Taviri 4: Akangateitei

“Kia kopae ravaia . . . te taumāro ra, e te tuatua akakino.”​—Ephesia 4:⁠31.

Te aiteanga o teia. E pekapeka ana te ngutuare e manamanata ra e te ngutuare e puapinga ra. Inara e uriuri manako ana te ngutuare e puapinga ra i te au manamanata ma te kore e aviri atu, e akakino atu, e te tuatua atu i tetai au tuatua akakino. E akono ana te au mema ngutuare i tetai e tetai mei ta ratou rai e inangaro ra kia akonoia mai ratou.​—⁠Mataio 7:⁠12.

Te mea puapinga. Ka akatupu te au tuatua tamamae i te kino. Te karanga ra tetai materi Pipiria e: “E mea meitaki kia noo ua ki te enua motutaa, i te noo ki o te vaine tamaki e te rotoriri.” (Maseli 21:19) E tika, aiteite rai te reira ki te tangata tuatua akakino. No runga i te utuutu anga i te tamariki, te akakite maira te Pipiria e: “Auraka e akariri atu i ta kotou tamariki, ko te taitaia aea ratou.” (Kolosa 3:21) Ko te au tamariki e akaapa putuputuia ra, ka manako e kare e rauka ia ratou i te akamareka i to ratou nga metua. Penei kare ratou e tauta.

Taangaanga i teia. E akamanako i te tu akangateitei anga i roto i toou ngutuare na te pau anga i te au uianga e aru mai nei.

▪ I roto i toku ngutuare, e akamutu ana te pekapeka me akaruke tetai tangata i te rumu?

▪ Me tuatua au ki toku tokorua e taku tamariki, e tuatua akakino ana ainei au, mei te tuatua “neneva,” “auouo,” me kore tetai tuatua mei te reira rai?

▪ Kua utuutuia ainei au i roto i tetai ngutuare e tuatua akakino ua ana?

Rave i te ikianga tau. E akamanako e tai me kore e rua akakoroanga no te akaari anga i te tu akangateitei i roto i taau tuatua. (Manako: E iki i te tuatua ko “au” kare i te tuatua ko “koe.” Ei akaraanga, “Mamae tikai au me . . . ,” kare ra e “E akapera ua ana koe . . .”)

Eaa ka kore ei e akakite i toou (au) akakoroanga ki toou tokorua? I roto i te toru marama, e ui ki toou tokorua me te aru nei koe i te reira.

E akamanako i tetai au kotinga ka akanoo koe kia kore koe e tuatua akakino atu me tuatua ki taau tamariki.

Eaa ka kore ei e tataraara atu ki taau tamariki no te au taime i tuatua akakino ana me kore i aviri atu ana koe ia ratou?

[Tutu i te kapi 6]

Mei te ngaru moana te akangaangaa ra i tetai mato ketaketa, ka akaparuparu te au tuatua akakino i tetai ngutuare