Te Manako o te Pipiria

Ka Tutaki Ainei Koe i te au Angaanga Akonoanga?

I ROTO i te au enua e manganui, e tiati ana te au arataki akonoanga tei karanga e e Kerititiano ratou e te au akonoanga kare i te Kerititiano i te au angaanga akonoanga. Ko teia au angaanga nei te kapiti maira i te papetito, te akaipoipo, me kore te tanu mate. Ka tere atu te moni no te tutakianga ki te anere, me kore ki te tauatini tara.

E tutakiia ana tetai au orometua e te kavamani no te rave anga i te au angaanga na te orometua e rave e te akatuera anga i te au angaanga maani ture na roto i te pure i te au ra ravarai. E ariki ana te au tangata i taua au angaanga ra, e e kaiou ta te au akonoanga ka anoanoia kia tutakiia. Inara te turuturu ra ainei te Pipiria i taua au peu ra no te tiati anga i te au angaanga akonoanga me kore te maro anga i te au tangata kia tutaki i te reira?

E “Are Oko Anga Apinga” Ainei?

Ia Iesu Karaiti i runga nei i te enua, kua taangaanga te au arataki akonoanga ngati Iuda e tetai aronga ke i tetai au atianga akonoanga ei ravenga akapuapinga anga ia ratou, i te tuatau o te Pasa. Kua ariki ainei a Iesu i teia peu? Kare! Ko te tikaanga, te akakite maira te Pipiria kia tatou e kua “riringi atura [aia] i te moni a te aronga oko moni ra, e akatauri atura i ta ratou au papa.” Kua tuatua aia e: “Eiaa e akariro i te are o taku Metua ra, ei are oko anga apinga.”​—Ioane 2:14-16.

Kua tupu tetai turanga aiteite i te tuatau o te peroveta ko Mika, tei ora ana i te varu anere mataiti M.T.N. Te ripoti maira te Pipiria e kua ‘akaviivii te au arataki akonoanga o Iseraela i te tuatua-tau,’ e “tei te ario e apii ei” te kau taunga. Inara, i taua taime rai, kua karanga ratou e te turuturu maira te Atua ia ratou, i te na ko anga e: “Kare ainei a Iehova i rotopu ia tatou nei?” (Mika 3:9, 11) Kare te Atua ko Iehova i rotopu ia ratou e turuturu ra ia ratou. Inara, kare aia i reka tikai ana i to ratou tu e kua akakite taka meitaki atu i te reira na roto i tana peroveta.

I teia tuatau e maata te au arataki akonoanga te taangaanga ra rai i taua au ravenga noinoi, i te akariro anga i to ratou ngai akamorianga ‘ei are oko apinga.’ Ko te tikaanga, te piri atura te katoaanga o te au akaaere akonoanga ki roto i te angaanga okooko, maataanga o te taime e puapinga ana te pitiniti no te oko anga i te au tiki e tetai ua atu au apinga purepure a te akonoanga. *​—1 Ioane 5:21.

“E Mea o Mai ua to Kotou, e Oronga ua Atu Oki Kotou”

I te akaue anga i tana au apotetoro kia tutu aere i te tuatua meitaki, kia akaora i te maki, e kia akatu mai i tei mate ra, kua akakite a Iesu e: “E mea o mai  ua to kotou, e oronga ua atu oki kotou.” (Mataio 10:7, 8) Ae, kare tana au pipi mou e tiati ana i ta ratou angaanga. Pera katoa, kua akanoo a Iesu i tetai akaraanga na te matuapuru anga i tetai ke ma te kore e pati atu i te tangata kia tutaki mai iaia.

I te aru anga i te akaraanga ta Iesu i akanoo, kua rave te apotetoro ko Paulo i tana angaanga orometua ma te kore e tutaki. (1 Korinetia 9:18) Me inangaro ra aia i tetai moni, ka rave aia i te angaanga ei tangata maani are kakau. (Angaanga 18:​1-3) No reira, kua rauka iaia i te tuatua no runga iaia uaorai e tona au taeake mitinari e: “Kare oki matou mei tetai pae e iro i te tuatua a te Atua.” (2 Korinetia 2:17) Akapeea ra te kimi anga i tetai au moni na te putuputuanga, penei no te oko mai anga me kore te tarau anga i tetai ngai no te akamorianga?

‘Ko te Tangata Oronga ma te Rekareka ta te Atua e Inangaro Ra’

E rauka mai ana te moni a te Au Kite o Iehova e anoano ra na roto i te moni tauturu. Te taangaanga ra ratou i te kaveinga e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) No taua tumu ra, kare te Au Kite e tiati ana i ta ratou au puka me kore i te au angaanga akonoanga, mei te rave anga i te papetito, te akaipoipo, me kore te tanu mate. Kare katoa ratou e rave ana i te tuanga ngauru me kore i te pati aere i te meriki moni i ko i ta ratou au uipaanga. Ko tetai ua atu tangata te inangaro ra i te oronga ki te angaanga tutuanga i te ao katoa, ka oronga ratou na te tuku anga i te reira ki roto i te au pia akaputuanga i ko i to ratou au ngai akamorianga.

E tutaki ana te Au Kite o Iehova i te ao katoa i to ratou au Are Uipaanga Patireia, te au Are Uipaanga Akaputuputuanga, te au opati manga, e te au ngai neneianga, pera katoa ta ratou au tautaanga i te tauturu i te au tangata tei rokoia e te tumatetenga, na roto i te moni tauturu. Ko tetai aronga, mei te vaine takaua rai ta Iesu i akameitaki ana, penei manga ua ta ratou ka rauka i te oronga. (Luka 21:2) Ko tetai aronga ra e maata atu ta ratou ka rauka i te oronga. Noatu eaa te tu, ko te aronga te aru ra i te au kaveinga tei akanooia i roto i te Pipiria e te oronga ra te ka rauka ia ratou, te mareka ua ra to ratou ngakau, te rekareka ra i ta te Atua akameitakianga maata, e te mataora tika tikai ra.​—Angaanga 20:35; 2 Korinetia 8:12.

[Tataanga Rikiriki i Raro]

I MANAKO ANA AINEI KOE?

● Eaa ta Iesu i tuatua ki te aronga te rave ra i ta ratou pitiniti i roto i te iero?​—Ioane 2:14-16.

● Kua ariki ainei te Kerititiano te apotetoro ko Paulo i tetai tutaki anga no te au angaanga akonoanga?​—2 Korinetia 2:17.

● Ko teea tu oronga anga ta Iehova e mareka ra?​—2 Korinetia 9:7.

[Tataanga i te kapi 25]

“Eiaa e akariro i te are o taku Metua ra, ei are oko anga apinga.”​—Ioane 2:14-16