Taviri 5: Tu Tau

“Kia kitea oki to kotou tu tau.”​—Philipi 4:5, NW.

Te aiteanga o teia. I roto i te au ngutuare e puapinga ra, e akakore putuputu ana te au tane e te au vaine i te ara a tetai e tetai. (Roma 3:23) Kare katoa ratou e tureture pakari ana me kore e tukutuku ua ana i ta ratou tamariki. Te akanoo ra ratou i te au ture tau no te ngutuare. Me anoanoia te akatikatika anga, ka oronga ratou i te reira “ma te tuatua-tau.”​—⁠Ieremia 30:⁠11.

Te mea puapinga. Te karanga ra te Pipiria e e ‘tu tau te pakari no runga mai.’ (Iakobo 3:17, NW) Kare te Atua e umuumu mai ana i te tu apa kore mei te au tangata apa, eaa i reira tetai tokorua akaipoipo ka umuumu ei i te reira mei tetai e tetai? Te akaapa putuputu anga i tetai au tarevake rikiriki ua ka tupu mai te riri, kare e meitaki atu. E meitaki i te ariki e “te apa anake nei tatou i te au mea katoa e manganui.”​—⁠Iakobo 3:⁠2.

Te akaari ra te au metua e puapinga ra i te tu tau me akono ratou i ta ratou tamariki. Kare ta ratou akoanga e pakari rava ana, e kare katoa ratou e “maru kore” ana. (1 Petero 2:18) Ka akatika ratou i te tu rangatira ki te au mapu tei akaari takere mai e ka rauka ia ratou i te apai i teia apainga. Kare ratou e akaaere i te au mea i roto i te oraanga o te mapu. Te akakite ra tetai tataanga e ko te akaaere anga i te au mea i roto i te oraanga o tetai mapu “te aite ra ki tetai ura panapana no te ua tei akapou tikai i te maroiroi kia pururu mai te ua. Kare e ua mai, ka roiroi ra koe.”

Taangaanga i teia. E akamanako i te tu tau na te pau anga i nga uianga e aru mai nei.

▪ I naea ra koe i akapaapaa ei i toou tokorua?

▪ I naea ra koe i akaapa ai i toou tokorua?

Rave i te ikianga tau. Me e ngata ia koe i te pau i te uianga mua o te uianga e aru mai nei, inara te rauka ra ia koe i te pau i te rua o te uianga, e akamanako ana i tetai akakoroanga ka rauka ia koe i te akanoo i taau e tapapa atura.

Eaa ka kore ei e uriuri ki toou tokorua no ta korua ikianga ka rave?

E akamanako i te tu rangatira ka oronga koe ki taau tamaiti mapu iaia e akaari maira e ka rauka iaia i te apai i taua apainga ra.

Eaa ka kore ei e uriuri tika atu ki taau tamaiti mapu no te ora tei akanooia no te oki mai anga ki te kainga?

[Tutu i te kapi 7]

Mei tetai tangata akaoro matakite rai, kua papa ua te mema ngutuare tu tau i te tuku i tetai ke na mua ake