Taviri 7: Tango Ngaueue Kore
Taviri 7: Tango Ngaueue Kore
Te aiteanga o teia. Kare i te mea mama ua no tetai ngutuare ketaketa kia akakoromaki ua, mei tetai are rai kare e tu ua no te au ngauru mataiti. Ka anoanoia tetai tango ngaueue kore kia vai ketaketa ua tetai are, te aite katoa ra te reira ki tetai ngutuare ketaketa. Kua patuia te ngutuare e puapinga ra ki runga i tetai tumu aratakianga te angaanga ra.
Te mea puapinga. E maata te au akoanga no runga i te oraanga ngutuare i roto i te au puka, te au makatini, e te au porokaramu tivi. Ka akamaroiroi tetai aronga ako no te akaipoipo i te au tokorua te manamanata ra kia noo kapiti ua, ko tetai pae ka akamaroiroi i nga tokorua kia noo takake. Kua taui te aronga kite i to ratou manako no runga i taua tumu manako ra. Ei akaraanga, i te mataiti 1994 kua tata tetai taote rapakau tei apii no runga i te au manamanata o te au mapu e, i te akamata anga o tana angaanga kua manako aia e e “meitaki atu te au tamariki kia noo ki te metua okotai te mataora ra i te noo ki te nga metua akaipoipo kare e mataora ana. Kua manako mai au e ikianga meitaki te kopaeanga i te noo ua atu ki roto i tetai akaipoipo kino.” Kua taui ra tona manako i tana i kite mai e rua ngauru mataiti i muri mai. Kua tuatua aia e: “E tamamae kino ana te kopaeanga i te au tamariki e manganui.”
E taui ana te au manako, inara te akoanga meitaki rava atu tei kiteaia, ka akaari ua mai rai i te au kaveinga tei kiteaia i roto i te Tuatua a te Atua, te Pipiria. Te tatau anga i teia au papaanga atikara, ka kite mai koe i tetai kaveinga Pipiria i runga roa i te kapi 3-8. Kua tauturu taua au kaveinga ra i te au ngutuare e manganui kia rauka mai te puapinga mou tikai. Mei tetai atu au ngutuare rai, e tupu ana te manamanata kia ratou. Te mea tuke ra, kua oronga mai te Pipiria i tetai tango ngaueue kore no to ratou akaipoipo e no te oraanga ngutuare. Kua kite tatou e au mea tika teia no runga i te Pipiria, ko Tei Tata i te reira, ko te Atua ko Iehova, koia Tei Akamata i te ngutuare tangata.—2 Timoteo 3:16, 17.
Taangaanga i teia. Tata i tetai papaanga o te au irava tei taikuia i runga roa i te kapi 3 ki te kapi 8. Kapiti mai i tetai au irava Pipiria tei tauturu ana ia koe. E tuku i teia papaanga ki tetai ngai mama ua ia koe i te akara putuputu.
Rave i te ikianga tau. Tauta i te taangaanga i te Pipiria i roto i toou oraanga ngutuare.
[Tutu i te kapi 8, 9]
Ma te tango ngaueue kore Tuatua Tapu, ka autu toou ngutuare i te au uriia te ka takino i te reira