira. Ka rauka ia maua i te akono ia Andrew, no reira kua iki maua e ka akono maua iaia i te kainga, noatu te au akaaoanga ngata.

No reira, kua akanoo maua e na te katoatoa i roto i te ngutuare e akono iaia. Kua turuturu maata mai ta maua au tamariki ia maua​—⁠e rua tamaine e tai tamaroa e noo ra i te kainga​—⁠e te akameitaki tikai nei au ia ratou! Ei Au Kite no Iehova, kua turuturu katoaia mai matou e te au mema o to matou putuputuanga. I tetai au taime, kua oronga mai ratou i te au kai na matou me kore te akono katoaanga ia Andrew ia matou e piri atura ki roto i te angaanga orometua me kore i te akono anga i tetai au mea ke.

Te maara ua nei rai ia matou te au tuatua a Isaia 33:24, tei roto i reira ta te Atua taputou e a tetai ra “kare oki to reira e karanga e, Kua maki au.” Te irinaki pu tikai nei matou e ka akatupu te Atua i tana akakoroanga i te apai mai anga i tetai ao ou e te takore anga i te au maki ravarai. (2 Petero 3:13) No reira te tapapa atu nei matou i te ra e meitaki mai ei a Andrew. Kia tae rava ki taua tuatau ra, te irinaki nei matou i ta Iesu au tuatua e me tuku matou i te au anoano o te Patireia o te Atua na mua i roto i to matou oraanga, ka orongaia mai te au mea ta matou e anoano ra. (Mataio 6:33) Kua kite mai matou e e tupu ua ana te reira. Kare rava matou e ngere ana i tetai apinga.

E tika rai, kare e rauka ana i te katoatoa i te akono i tetai mema makimaki o te ngutuare i te kainga. Ko te aronga e rave ra i te reira, ko taku mea mua ka akamaroiroi atu, kia pure putuputu pakari. (1 Petero 5:​6, 7) Te rua, kia oronga maata i te aroa takinga meitaki ki taau tamaiti, e auraka rava e manako e kare e rauka ia ratou i te apii i te inangaro i te Atua ko Iehova. (Ephesia 6:⁠4) Te toru, e kapiti mai i toou ngutuare tangata katoatoa, e e akatika ia ratou kia tauturu mai. Te a, kia maara e ko toou kainga ko te ngai ia e rauka mai ei i taau tamaiti te aroa maata. E tika rai, tukeke te au turanga. No runga i ta maua tuanga, kare rava maua i tataraara ana i te akono ia Andrew i te kainga. E tamaiti akaperepere maataia aia​—⁠e e tangata akaperepere maata kiaku​—⁠ko taku ia i kite mai.

 [Pia/​Au Tutu i te kapi 16]

Mamaata Mai Anga ei Tamaine Angai

Akakiteia e Kenyatta Young, i Marike

“Me e tamaine koe na tetai metua, e pirianga toto toou. Ei tamaine angaiia, kare oku pirianga toto. Kare au i kite e mei iaai rai toku tu.”

KARE au i kite e koai toku metua tane, e kare rava au i aravei ana i toku metua vaine anau. E inu maata ana aia i te kava e te apinga akakona i tona nui anga. Toku anauia anga kua tukuia atu au ki roto i te kainga akono tamariki, e e maata toku au kainga i noo ana i mua ake ka angaiia ai au i raro ua ake i te rua mataiti.

Kua akakite mai toku tati angai e te akaari anga tetai vaine angaanga i toku tutu kiaia, inangaro tikai aia i te akono iaku. Kua reka tikai au i toku mami ou. Kua akakite au kiaia e koia toku mami e ka inangaro au i te aru iaia ki te kainga.

Te maara ra iaku i toku meangiti anga e, e mataku ana au e ka rave au i tetai mea tarevake e ka akaokiia atu au ki te kainga akono tamariki. Manako mai au e kare au e tau kia riririri me kore kia makiia mei tetai au tamariki rai. Kua tauta katoa au kia kore au e tuiia e te vuru! Kua akapapu ua mai rai toku nga metua e e inangaro tikai to raua iaku e kare rava raua e akaruke iaku.

Ei vaine mapu, e manako ua ana rai au e kare oku puapinga mei to te aronga rai tei utuutuia e to ratou nga metua anau. Te papu anga iaku e e puapinga toku, e tuatua mai ana tetai tangata kiaku e, “Kia rekareka tikai koe e e nga metua meitaki tikai toou e kua inangaro tikai raua i te angai ia koe!” E rekareka ana au, inara me tuatuaia mai taua au tuatua ra e manako ana au e e apinga tarevake tetai iaku, e e aka angaanga no tetai i te inangaro mai iaku.

E ngata tikai i te ariki e kare rava au i kite e koai tikai toku papa anau. I tetai au taime e mamae ana toku ngakau no te mea kare toku mama anau i akakore i te kai kava kia rauka iaia i te akono iaku, mei te mea rai e kare au e puapinga ana kiaia. I tetai au taime e tangi ana au iaia. E maata te taime e manako ana au e me ka aravei au iaia, ka inangaro au i te akakite kiaia e kua puapingaia toku oraanga e eiaa aia e manako kikino mai no te akaruke anga iaku.

