Au Akaraanga Puapinga​—Tuanga 2

Mei tei akakiteia mai i roto i te “Au Akaraanga Puapinga​—⁠Tuanga 1,” ka rauka i te au kaveinga Pipiria i te akaketaketa i te au ngutuare i roto i te au tuatau ngata. * Te aronga e aru ra i tona au turanga, kua taputou mai te Atua ko Iehova e: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.”​—⁠Salamo 32:⁠8.

Akakoromaki anga i te au turanga ngata i te pae moni. E akatupu maata ana te au manamanata no runga i te moni i te pekapeka i roto i te akaipoipo. Inara ka rauka i te au kaveinga Pipiria i te tauturu i te au ngutuare kia akamanako meitaki no runga i te au manamanata i te pae moni. Kua tuatua a Iesu e: “Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa . . . kua kite oki to kotou Metua i te ao ra e, kia rauka taua au mea katoa ra ia kotou e tikaʼi.”​—⁠Mataio 6:​25, 32.

I te kapi 23, kua akakite mai a Issachar, no Marike mai, e akapeea aia e tona ngutuare i te akono anga i te au turanga ngata i te pae moni i muri ake te takoreia anga to ratou kainga e te Uriia Katrina.

Me tupu te maki ki tetai mema o te ngutuare. E maki ana te au tangata ravarai. Maataanga o te taime, tuatau poto ua to te maki e ka meitaki viviki mai. Inara akapeea me kua tuiia tetai mema o te ngutuare i te maki kua roa te tuatau? Te karanga ra te Pipiria e ka rauka ia Iehova i te akamaroiroi i te aronga i runga i te roi maki. (Salamo 41:​1-3) Akapeea te ngutuare i riro ei ei ravenga na Iehova i te oronga mai i taua akamaroiroi anga ra?

I te kapi 24, kua akakite mai a Hajime, e tane i Tiapani, e akapeea aia e tana nga tamaine i te angaanga kapiti anga i te tauturu i tana vaine ko Noriko, i muri ake te kiteaia mai anga e e maki kino tikai tona.

Me mate tetai pepe. Ka riro te mate o tetai pepe ei tumatetenga maata tikai ki tetai ngutuare. Kua taputou mai a Iehova e ka orei aia i te roi mata o te aronga te mii ra no te mate o tetai pepe. (Apokalupo 21:​1-4) Te oronga katoa maira aia i teianei i te akapumaana ki te aronga te mii ra.​—⁠Salamo 147:⁠3.

I te kapi 25, kua akakite mai a Fernando raua ko Dilma, no Marike mai, e akapeea te Pipiria i te akaketaketa anga ia raua te mate anga ta raua pepe tamaine.

E arataki anga irinakiia te Pipiria no te au ngutuare te aro atura i te au manamanata, mei ta te au tua e akakite maira i roto i te au kapi ka aru mai.

[Tataanga Rikiriki i Raro]

 [Pia/​Au Tutu i te kapi 23]

Akakoromaki Anga i te Turanga Ngata i te Pae Moni

Akakiteia e Issachar Nichols, i Marike

“Kua takore te Uriia Katrina i to matou kainga, ko te patu ua tei toe mai. Te apii i angaanga ana au kua kiia e te vai e tai e te apa marama.”

I TE tuatau maana i te mataiti 2005, kua noo matou ko taku vaine ko Michelle e ta maua tamaine e rua mataiti i Bay St. Louis, i Mississippi, U.S.A. Ei nga Kite no Iehova, to maua akakoroanga ko Michelle kia piri maroiroi ua rai ki roto i te angaanga orometua Kerititiano. E apii ana au ei puapii i tetai au taime, tei te pae ua mai taku apii ia New Orleans, i Louisiana. Kua rauka i taku papaanga i te oronga mai i tetai nga ra e toru o te epetoma no te angaanga moni, kia rauka iaku i te akapou i te toenga o toku taime i te apiianga i te Pipiria ki tetai ke. Meitaki ua ta matou papaanga. Inara kua tae mai te nuti e ka tupu te Uriia Katrina. Kua akapapa matou i te akaatea viviki atu.

Te akamutu anga te uriia, kua kino to matou are i Bay St. Louis e pera katoa te apii e apii ana au i New Orleans. Kua rauka ia matou i te oko i tetai are mei ta matou moni initurani e te moni tei orongaia mai e te kavamani, inara e ngata iaku i te kimi i tetai angaanga moni tinamou. Pera katoa, kua makiia taku vaine no te kino te vai. Kua paruparu tona paruru anga kopapa, e i muri mai kua tuiia aia e te maki West Nile no tei katiaia e te namu. I taua taime rai, kua kake te tutaki anga initurani e te moni o te oraanga.

Ei akatikatika anga i to matou turanga ou, kua kite mai matou no runga i te akaravarava anga i te moni ka pou, e te au mea katoa te anoanoia ra. Kare au e akavaavaa ana i te tu o te au angaanga.

