“Auraka e Apiapi”

“Kua pou ta maua moni i roto i te pangika kapiti mai te moni a ta maua tamariki tei pangikaia. E manganui te au marama kare a matou moni.”

● Naku e akaaere ra i tetai apii i tetai ngai i vao mai i roto ia Initia, e te tere meitaki ua ra te reira. I tetai tuatau e 500 tamariki apii tei retitaia i roto i reira. Inara, kua akamata tetai apii rongonui i roto i te oire i te tuku mai i te au bus ki to matou ngai, e kua akatika ratou kia mama ua i te tomo atu ki roto i te apii. Tei kiteaia mai, e maata taku au tamariki apii tei taui atu ki te apii i roto i te oire. E tika rai, kua topa mai te numero o te au tamariki i roto i taku apii mei te 500 ki te 60. Tei akamaata atu i te manamanata, vaitata atu ki te reira tuatau kua akapae mai tetai tangata opita o te apii iaia mei ta maua i koreromotu i te pae moni, e te vai ra rai tana moni i kaiou mai kiaku. Kua o atu au ki roto i tetai manamanata kino i te pae moni no te maata o te au puapii taku ka tutaki atu.

Kua noo matou ei ngutuare tangata ki raro e kua uriuri manako no runga i te manamanata. Kua akaari pouroa matou i te ngakau akaatinga ia matou e tauta ra i te aru i ta Iesu akoanga e kia ‘meitaki ua te mata’ i te pae moni​—⁠te aiteanga, kia kore e oko mai i te au apinga kare e peke ia matou. (Mataio 6:​22, 25) No tetai tuatau kare matou e akaoro akaou ana i to matou motoka no te maata i te oko i te penitini e te akono anga i te reira. Kua akaiti mai matou i te moni no te oko kai na te okookoanga i te aiai po, kua mama mai i reira te okoanga o te kai. Kua akaiti katoa mai matou i te au kai ta matou e kai ana i te au tuatau kaikai.

E Kite matou no Iehova, no reira kua manako mai matou e e puapinga tikai i te taokotai kapiti atu ki te au taeake irinaki i ko i te au uipaanga Kerititiano. (Ebera 10:25) Noatu e ngata to matou turanga pae moni, kua akakoro matou kia kore e akaruke i te au uipaanga e te au akaputuputuanga​—⁠noatu e e mamao te ngai ka teretere atu ei matou. Ta matou angaanga orometua​—⁠te o maira te apiianga i te Pipiria ki te au tangata⁠—​kapiti mai te aere anga ki te au ngai mamao. E na runga ana matou i te patikara matini kare i te motoka i te rave i teia angaanga. E tika rai, e rua rai tangata ka akatikaia i te akaoro i te patikara matini i te taime okotai.

Inara kare te aiteanga o teia e ka akaiti mai matou i to matou taime i roto i te angaanga orometua. Tetai tua ra, kua akapou maata taku vaine e ta maua tamaine i to raua taime i te tuatua anga no runga i te Pipiria ki tetai ke. I tetai taime e aere ana raua e ono ki te varu kiro mita i te taime okotai i te apiianga i te Pipiria i te kainga ki te aronga e inangaro maira. E tauta katoa ana maua ko taku tamaiti i te akapou maata atu i te taime i te apiianga i te Pipiria ki tetai ke.

I teianei kua meitaki mai to matou turanga i te pae moni. Inara, mei tei tupu kia matou, kua kite mai matou ei ngutuare tangata e auraka e manako maata atu i te au apinga materia. Kua kite katoa mai matou e auraka e apiapi maata rava no runga i te au apinga kare e rauka ana ia matou i te akaaere. Kua kite mai matou i te manako o Salamo 55:22 ei akamaroiroi anga tikai. Te karanga ra te reira e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” Kua kite tikai mai matou e e 100 patene te tikaanga o taua au tuatua ra i te tuatau e manamanata ra matou i te pae moni!​—⁠Orongaia mai.