Te Manako o te Pipiria

Eaa te ra Akavaanga?

Te karanga ra te Pipiria e “kua tuku [te Atua] i tetai ra koia oki kua akakoro aia i te akava i te au tangata i te enua nei.” (Angaanga 17:31, NW) Kare te manganui o te au tangata e ariki ana i te manako e ka raveia tetai ua atu tu akavaanga kia ratou. Te manako akapera ra ainei koe?

ME KOIA ia, ka akapumaana ia koe i te kite anga i te tikaanga e e akanoonooanga aroa te Ra Akavaanga te ka apai mai i te au akameitakianga maata ki te ngutuare tangata katoatoa​—⁠kapiti mai te aronga tei mate. (Mataio 20:28; Ioane 3:16) Eaa ka anoanoia ai te Ra Akavaanga? Eaa tikai te ka tupu i taua “ra” ra?

Ra Akavaanga​—⁠Eaa ka Anoanoia Ai?

Te tuku anga te Atua i te nga tangata ki runga i te enua, kare aia i akakoro ana i te reira ei ngai timataanga i te au tangata no te oraanga i te tuatau ki mua i roto i tetai ao ke. Kua anga ra aia i te nga tangata kia noo ki runga i te enua e tuatau ua atu. Noatu e e tu apa kore to raua i te pae kopapa e te pae manako, kua meameaau nga tokorua mua i te Atua. Tei tupu mai, kua ngere raua te manakonakoanga no te ora mutu kore e kua apai mai i te ara e te mate ki ta raua uanga katoatoa.​—⁠Genese 2:​15-17; Roma 5:⁠12.

E tai tauatini mataiti te tuatau no te Ra Akavaanga e ka rauka akaou mai i te au tangata te tikaanga tei ngaro ia Adamu raua ko Eva. * E akara ana e te karanga ra a Angaanga 17:31, tei taikuia mai i runga akenei e, ka o atu te aronga e noo ra ki runga ‘i te enua tangataia’ ki roto i te Ra Akavaanga. (NW) Te aronga ka rauka mai ia ratou te akavaanga tau ka noo ki runga nei i te enua e ka rekareka i te oraanga mutu kore i roto i te au turanga apa kore. (Apokalupo 21:​3, 4) No reira, ka tauturu te Ra Akavaanga i te akatupu i ta te Atua akakoroanga mua no te au tangata e te enua.

Ko te Karaiti ko Iesu te Akava ikiia a te Atua. Te karanga ra te Pipiria e ka ‘akava a Iesu i tei ora, e i tei mate.’ (2 Timoteo 4:⁠1) Koai ma ‘tei ora’ te ka akavaia? Akapeea tei mate ra e ora akaou mai ei ki runga ‘i te enua tangataia’?

Ka Akava a Iesu i ‘Tei Ora Ra’

Te vaitata atu nei tatou ki te openga o teia akatereanga o te au mea nei tei totouia mai, me takore te Atua i te au tuanga ravarai o te taiate tangata kino e te akaatea anga i te aronga kino.  Te aronga ka ora mai i te openga o teia akatereanga ko ratou te aronga “te ora ra” te ka akavaia.​—⁠Apokalupo 7:​9-14; 19:​11-16.

I taua tuatau o te akavaanga, te ka ope e 1,000 mataiti, ko te Karaiti ko Iesu ma te au tane e te au vaine e 144,000 tei akatuakaouia ki te rangi te ka tutara ki rungao i te enua. Ka riro mai ratou ei ui ariki e te kau taunga, i te oronga anga i te au puapinga no to Iesu atinga oko e te akameitaki marie mai anga i te turanga apa kore o te au tangata akarongo mou i te pae kopapa e te pae manako.​—⁠Apokalupo 5:10; 14:​1-4; 20:​4-6.

