Kimi i Tetai Tauturu

“Maroiroi maata to te tangata kia rave mai i tetai ra, e tika ia raua katoa kia rave atu iaia ra.”​—Koheleta 4:12.

ME TURUTURUIA mai tatou e tetai ke, ka puapinga atu tatou i te akakore atu i te enemi​—noatu e koai e eaa te reira enemi. Me inangaro koe i te akakore i te peu kai avaava, e meitaki kia akara koe ki toou ngutuare e te au oa no te tauturu​—me kore ki tetai tangata te ka turuturu tikai mai e te akakoromaki.

E akamanako ana i te kimi i te aronga tei akamutu i taua peu ra, no te mea ka akarongo e ka tauturu katoa mai ratou ia koe. “E puapinga tikai te turuturu anga a tetai aronga kiaku,” i karanga ai a Torben, e Kerititiano no Tenemaka. Kua tata a Abraham tei noo ana i Initia e: “Kua tauturu mai te inangaro tika tikai o toku ngutuare e te au taeake Kerititiano iaku kia akamutu.” Inara i tetai au taime kare e rava ana te turuturu anga a te ngutuare e te au oa.

“E 27 mataiti toku kai avaava anga,” i karanga ai tetai tangata ko Bhagwandas tona ingoa, “inara no taku i kite mai no runga i ta te Pipiria e tuatua ra no te au peu viivii, kua iki au i te akamutu. Kua tauta au i te akaiti mai i te kai avaava. Kua taui au i toku au oa. Kua aere au ki te aronga tauturu. Kare ra i puapingaia ana. I tetai po, kua pure akatenga au ki te Atua ko Iehova e kua pati kiaia kia tauturu mai iaku kia akamutu. I te openga, kua puapingaia au!”

Ko tetai mea puapinga te ka raveia ko te akapapa anga no te au manamanata taau ka aro atu. Eaa ra teia? Ka akamarama mai te atikara e aru mai nei.

[Pia i te kapi 5]

KA RAVE AINEI KOE I TE VAIRAKAU RAPAKAU?

Ko te au vairakau rapakauanga te tauturu ra i te aronga kai avaava kia akamutu, mei te apinga nikotini tapiripiri, kua riro mai ei pitiniti pirioni tara. I mua ake ka rave ei koe i te vairakau rapakauanga, e akamanako i te au uianga ka aru mai:

Eaa te au mea puapinga? E manganui te au vairakau rapakauanga tei karangaia e ka tauturu i te akaiti mai i te inangaro i te kai avaava. Inara, e au taumaro anga tetai no runga i te puapinga o te reira no tetai tuatau roa.

Eaa te au kino? Ka tupu mai tetai au mea kino no te au vairakau rapakauanga, mei te anininini, te taitaia, e te au manako tamate ia koe uaorai. E akamanako katoa ana e ko te au ravenga mono anga i te nikotini te riro katoa ra ei apinga akakona anga, kapiti mai te au kino te ka takino i te oraanga kopapa. No reira, ko te tangata te rave ra i te reira kare e rauka i te akamutu i te inangaro i te reira.

Eaa tetai atu au ravenga ke? I roto i tetai tareanga e 88 patene o te aronga tei akamutu tikai kua karanga e, kua akamutu takiri ratou i te kai avaava ma te kore i kai ana i te apinga akakona.