Akaraanga i te Ao

Te karanga ra tetai reta akamanaia e te Pope Benedict XVI e: “E anoano maata tikai tetai . . . kia taui akaouia te United Nations Organization, e pera katoa te au ngai o te turanga puapinga e te turanga pae moni o te pa enua, kia rauka i te ngutuare tangata o te au patireia te tauturu anga tika tikai.”​—L’OSSERVATORE ROMANO; na ratou te tataanga arara.

“Ko te toru o te tangata Ukarania e puipui ana e tai paketi avaava i te ra okotai.”​—EXPRESS, UKARANIA.

I roto ia Marike, e 44 patene tamariki tamaroa mapu tei uiuiia e kua karanga e “i kite ana [ratou] e tai tutu takaua o tetai oa tamaine apii i runga i te komupiuta me kore i runga i te terepaoni apaipai aere.”​—TIME, U.S.A.

“Tetai Tupuanga Kino Pakari”

Ko te tamaki, te maro, te tinamou kore o te poritiki, te kake maataanga te moni o te kai, e te putaua, te tuku ra i te au tangata ravarai ki roto i “tetai tupuanga kino pakari,” i karanga ai te Associated Press. Kua tere atu e tai pirioni tangata e matepongi ra i teianei ao. Kia tau ki ta Josette Sheeran o te UN World Food Program e, “ko tetai ao matepongi e ao kino te reira. . . . Me kare e kai, e toru rai a te tangata ikianga: Ka akatupu pekapeka, ka neke me kore ka mate ratou. Kare tetai o teia au ikianga e arikiia ana.” Tei maata atu, te kake viviki ua atura te numero o te aronga matepongi i to te numero o te tangata i teianei ao. I roto katoa i te au enua puapinga, te maata ua atura ki te 15.4 patene te numero o te au tangata kare e kaikai meitaki ana.

Puapinga te Tatau i te Tuatau Moe

Me tatau te au metua ki ta ratou tamariki i te tuatau ka moe ei ratou, maata atu ta ratou ka rave i to te tamoe ua anga ia ratou. Te karanga ra te aronga kimikimi e te akameitaki ra teia angaanga i te tu karape o te au tamariki no te reo, te tauturu ra i te tereni i to ratou manako na te apiianga ia ratou kia mou e kia uri i te au kapi, e te akameitaki anga i to ratou manako. “Te mea puapinga rava atu, . . . e ko te tatau maata anga e tuatau ia no te akamanako kapiti anga e te akarongo meitaki anga te metua e te tamaiti,” i karanga ai te nuti pepa The Guardian. “Te akaketaketa ra teia i te tatauanga ei angaanga mataora.” Kia tau ki ta te Poropeta ko Barry Zuckerman, e arataki ra i te apiianga, “ka inangaro te tamariki i te tatau i te au puka no te mea e tatau kapiti ana [ratou] i te reira ki te tangata ta ratou e inangaro ra.”

Mataora te ua Puakatoro, Maata te U

“Maata atu te u ka rauka mai i tetai ua puakatoro e ingoa tona i to te ua puakatoro kare ona ingoa,” i karanga ai te au taineti i ko i te Univetiti o Newcastle, i Engarani. E tika rai, te akono takitai anga i te ua puakatoro ka akamaata atu i tana u ki te 280 rita i te mataiti okotai. No teaa ra? “Mei tetai tangata e ariu meitaki maira ki te amiri anga, ka mataora e ka maru te au ua puakatoro me akapouia te taime i te akono ia ratou,” i karanga ai te Dr. ko Catherine Douglas no te Apii univetiti o te Ngai Tanu Kai e te Akatupu Kai i Runga i te Pama. “Te akaari maira ta matou apiianga i ta te au tangata tanutanu meitaki i irinaki ana no tetai tuatau roa,” i akamarama mai ei aia. “Na te akamanako anga i te puapinga o te ua puakatoro takitai, te kapiki anga i te ingoa o te puakatoro me kore te tuatua anga ki te manu e mamaata maira, ka akameitaki atu tatou i te turanga o te manu e te manako no te au tangata, e ka akamaata katoa atu i te u.”