I te tuatau o te Ra Akavaanga, ka tapuia a Satani e te au temoni kia kore e tamanamanata i te au angaanga a te tangata. (Apokalupo 20:​1-3) Inara, i te openga o te Ra Akavaanga, ka akatikaia a Satani kia timata i te tu tiratiratu o te au tangata ravarai e ora ra. Ko te aronga tei vai tiratiratu ki te Atua ka autu atu ratou i te timataanga, tei kare i rauka ana ia Adamu raua ko Eva. Ka akavaia ratou kia tau no te oraanga mutu kore i runga i te enua Parataito tei akaouia. Ko te aronga tei iki i te meameaau i te Atua ka takore takiriia atu, pera katoa a Satani e te au temoni.​—⁠Apokalupo 20:​7-9.

Akava Anga “i Tei Mate”

Te karanga ra te Pipiria e ka ‘tu katoa mai ki runga’ te aronga tei mate i te tuatau o te Ra Akavaanga. (Mataio 12:41) Kua karanga a Iesu e “te aere mai nei te ora ka rongo te aronga katoa i roto i te au menema akamaara anga i tona reo e ka aere mai ki vao, te aronga tei rave i te au mea meitaki ra i te tuakaouanga no te ora, te aronga tei rave i te au mea kino ra i te tuakaouanga akavaanga.” (Ioane 5:​28, 29, NW) Kare teia e taiku ra ki te au meta tei takake mai mei te aronga tei mate. Kare a te aronga i mate ra tuatua e kitea e kare te meta e ora mai mei te mate. (Koheleta 9:5; Ioane 11:​11-14, 23, 24) Ka akatuakaou mai a Iesu i te aronga i mate ki runga nei i te enua.

Ka akatumuia ainei te akavaanga no te aronga tei akatuakaouia mai no ta ratou i rave i mua ake ka mate ei ratou? Kare. Te apii maira te Pipiria e “ko te tangata oki i mate ra, kua matara ïa aia i te kino nei.” (Roma 6:⁠7) No reira, mei te aronga i ora mai i te openga o teia akatereanga, te aronga tei akatuia mai ki runga i te enua ka akavaia no “ta ratou au angaanga” i te tuatau o te Ra Akavaanga. (Apokalupo 20:​12, 13) Tei runga te reira i ta ratou ka rave i te openga, e ka riro teia ei tuakaouanga no te ora mutu kore me kore ei tuakaouanga no te takoreanga. E manganui te aronga te ka akatuakaouia mai, ka kite mai ratou i te Atua ko Iehova no te taime mua e e tana au umuumuanga no te oraanga. Ka rauka ia ratou te tikaanga no te aru rotaianga i te anoano o te Atua e te rauka anga te ora mutu kore i runga i te enua.

Kare e Tumu no te Mataku

Ka riro te Ra Akavaanga ei tuatau kia apiiia mai e te Atua pera katoa e tuatau no te aronga te ora ra kia taangaanga i ta ratou i kite mai e kia mataora i te au akameitakianga tei tupu mai. E akamanako ana i toou tu rekareka i te taokotai akaou anga ki te aronga akaperepere tei akatuia mai e te riro kapiti anga kotou ei au tangata apa kore!

Ka akatika te Atua kia timata a Satani i te tu tiratiratu o te au tangata ora i te openga o te Ra Akavaanga. Inara kare e anoanoia kia taitaia me kore kia mataku. I te openga o te Ra Akavaanga, kua papa meitaki te katoatoa e ora ra i te aro atu i teia timataanga openga. Ka riro te Ra Akavaanga ei tuanga no te akatupuanga i ta te Atua akakoroanga i te takore atu i te au tupuanga ravarai no te meameaau mua anga i te Atua i roto i te kainga i Edene.

[Tataanga Rikiriki i Raro]

I MANAKO ANA AINEI KOE?

● Eaa te Ra Akavaanga?​—Angaanga 17:⁠31.

● Koai ma te ka akavaia?​—2 Timoteo 4:⁠1.

● Eaa te roa o te Ra Akavaanga?​—Apokalupo 20:​4-6.

[Tataanga i te kapi 11]

E akamanako ana i toou tu rekareka i te taokotai akaou anga ki te aronga akaperepere tei akatuia mai

[Au Tutu i te kapi 10]

I raro ake i ta Karaiti tutaraanga, ka akatuakaouia mai te aronga tei mate ki runga i te enua parataito