Eaa Tei Roto i te Pukuatu Panapana?

● E ngai puapinga toou pukuatu no te aerenga o te ara toto e e apinga angaanga pakari tikai. Me e tangata mamaata koe, e panapana ana toou pukuatu i runga atu i te 100,000 taime i te ra okotai. Me te akangaroi ra koe, te angaanga pakari ra te au uaua o toou pukuatu​—e rua taime i to te au uaua o toou vaevae me oro viviki koe. E me ka tau, ka taki rua te panapana anga o toou pukuatu i roto i te rima tekoni. I roto i te aronga mamaata, tukeke me pamu viviki mai te pukuatu i te toto mei te 5 rita i te miniti okotai​—vaitata atu mei te 5 rita o te toto i roto i te kopapa—​ki te 20 rita i te miniti okotai i te tuatau akamatutu anga i te kopapa.

Te akaaereia ra toou pukuatu panapana e te au tuanga o te ara uaua metua tei maani meitakiia. Na teia ara uaua metua e tauturu ana i te tuanga o te pukuatu i runga (atria) kia mimiro e kia puena i mua ake i te tuanga o te pukuatu i raro (au ventricle) na te taroaroa anga i te mimiro anga e te puena anga o te tuanga i raro, no tetai manga tekoni. Te mea umere ra, ka akarongo atu te au taote na roto i ta ratou apinga akarongorongo i te panapana anga o te pukuatu me tapiri te puangiangi, kare ra no te pateanga o te au uaua o te pukuatu.

Pirioni Taime te Panapana Anga

Mei tei matauia, tukeke te panapana anga te pukuatu o te manu tei tau ki te mamaata o tona kopapa​—koia oki, te maatamaata atu o te manu, marie atu te panapana o te pukuatu. Ei akatauanga, e panapana ana te pukuatu o te erepani e 25 taime i te miniti i te avereti, ko te manu kaneri e 1,000 taime i te miniti te panapana anga tona pukuatu! Ka marie mai te panapana o te pukuatu o te au tangata mei tetai 130 taime i te miniti me anauia mai ratou, ki tetai 70 taime me mamaata mai ratou.

Te maataanga o te au animara e manakoia ana e e pirioni ua atu taime e panapana ana to ratou pukuatu. No reira, e panapana ana te pukuatu o te kiore toka e 550 taime i te miniti, e ka ora atu mei tetai 3 mataiti; ko te toora auika ra, mei tetai 20 taime i te miniti te panapana anga tona pukuatu, penei ka ora atu mei tetai 50 mataiti. E tuke ra te au tangata. Te akara anga i te panapana anga o to tatou pukuatu, tano tikai ka roa atu to tatou oraanga mei tetai 20 mataiti. Inara, ko tetai pukuatu meitaki o te tangata, ka panapana e toru pirioni taime me kore i runga atu e ka ora atu aia e 70 me kore e 80 mataiti! *

Noatu ra, kare tetai o tatou e inangaro kia tarimitiia te roaanga o to tatou oraanga ki tetai numero tei akanooia no te panapana anga o te pukuatu, no te mea, te inangaro ra te au tangata kia ora e tuatau ua atu. E tika rai, e tu natura teia inangaro, no te mea kua tuku mai te Atua i te reira ki roto ia tatou. Tei maata atu, te vaitata mai nei te tuatau ka takoreia te ara​—tei akatupu i te mate. (Roma 5:12) Te ka tupu mai, ka “kore rava te mate,” i karanga ai a Apokalupo 21:3, 4.

[Tataanga Rikiriki i Raro]

[Au Tutu i te kapi 22]

(No runga i teia, akara i te puka)

TUTU O TE PUKUATU

Tua katau i runga

Tua kaui i runga

Tua katau i raro

Tua kaui i raro