E nga Kite no Iehova toku nga metua angai, e ko tetai apinga aroa meitaki tikai ta raua i oronga mai kiaku koia oki ko te kite i te Pipiria. Kua riro ua rai te au tuatua a Salamo 27:10 ei akapumaana anga iaku: “Akaruke ua toku metua tane e toku metua vaine iaku, ei reirā Iehova e rave mai ei iaku.” E tika rai te reira i roto i toku turanga. E e au mea papu tetai ka tupu mai mei te angaiia anga. Ei akaraanga, e reka ua ana au i te au tangata​—⁠to ratou tupuanga e to ratou oraanga​—⁠no te mea kare au i kite i toku uaorai kopu tangata. E inangaro tikai toku i te au tangata, e puapinga tikai te reira i roto i te angaanga orometua Kerititiano. Ei Kite no Iehova e te tuatua anga no runga i te Pipiria kua oronga mai i te akangateitei anga e tetai akakoroanga kiaku. Me taitaiaia au, e aere ana au ki vao i te tauturu i tetai ke. Na te apiianga ki te tangata no runga i te Pipiria, kua rauka iaku i te akanoo i tetai pirianga kia ratou. E au tua reka ta te katoatoa ka akakite mai no runga i to ratou oraanga.

 [Pia/​Au Tutu i te kapi 17]

Akakoromaki Anga i te Mate o Tetai Metua

“Te mate anga toku tati, manako au e kare oku paruru anga. Ko te tangata tei kite i te au mea ravarai e te ka rauka i te akono i tetai ua atu mea i roto i toku oraanga, kua takake atu.”

Akakiteia e Angela Rutgers, i Autireria

KUA takake atu toku metua tane e tai ngauru mataiti i topa akenei, i toku mapuanga. E ono marama i mua atu ana kua vaiia aia, e iaia i roto i te pia akangaroi anga kua akakite mai te taote kia matou e kare a ratou ravenga ke atu nona. Te inangaro maata tikai ra toku mami i tetai atu au akapapuanga, e kua matapoiriia toku tungane, e e maata tikai toku manako ngakau taitaia. E ono marama i muri mai, kua mate toku tati.

Kua na roto au i te au tuatau mamae ngakau tukeke. Kua inangaro au i toku au oa kia marama mai e eaa taku e na roto ra, inara kare au e inangaro ana ia ratou kia tangi mai iaku. No reira kua tauta au kia kore au e akaari atu kia ratou eaa toku manako. I tetai tua ra, manako mai au e te akatika anga e kia mataora au i te piri atu anga kia ratou, ka manakoia mai e te meitaki ua ra toku oraanga, inara kare e meitaki ana. Me akamanako au i toku tu i tera taime, te akamanako nei au i te tu akakoromaki o toku au oa!

Te manako kinokino ra ainei au no tei mate toku Tati? Ae! Manako ua atu au e kua akakite putuputu ana au kiaia e “Inangaro tikai au ia koe!” Manako ua atu au e kua takave putuputu ana au iaia e kua akapou maata i te taime kiaia. Noatu eaa te maata taku ka akakite kiaku uaorai e, ‘Kare aia e inangaro ana kia manako akapera koe,’ te tamanamanata nei rai te reira iaku.

Ei Kite no Iehova, te kite nei rai au i te akapumaana anga maata no te manakonakoanga no te tuakaouanga tei akatumuia ki runga i te Pipiria. (Ioane 5:​28, 29) E tauta ana au i te akamanako e kua aere toku tati ki tetai tere mamao, e a tetai ra ka oki mai aia ki te kainga, kare ra i kiteaia e eaa tikai te ra. Inara, me tuatua mai te au tangata kiaku e, “Ka akatuakaouia mai toou tati,” i te akamataanga kare te reira i akamaroiroi mai iaku. Kua manako mai au e, ‘Inangaro au kia oki mai toku tati i teia taime!’ Ko tera akatutuanga no runga i te tere mamao kua riro ei tauturu anga iaku. Te akatutu maira te reira e e tuakaouanga tetai i te tuatau ki mua, i te tauturu anga iaku kia akakoromaki ua i te mate tei tupu ua akera.

Kua riro te au taeake Kerititiano ei turuturu anga maata. Maara mai iaku i tetai tangata tei akakite mai kiaku e kare aia e mataora ana i te tuatua no runga i te mate o toku tati, inara kua akakite mai aia e te manako ua maira aia iaku e toku ngutuare tangata i te au taime ravarai. Kua maaraara ua rai iaku taua tuatua ra. Kua tauturu te reira iaku i te au ra me kare tetai tangata e tuatua mai ana i tetai apinga kiaku, te akapapu maira te reira e noatu e kare ratou e tuatua ana no runga i te reira, te manako maira ratou iaku e toku ngutuare tangata. E puapinga tikai te reira kiaku!

E a marama i muri ake te mate anga a Tati, kua akamata a Mami i te piri maata atu ki roto i te angaanga orometua, e te kite atura au i tona rekareka maata no te reira angaanga. No reira kua piri atu au kiaia. E mea umere tikai te tauturu anga i tetai ke, ka tauturu te reira ia koe kia akakoromaki ua. Kua akaketaketa te reira i toku akarongo i roto i te Tuatua a Iehova e tana au taputou, e kua tauturu katoa mai iaku kia kore e akamanako ua ki runga i toku tu mii mari ra ki runga i to tetai ke.