Aere Mai e Akara i te Makete o Aperika

KO TETAI mataara meitaki rava atu no te akara aere i te au akono anga, te au peu e te au tu tunu kai a tetai enua, koia oki te atoroanga i te makete. I reira ka kite atu koe i te au tangata e noo ana i te reira ngai, te tongianga i ta ratou kai, e te okoanga i ta ratou au apinga. Ka aravei katoa koe i te au tu tangata okooko tukeke te ka tauta pakari mai i te komunikeiti mai kia koe​—noatu eaa toou reo.

Ka ngata ia koe i te kite i tetai makete umere tikai atu i to Aperika. E maata tikai te au tangata e ta ratou au apinga okooko tukeke umere tikai i reira. Ka kite mai koe i reira i te tu mataora tikai o Aperika. Aru mai iaku, i te atoro i te makete i roto ia Douala, i Kameruno.

Aereanga ki te Makete Mei Tei Raveia i Aperika

I roto i te au oire maata o Aperika, ko te mataara mama ua e te viviki no te aere anga ki te makete, na runga i tetai patikara matini. I runga i te maata anga o te ope o te mataara, e pati mai ana te au tangata akaoro patikara e na ratou e apai ia koe. Me e ngakau toa toou, ka rauka ia koe i te pati i tetai ia ratou kia apai ia koe. Ko te ravenga meitaki rava atu teia i roto ia Kameruno, no te mea e mama ua te tutakianga e te viviki i te aere.

No te aronga e emiemi ana, te vai ra te au taxi tau ua e manganui. E maata te au patete e aere kapiti putuputu ana na runga i te taxi okotai kia mama te tutakianga.

Anere ua Atu Ngai Okooko

Ko tetai manuiri tei atoro atu i te makete no te taime mua, penei ka taitaia no te maata rava o te tangata e te au ngai okooko i te pae mataara. E apai aere ana te au pupu tangata e te au tamariki i te au apinga okooko na runga i to ratou upoko. Me akara vaitataia atu, ka kite atu koe e kua ki ta ratou au kete i te au moa ora, te au anani tope, e te au vairakau tukeke e tetai atu au apinga ke.

E anere ua atu au paata rakau kua ki i te au kai vetitaporo mei te au kapati, karoti, kukuma, eggplants, motini, ruru pi, kumara, tomati, te ui, e tetai atu au tu tarati tukeke. Penei kare tetai au manuiri i kite i te au kai katoatoa, no te mea tetai au kai e kai reka tikai na te aronga e noo ana i reira kare e kiteaia ana i vao ake ia Aperika. Penei ko te au ngai karakara rava atu ko te au ngai e oko ra i te au oporo muramura e te rengarenga, te ou ra rai e te kanapanapa ra i roto i te ra i te popongi. E maata te au ngai okooko te oko ra i te apuka, te meika, te anani mamaata kavakava, te mereni, te painapa, te anani, e te remene. Akara anga e au kai reka te  reira, ka inangaro rai koe i te oko mai! Ko te au ui, te maniota, e te raiti​—ko te kai tumu tikaiia o te enua⁠—e kite katoaia ana i rotopu i te au oniani e te au kariki tei tukunaia mai mei tetai enua ke.

I roto i tetai o te au makete o Douala, te maataanga o te aronga e ngai okooko to ratou no roto mai i te iti tangata o Hausa e Fula. Ka viviki ua koe i te kite atu i teia aronga okooko no to ratou tu kakau roaroa, auika, teatea, me kore rengarenga, tei tapaia e ko te gandouras me kore boubous, e no ta ratou turouanga oaoa i roto i te reo Fulfulde. E tuanga ngai te makete no te akangaroi maru ua anga. I roto i teia atoroanga, kua iki mai tetai tangata okooko ko Ibrahim tona ingoa, e toru oniani mamaata e kua oronga mai ei apinga aroa naku. “E akakite ki taau vaine kia akaki i te reira ki te raiti veravera e kia tunu marie i te reira,” i akakite mai ei aia.

I mua ua atu, e okoia ana te au kiko manu ou tei tipupuia​—te maataanga e kiko puakatoro e te kiko puakanio. E apai mai ana te au tangata tumutumu i te au manu mamaata tei taiaia na runga i to ratou pakuivi e kua pei ua mai i te reira ki runga i te kaingakai. E akakoi viviki karape ana te aronga ta manu i te au matipi roroa, e kua pati atu i te aronga okooko kia iki i ta ratou potonga kiko. E oko katoaia ana te au puakanio, te moa e te puaka ora ki te aronga okooko te inangaro ra e na ratou rai e ta i te reira.

Aere Mai, e Kai i ko i te Are Okooko Kai

E ngai kaikai rai tetai i ko i te makete. I roto ia Kameruno kua kiteaia te au ngai okooko kai i ko i te makete e ko te are okooko kai. E akatangi maata ana tetai aronga i te imene kia aere mai te aronga okooko, e au ngai tetai kare e turituri ana e ka rauka i tetai i te oko mai i te kai tei matauia i Aperika e te araveianga i te au tangata no reira mai. Penei kua tataia te kai ki runga i te papa tataanga, e ko te aronga kare i matau i te au kai o te reira ngai, ka inangaro ratou kia akakiteia mai te ingoa o te kai.

Te nga kai matauia ko te raiti e te fufu, e kai rerureruia mei te maniota, meika, me kore te ui. Ka kite katoa mai koe i te ika tunutunu, te kiko puakatoro, te moa e tetai tai tei maaniia mei roto mai i te okra, te pata maaniia ki te aratita, me kore te au tomati. Marie ua te turanga i roto i te are okooko kai, e no reira e maata te taime no te pukapuka anga.

Kua aere mai e rua nga tuati i te apai mai i ta maua kai. E tai kua apai mai i tetai aka mereki auri kua ki i te raiti, te au pi e te fufu maoa. Kua kairo rekaia te au kai ki te tai okra e kua akamaneaia ki te kiko manu e te ika i runga i te kata rakau. E moina rikiriki katoa tetai no te tai oporo muramura na te aronga e reka ana i te kai veravera. Kua apai mai te rua o te tuati i tetai tauera e te pa vai kia orei maua i to maua rima. E mea tau teia, no te mea e peu matauia i te kai i te kai ki te rima. E peu matauia no tetai tangata tei oko mai i te kai kia pure i mua ake ka kaikai ei, e oti ka akarongo atu aia i tetai au tangata i te kaingakai i te pae mai i te piri mai anga i te tuatua anga e “Amene.”

Akakitekite Anga i te Tuatua Meitaki i ko i te Makete

E ngai puapinga maata te makete no te taokotaianga mai i te au tangata i roto i te oire. Te oronga maira te reira i te au ngai tau, kare no te oko ua mai anga e te oko atu anga, mari ra no te akakite atu i te au nuti, te araveianga i te au taeake, e te kimi katoa anga i tetai angaanga. Te karanga ra te Pipiria e kua atoro ana a Iesu i te makete, i te ngai i apii ei aia i te tangata no runga i te Atua e te raveanga i te au rapakauanga. Kua uriuri manako katoa te apotetoro ko Paulo i ko i te makete ‘i tona aravei atu anga i te aronga okooko.’ (Angaanga 17:​16, 17; Mareko 6:⁠56) Pera katoa i teia tuatau, kua kite mai te Au Kite o Iehova i Kameruno e e ngai meitaki tikai te makete no te tutu aere i te tuatua meitaki o te Patireia o te Atua.​—Orongaia mai.

[Tutu i te kapi 18]

Au oporo karakara