Taviri 2: Papauanga

“Ta te Atua i topiri ra, auraka te tangata e akataka ke atu.”​—⁠Mataio 19:⁠6.

Te aiteanga o teia. Te manako ra nga tokorua puapingaia i to raua akaipoipo ei taokotaianga tinamou. Me tupu mai tetai manamanata, ka akatikatika raua i te reira, kare e akariro e ei kotoeanga no te akamutu i te akaipoipo. Me akamanako nga tokorua i ta raua papauanga, ka tinamou raua. Te irinaki ra raua e ka akangateitei ua rai tetai e tetai i to raua akaipoipo.

Te mea puapinga. I roto i te au tu e manganui, ko te papauanga te turuturu anga maata o tetai pirianga akaipoipo. Inara, me tupu putuputu te au manamanata a muri ake, akaraanga e mei tetai ereere rai te papauanga kare i te irinaki anga. No reira, ko te tia akaipoipo “na te mate taua e akataka ke” te riro ra mei tetai koreromotu puapinga kore ua​—⁠te kimi ravenga ra te tokorua i te akamutu i te reira. Penei kare tikai ratou e akaruke i te akaipoipo, inara ka “akaatea mai” ratou na tetai mataara ke​—⁠ei akaraanga, na te muteki ua anga me uriuriia tetai au manamanata pakari.

Taangaanga i teia. E akamanako i taau papauanga, na te aru anga i teia au uianga ei aratakianga.

▪ Me pekapeka maua, ka tataraapa ainei au e kua akaipoipo au i teia tangata?

▪ E manako moemoea ana ainei au i tetai tangata ke kare i toku tokorua?

▪ E akakite ana ainei au i tetai taime ki toku tokorua, “Ka akaruke au ia koe” me kore “Ka aere au ka kimi i tetai tangata ke ka ariki rekareka mai iaku”?

Rave i te ikianga tau. E akamanako ana e tai me kore e rua ravenga ka akaketaketa i taau papauanga. (Tetai au manako: Tata i tetai reta ki toou tokorua i tetai au taime, e tuku i te tutu o toou tokorua ki runga i te kaingakai angaanga, me kore e ringi i toou tokorua i te au ra mei te angaanga, kia pukapuka ua rai korua.)

Eaa ka kore ei e kimi i tetai atu au manako, e kia ui ki toou tokorua ko teea te mea puapinga rava atu kiaia?

[Tutu i te kapi 4]

Mei te mataara paruru rai te papauanga, te paruru ra i toou akaipoipo kia kore e aere tarevake

[Akameitakianga]

© Corbis/age fotostock