Te akatika nei au e e ngata tikai te ngaro anga ta matou apinga. Inara te rekareka nei matou e kua ora mai matou. Te akaari maira te au tupuanga katoa e e iti ua te puapinga o te au apinga materia. E tika rai, kua akamaaraia mai kia matou te au tuatua a Iesu e: “E maata ua oki to te tangata nei apinga, kare oki tei taua apinga nona ra tona ora.”​—⁠Luka 12:⁠15.

Kua kite katoa mai matou e noatu te kino ta matou i kite mai te ngaro anga ta matou apinga, e maata te aronga tei maata atu ta ratou apinga i ngaro​—⁠ko tetai aronga kua mate ratou. I muri ua ake te tupu anga te kino, ko tetai tumu te reira i o maata atu ei au ki roto i te angaanga tauturu anga, e te akapumaana anga i tetai ke tei o atu ki roto i te tumatetenga.

I roto i teia au tumatetenga, kua riro tikai a Salamo 102:17 ei akapumaana anga kia matou. Te akakite ra te reira e na te Atua ko Iehova ‘e akono i te pure a tei putaua, e kare e akavaavaa i ta ratou pure.’ Ei ngutuare tangata, kua kite mai matou i tana turuturu anga!

[Pia i te kapi 23]

I muri ake te tupu anga te Uriia Katrina e te Uriia Rita ki te U.S. Gulf Coast i te mataiti 2005, kua akanoo viviki te Au Kite e 13 ngai akaaereanga tauturu, e iva are mamaata vairanga apinga, e e a ngai vairanga penitini. Vaitata rai e 17,000 Au Kite tauturu tei aere mai no te au tuanga ravarai o Marike, e mei tetai au enua e 13 no te angaanga tauturuanga. E tauatini ua atu are ta ratou i akaou aere.

 [Pia/​Au Tutu i te kapi 24]

Me Tupu te Maki ki Tetai Mema o te Ngutuare

Akakiteia e Hajime Ito, i Tiapani

“E tuatau mataora tikai te tunu kapiti anga i te kai​—⁠i mua ake ka makiia ai a Noriko. I teianei kare e rauka iaia i te tuatua me kore i te kaikai e te inu na roto i tona vaa. E noo ua ana aia ki runga i tetai pereoo oparapara e te akaaea anga na roto i te matini.”

I ROTO ia Me i te mataiti 2006, kare i rauka rava ana i taku vaine, ko Noriko, i te tuatua. I taua tuatau maana ra kare i rauka rava ana iaia i te kaikai e te inu. Te tae anga ki te marama o Tepetema kua kiteaia mai e kua tuia aia e te maki tei akamate takiri i tona kopapa​—⁠e maki te ka akakino marie i te au teera uaua o te roro e te uaua mokotua. E a rai marama, kua taui takiri to matou oraanga. E te akamata ua maira tona au manamanata.

Kare i roa ana, kua akamate te arero o Noriko, pera katoa tona rima katau. Na te vai anga i tetai ngai o te kopu kia tukunaia tetai tube kia rauka i te angai iaia, e oti te vai anga i tetai ngai o te karaponga kia rauka i te akaaea mai​—⁠no reira kare e rauka iaia i te tuatua mai. Kare e rauka iaku i te akamanako atu e mei teaa rai te kino o teia kia Noriko, no te mea e maroiroi ua ana aia. E Au Kite matou no Iehova, e e piri maroiroi ua ana a Noriko e ta maua nga tamaine ki roto i te angaanga orometua Kerititiano tamou. I teianei te irinaki nei a Noriko ki runga i te matini akaaea, te maataanga o te taime tei runga ua aia i te roi.

Noatu rai, kare teia e tapu ana ia Noriko! Ei akaraanga, e aere ana aia ki te au uipaanga Kerititiano i runga i te pereoo oparapara, e kua tamouia te matini akaaea ki runga iaia. Kare aia e akarongo meitaki ana, no reira e tata mamaata ana ta maua tamaine i te tuatau o te uipaanga kia puapingaia aia mei te porokaramu. E noatu e kare a Noriko e piri akaou ana ki roto i te angaanga orometua tamou, te tata reta nei rai aia ki te au tangata i te apiianga kia ratou i te karere o te Pipiria no runga i te manakonakoanga, na te taangaanga anga i tetai apinga takake tei tamouia ki runga i ta matou komupiuta.​—⁠2 Petero 3:13; Apokalupo 21:​1-4.

Kua taokotai matou ei ngutuare i te tauturu ia Noriko. Kua rauka tetai ngai angaanga ou na ta maua nga tamaine kia rauka ia raua i te tauturu mai i te kainga. Kua akono matou toko toru i te au angaanga o te kainga ta Noriko i rave ana i te au ra ravarai.

