Kia Mataora i Toou Kara Pakiri

● Ko tetai au tangata i roto ia Aperika, te tua Tonga o Asia, te Karapieni, e te tua Itinga Rotopu e tamanako ana i te pakiri teatea ei turanga puapinga e te ngateitei. Tei tupu mai, e maata te numero o te au tane e te au vaine i roto i te reira ngai te taangaanga ra i taua au apinga ra i te akateatea i to ratou pakiri​—inara i tetai au taime e takino ana te reira i to ratou oraanga kopapa.

Tei roto i te au manongi akateatea pakiri te hydroquinone, e kemikara akateatea i te pakiri te ka takore i te au teera te akatupu ra i te melanin, i te akaiti mai anga i te tu natura paruru anga i te pakiri mei te vera kino o te koina ra (UV). Ka na roto te hydroquinone i te pakiri e penei ka takino atu te reira i te au kiko pakiri kare e rauka i te rapakauia. Te ka tupu mai ka ruaine vave te tangata. Ka akatupu katoa te kemikara i te cancer. Tei roto i tetai au manongi te au mercury, tetai apinga poitini katoa.

Pera katoa, te taangaanga ua anga i taua au apinga ra, ka akatupu i te maki pupu ki runga i te pakiri, ka topata kerekere e te teatea te pakiri, e ka akaparuparuia te pakiri e kare e rauka i te tuitui i te reira me motu. Me tae te au kemikara o tetai o teia au apinga akamanea ki roto i te ara toto, ka takino te reira i te ate, te kitini, me kore te roro​—e ka takino katoa i te au mero kopapa.

Te mea katakata ra, te inangaro ra tetai aronga pakiri kerekere i te akateatea i to ratou pakiri, te tauta pakari ra te maataanga o te tangata pakiri teatea i te akakerekere i to ratou pakiri. Te tika ua ra, e meitaki rai te murumuru ra. Ei akaraanga, ka rauka i te reira i te oronga mai i te vitamin D. Inara, e kino tikai me maata rava te murumuru ra me vera kino rava te ra. Te tikaanga, ko te akakerekere anga i te pakiri te akaari maira e kua kino takere te pakiri e te tauta ra i te paruru i te reira mei te verovero kino o te koina ra (UV). Inara kua kotingaia te reira paruruanga. Ei akatauanga, ko te akakerekere anga i te pakiri teatea, te oronga maira e a ua rai tuanga paruruanga mei te ra. Noatu e ka tauturu mai te parai putuputu anga i te manongi, kare ra te reira e paruru meitaki i te pakiri e tetai au maki cancer, pera katoa te meranoma.

No reira, te akamaroiroi maira te World Health Organization e kia “akaketaketaia te karere e kia mataora ua te au tangata i to ratou kara pakiri,” no te mea “e takainga puapinga te reira no te turuturuanga i te au tu ‘matakite anga i roto i te ra.’” Inara, ko te aronga te matakite tikai ra, te akamanako meitaki ra i ta te Pipiria e kapiki ra e ko te ‘tangata manea te ngakau,’ te ka meitaki mai i te au tuatau ka aereia, kare mei te pakiri kua karukaru!​—1 Petero 3:3, 4; Maseli 16:31.