Ka Vai Tinamou Ainei to Korua Akaipoipo?

Te akatika ra te au pu o te are e kua kino te turanga o to ratou are, inara kua iki ratou i te akaou i te reira.

KA INANGARO ainei koe i te rave katoa i te reira ki toou akaipoipo? Me koia ia, ka akamata koe kiea? E tamata i te au manako i raro akenei.

1 Rave i tetai ikianga.

E akatika ki toou tokorua e ka angaanga kapiti korua i te akatupu akaou anga i te au i roto i to korua akaipoipo. E tata i taau au ikianga ki runga i te pepa. Me aru tikai korua i teia, ka riro mai te akatinamou anga i to korua akaipoipo ei angaanga kapiti na korua.​—Koheleta 4:​9, 10.

2 Akataka i te manamanata.

Eaa te tamanamanata ra i to korua akaipoipo? E tai aerenga tuatua, e tata ki raro e eaa taau e manako ra te ngere ra i roto i te akaipoipo me kore taau e inangaro ra kia taui. (Ephesia 4:​22-​24) Tei maramaia, ko te manamanata taau i kite mai penei e tuke rai ki ta toou tokorua e kite maira.

3 Akanoo i tetai akakoroanga.

Eaa taau e inangaro ra kia tupu ki toou akaipoipo i roto i te ono marama? Eaa te au akameitakianga tikai taau e inangaro ra i te kite? E tata i taau akakoroanga ki runga i te pepa. Me te marama ra koe e eaa taau e anoano ra i roto i toou akaipoipo, ka mama ua i te itae i taau akakoroanga.​—1 Korinetia 9:​26.

 4 Taangaanga i te akoanga Pipiria.

Me kite mai koe i toou manamanata e te akataka anga i te au akameitakianga taau ka inangaro i te rave, e akara ki roto i te Pipiria no te tauturu. E angaanga ana ta te reira au kaveinga e ka angaanga ua atu rai. (Isaia 48:17; 2 Timoteo 3:​17) Ei akaraanga, te akamaroiroi maira te Pipiria ia korua kia akakore i te ara. E tika rai, te karanga ra te Pipiria e “ko tona ïa kakā koia i akakore i te ara.”​—Maseli 19:11; Ephesia 4:​32.

Noatu e kare taau tauta anga e puapinga ana i te akamataanga, auraka ra e tuku i te au! Te ripoti maira te puka The Case for Marriage i te au tupuanga akamaroiroi anga no runga i tetai apii, i te akakite anga e: “E mea poitirere tikai tei tupu mai: e 86 patene au tokorua akaipoipo kare e mataora ana, te noo akaipoipo ua ra noatu te manamanata, kua kite mai e, e rima mataiti i muri mai, mataora atu to ratou akaipoipo.” Pera katoa te au tokorua tei akakite mai e kare ratou e mataora ana, kua kite mai ra e e mataora tikai ratou.

Penei te tika ra te reira kia korua. Kua kite mai te aronga nenei o teia makatini, te Au Kite o Iehova, e te oronga maira te Pipiria i te au kaveinga tau no te au tokorua akaipoipo. Ei akatauanga, e maata te au akaipoipo tei meitaki mai me aroa, me takinga meitaki e me akakore puareinga ua te au tokorua i te ara a tetai e tetai. Kua kite mai te au vaine i te puapinga no te akaari anga i “te ngakau maru e te muteki ua,” e kua kite mai te au tane i te au akameitakianga no te kore i rotoriri atu i ta ratou vaine.​—1 Petero 3:4; Kolosa 3:​19.

Puapingaia teia au kaveinga Tuatua Tapu, no te mea ko te Tumutata o te Pipiria, te Atua ko Iehova tei akanoo mai i te akanoonooanga no te akaipoipo. Eaa ka kore ei e pati ki te Au Kite o Iehova no tetai atu au akakiteanga e akapeea te Pipiria i te tauturu anga i to korua akaipoipo? *

[Tataanga Rikiriki i Raro]