I tetai au taime i te popongi me akara atu au ia Noriko, akaraanga roiroi tikai aia. E manako ana au kiaku uaorai e, ‘Inangaro au i te akakite kiaia kia noo maru ua aia i teia ra.’ Inara kua inangaro a Noriko i te akakite atu i te karere o te Pipiria ki tetai ke. Me akamata au i te akapapa i te komupiuta nana, e mataora tikai ana a Noriko! Me tata aia, meitaki mai tona turanga. Kua kite mai au i te puapinga no te ‘rave maata anga i te angaanga a te Atu.’​—⁠1 Korinetia 15:⁠58.

Kua riro te tupuanga o te tamaiti ko Jason Stuart tei tuiia e te maki ALS, tei akakiteia mai i roto i te itiu o Tianuare 2006 o te makatini Awake!, ei tauturu anga maata ia Noriko kia kore aia e manako puapinga kore ua. E tika rai, me manako mai te aronga angaanga o te are maki e eaa ra i rauka ai iaia te manako papu, kua akakite atu a Noriko no runga i te atikara kia ratou, e kua tua aere matou i te au kopi ki te aronga angaanga. Kua akamaroiroi maataia taku vaine na te apiianga i tetai ke no runga i tona akarongo.

E 30 mataiti to maua akaipoipo anga ko Noriko, inara i nga mataiti e toru i topa akenei, kua ariki rekareka mai au i te au mea no runga iaia kare rava au i manako atu ana i mua ana. Mataora tikai au e kua akaipoipo au iaia!

 [Pia/​Au Tutu i te kapi 25]

Me Mate Tetai Pepe

Akakiteia e Fernando raua ko Dilma Freitas, i Marike

“Kare e rauka i te akamarama atu i te tumatetenga no runga i te mate o tetai pepe. E maata tikai te mamae.”

KUA mate ta maua tamaine ta maua i tapa ko Precious, i roto ia Aperira ra 16, i te mataiti 2006. E tai ngauru ua rai ona ra te ora mai anga. E toru marama i te nui anga, kua kiteaia mai e te au taote e kua kino te pukuatu o ta maua pepe kare i anauia ake. Vaitata anga ki te taime ka anauia mai ei aia, kua kitea katoaia mai e me ka anauia mai aia e te ora ra rai ka mate aia i muri ua ake i tona anau anga. E ngata tikai ia maua i te ariki i teia. E toru a maua tamariki meitaki ua te oraanga. Kare maua i irinaki ana e ka mate ta maua pepe.

I muri ake te anauia mai anga a Precious, kua kiteaia mai e tetai taote apii maki chromosome e kua tuia aia e tetai maki kare e tupu putuputu ana, tei tapaia ko te maki Trisomy 18, e e 1 i roto i te 5,000 pepe e tuia ana. Te taka ua ra e kare aia e ora mai. Kua manako puapinga kore ua maua no te mea kare e rauka ia maua i te rave i tetai apinga. E tai rai apinga ka rauka ia maua i te rave koia oki kia noo ua ki te pae iaia no tetai tuatau poto ua o tona oraanga. Ko ta maua ia i rave.

Rekareka tikai maua e, e tai ngauru ra to maua noo anga i te pae ia Precious. I taua tuatau ra, vaitata atu to matou pirianga e ta maua au tamaine e toru kiaia. Kua mou matou iaia, kua tuatua kiaia, kua takave iaia, kua ongi iaia, e e maata te au tutu ta matou i nenei no runga iaia. Kua uriuri manako katoa matou e koai i roto i te ngutuare te aiteite tikai ra aia kiaai. Kua atoro mai te taote tei kite mai i te turanga o Precious ia matou i te au ra ravarai i roto i te are maki. Kua aue kapiti matou e kua akakite mai aia e tangi tikai aia ia matou. Kua toroa katoa aia i tetai tutu no Precious, iaia e tuatua maira kia matou ei akamaara anga nana iaia. Kua oake mai aia i tetai kopi na matou.

Ei nga Kite no Iehova, kua irinaki tikai maua, mei ta te Pipiria e apii maira, e ka akaoki akaou mai te Atua i te au turanga parataito ki runga nei i to tatou enua, e te inangaro tikai ra aia i te akatuakaou mai i te aronga tei mate​—⁠kapiti mai te au pepe, mei ia Precious rai. (Iobu 14:​14, 15; Ioane 5:​28, 29) Te tapapa atu nei matou i te ra ka mou akaou ei matou iaia e ka takave akaou iaia. I te au taime ravarai e akarongo ana matou i te tuatua “parataito,” te akapumaana ra taua manakonakoanga ra i to matou ngakau! I taua taime rai, te akapumaanaia nei matou i te kite anga e tei roto a Precious i te manako o te Atua e kare e mamae akaou ana.​—⁠Koheleta 9:​5, 10.