Ui te au Mapu E

Ka Akameitaki Atu Ainei te Ainga i to Maua Pirianga?

E rua ua rai marama to Heather aru anga ia Mike, inara manako aia e kua roa tona kite anga iaia. E tuku putuputu ana raua i te karere ki tetai e tetai, roa te ora e tuatua ana raua i runga i te terepaoni, e mama ua ia raua i te komunikeiti ki tetai e tetai! Inara i teianei, ia raua e noo ra i roto i te motoka e paka ra i raro ake i te po marama, kare ko te pukapuka ua anga ta Mike e inangaro ra.

E rua marama i pati, kua mou rima ua a Mike raua ko Heather e te ongi poto ua. Kare a Heather e inangaro ana i te rave i te ainga. Inara kare aia e inangaro ia Mike kia akaruke iaia. Kare e tangata ke atu i manako ana iaia e e manea e e puapinga tikai. ‘I tetai tua,’ kua karanga aia kiaia uaorai e, ‘Te inangaro nei maua ko Mike ia maua, . . . kare ainei?’

TE KITE nei paa koe e eaa te ka tupu i roto i teia akaraanga. Inara kare koe e kite atu ana e eaa te taui anga ta te ainga ka akatupu tikai kia Mike raua ko Heather​—e kare te reira e meitaki atu. E akamanako ana:

Me aati koe i te akatereanga a te ture, mei te ture no te gravity, ka tupu te kino kia koe. Aite katoa te reira me aati koe i te ture akono tau, mei tei akakiteia mai e: “Kia kore kotou e akaturi [“moeaana,” NW].” * (1 Tesalonia 4:⁠3) Eaa te au kino te ka tupu mai no te akarongo kore anga ki taua akauenga ra? Te karanga ra te Pipiria e: “Ko te tangata ra i akaturi [“moeaana,” NW] ra, kua  takinga-kino ïa i tona uaorai kopapa.” (1 Korinetia 6:18) E tika ainei te reira? Akara e me ka rauka ia koe i te akakite mai i te au mea kino e toru i raro akenei te ka tupu ki te aronga te piri ainga ra i mua ake i te akaipoipo.

1. ․․․․․

2. ․․․․․

3. ․․․․․

E akara i teianei i taau i tata. Kua kapiti mai ainei koe i te au apinga mei te au maki piri no te ainga, te nui kare e inangaroia, me kore te ngere anga te marekaanga o te Atua? E au tupuanga kino tikai te reira te ka tupu mai ki tetai ua atu tangata tei aati i te ture akono tau a te Atua no runga i te moeaana.

Noatu ra, ka timataia rai koe. ‘Kare tetai apinga e tupu kiaku,’ ko taau ia ka manako. Ko te tikaanga, kare ainei te katoatoa e rave ana i te ainga? E akatietie ana toou au oa no runga i ta ratou angaanga ainga, e i te akaraanga kare ratou e mamae ana. Penei, mei to Heather akaraanga rai i mua akenei, te manako ra koe e ka akavaitata te ainga ia korua ko toou tokorua. Inara, koai te inangaro ra kia aviriia mai e kare i piri tane e kare i piri vaine ake? Kare ainei e meitaki i te akatika i te rave i te reira?

E tapu ana e e akamanako! Te mea mua, kare te katoatoa e rave ana i te reira. E tika, penei kua tatau ana koe i tetai tareanga te akakite maira i tetai aka numero o te au mapu tei rave i te ainga. Ei akaraanga, te akaari maira tetai apii i Marike e i te tuatau e akaoti atura ratou i ta ratou apii teitei, e 2 i roto i te 3 mapu i taua enua ra kua rave i te ainga. Tera te aiteanga e e 1 i roto i te 3​—e aka numero tikai—​kare i rave i te reira. I teianei, akapeea ra te aronga te rave ra i te reira? Kua kiteaia mai e te aronga kimikimi e e maata taua au mapu ra tei kite mai i te manamanata.

Manamanata #1: TAITAIA. Maata te au mapu tei piri ainga ana i mua ake i te akaipoipo te karanga ra e kua tataraara ratou i muri mai.

Manamanata #2: IRINAKI KORE. I muri ake te rave anga i te ainga, e akamanako ana te tokorua e, ‘Koai ua atu tana i piri ainga ana?’

Manamanata #3: TIRATIRATU KORE. I muri ake te rave anga i te ainga, maataanga o te taime e akaruke ana tetai tamaiti i tona oa vaine e kua neke atu ki tetai ke.

Manamanata #4: PAPU KORE. I roto rai iaia, e inangaro ana tetai tamaine i tetai tangata te ka paruru iaia, kare e kia akavare iaia.

Kapiti katoa ki to runga akenei, e akamanako ana i teia: E manganui te au tamariki tamaroa e  tuatua ana e kare rava ratou e akaipoipo i tetai tamaine kua rave ana i te ainga. No teaa ra? No te mea te inangaro ra ratou i tetai tamaine viivii kore!

