Akaketaketa Anga i Taau i Akakoro

“Ko te tauta anga pakari no te akamutu anga ko tetai mea puapinga rava atuia no te aronga kai avaava tei akamutu tikai i te kai avaava.”​—“Stop Smoking Now!”

MAMA ua te tuatua, me inangaro koe i te akamutu i te kai avaava, e mea tau kia akakeu maroiroiia koe i te rave i te reira. Akapeea koe i te akaketaketa anga i taau i akakoro? Okotai tumu, e akamanako ana e ka meitaki atu koe me akamutu koe i te kai avaava.

Kare taau moni e pou. E tauatini ua atu tara e pou ana i te mataiti no te kai anga e tai paketi avaava i te ra. “Kare rava au i manako ana e eia moni e kaimoumouia ana ki runga i te avaava.”​—Gyanu, Nepara.

Ka maata atu toou mataora i roto i te oraanga. “E meitaki tikai toku oraanga te akamutu anga au i te kai avaava, e te meitaki ua atura te reira.” (Regina, Aperika Tonga) Me akamutu te tangata i te kai avaava, ka meitaki atu to ratou tongi anga e te ongi anga, e ka maata atu te maroiroi e ka meitaki atu te akaraanga o to ratou kopapa.

Ka meitaki mai toou oraanga kopapa. “Te akamutu anga i te kai avaava ka maata e ka tupu viviki mai te au akameitakianga i te pae kopapa ki te au tane e te au vaine tukeke te mataiti.”​—Au Ngai Maata no te Akaaere e te Paruru Maki i Marike.

Ka akamaata atu koe i toou uaorai irinakianga papu. “Kua akamutu au i te kai avaava no te mea kare au i inangaro ana kia riro mai te avaava ei pu noku. Inangaro au e ko au te pu o toku uaorai kopapa.”​—Henning, Tenemaka.

Ka puapingaia toou ngutuare e te au oa. “Ko te kai avaava . . . te takino ra i te oraanga kopapa o te aronga takapini ia koe. . . . Te akaari maira te au apiianga e te tamate ra te ngai kai avaava e tauatini ua atu tangata i te mataiti okotai no te maki cancer ate mama e te maki pukuatu.”​—Ngai Akaaere Anga Maki Cancer i Marike.

Ka akamareka koe i Tei Anga mai ia koe. “E aku au akaperepere e . . . e tamā ua tatou ia tatou uaorai i te au viivii katoa o te kopapa.” (2 Korinetia 7:⁠1) “Kia tuku atu kotou i to kotou au kopapa . . . tapu, e tau oki i te Atua.”​—Roma 12:1.

“Te marama anga au e kare te Atua e ariki ana i te au mea te akaviivii ra i te kopapa, kua iki au i te akamutu i te kai avaava.”​—Sylvia, Paniora.

Maataanga o te taime, kare e rava ua te akakeu anga maroiroi. Penei te anoano katoa ra tatou i te tauturu a tetai ke, kapiti mai te ngutuare e te au oa. Eaa ta ratou ka rauka i te rave?