Kua poitirere ainei koe​—penei te akariri ra te reira ia koe? Me koia ia, me e tamaine me kore e tamaroa koe, e akamanako i teia: Tuke rai te turanga tika tikai o te ainga i mua ake i te akaipoipo i to tei akaariia mai i roto i te au teata e i runga i te tivi. E maani ana te au pitiniti tamataoraanga i te angaanga ainga a te au mapu ei mea reka tikai e te akariro ra i te reira ei akaraanga tika tikai no te inangaro. Inara auraka e vavare! Ko te aronga te tauta ra i te maro ia koe ki roto i te angaanga ainga te kimi ra ratou i to ratou uaorai meitaki. (1 Korinetia 13:4, 5) I tetai tua, ko te tangata te inangaro ra ia koe ka akakino tikai ainei aia ia koe i te pae kopapa e i te pae manako ngakau? (Maseli 5:​3, 4) E ko tetai ua atu te inangaro ra ia koe ka timata tikai ainei aia ia koe kia akakinoia toou pirianga ki te Atua?​—Ebera 13:4.

Ko te tikaanga, me rave koe i te ainga i mua ake ka akaipoipo ei, te akakino ra koe ia koe uaorai na te oronga anga i tetai apinga akaperepere tikai ki tera tangata. (Roma 1:24) No reira rai i manako puapinga kore ua ai te manganui i muri ake, mei te mea rai e kua akatika puapinga kore ua ratou kia keiaia tetai tuanga puapinga mei ia ratou! Auraka e akatika i te reira kia tupu kia koe. Me maro mai tetai tangata ia koe kia rave i te ainga na te tuatua mai anga e, “Me inangaro toou iaku, e rave koe i teia,” e pau papu tikai atu ra e, “Me inangaro toou iaku, kare koe e pati mai i te reira!”

E mea puapinga maata toou kopapa i te tuku ua atu. E akaari e e tu maroiroi toou i te akarongo ki te akauenga a te Atua, e auraka e rave i te moeaana. I na, me akaipoipo koe a tetai ra, ka rave ei koe i te pirianga ainga. E ka rekareka maata tikai koe i te reira, kare e manamanata, kare e tataraara, e kare e manako tinamou kore mei tei tupu putuputu ana i muri ake te rave anga i te ainga i mua ake ka akaipoipo ei.​—Maseli 7:22, 23; 1 Korinetia 7:3.

[Tataanga Rikiriki i Raro]

KIA AKAMANAKO

● Noatu e e akaraanga reka tikai ki te kopapa ara te ainga i mua ake ka akaipoipo ei, eaa ra i tarevake ei kia koe?

● Eaa taau ka rave me pati mai tetai tangata kia rave korua i te ainga?

[Pia/​Au Tutu i te kapi 27]

TA TOOU AU OA E TUATUA RA

“Te tuatua ua anga e kare, kare e tapu i tetai tangata i te pati akaou mai. Tei runga ra i te tu e patoi ra koe. Me tuatua maru ua koe e kare e kare e papu ana, ka kite uaia atu te reira. Ka anoanoia koe kia papu tikai!”

“Kare e akarongoia mai me tuatua ua e kare. Kare rai e puapingaia me akamarama koe i toou irinakianga. Kua kite ana au i tetai pae tei akapaapaa e kua rauka ia ratou i te ‘akavare’ i tetai Kerititiano. I tetai au taime e meitaki atu i tea karuke. E mea ngata i te rave, inara ka puapingaia te reira.”

“Ei Kerititiano, e au tu toou te ka akamareka atu i tetai ke. Kia matakite e e kopae atu me patiia mai koe kia rave i tetai angaanga tau kore. E akangateitei i taua au tu ra. Eiaa e rave i tetai apinga ka tataraara koe a muri mai!”

[Au Tutu]

Diana

James

Joshua

[Pia i te kapi 28]

KIA RIRO EI TUMUTOA NONA!

Me te aere kapiti ra korua, te inangaro tikai ra ainei koe i toou oa vaine? E akaari i reira kiaia e . . .

● te maroiroi ra koe i te turuturu i ta te Atua au ture

● ka rauka ia koe i te kopae i te au turanga no te timataanga

● te inangaro ra koe i te akono i tona uaorai anoano

Me rave koe i te reira, penei ka aite te manako ngakau o toou oa vaine mei to te vaine Sulami rai, tei tuatua e: “Noku oki taku akaperepere, e nona katoa oki au nei.” (E Pe’e na Solomona 2:16) Na roto i te reira tu, ka riro koe ei tumutoa nona!

Akara ia Maseli 22:3; 1 Korinetia 6:18; 13:4-8.

[Pia i te kapi 28]

TAMANAKOANGA

No runga i te pirianga ainga ki tetai tangata me kore ki tetai vaine, ko te ture meitaki kia aruia ko teia: Me kare koe e inangaro i toou nga metua kia kite mai i taau e rave ra, auraka e rave i te reira.

[Tutu i te kapi 28]

Rave anga i te ainga i mua ake i te akaipoipo te akakino ra i ta te Atua apinga aroa. Aite te reira ki tetai tutu manea ta tetai tangata i oronga atu kia koe e kua tuku koe ei moenga i mua i te ngutupa