“Noo Vaitata ua Kia Iehova!”

Uruoaanga Tapere a te Au Kite o Iehova

● Tauatini ua atu o teia au uruoaanga e toru ra, tei akapapaia kia akamata i te openga epetoma o Tiurai 30 kia Aukute 29, te ka rave katoaia i te au marama e tu mai nei i te ao katoa. Ka akamata te au tuanga i te au ra tataki tai ma tetai porokaramu akatangianga imene i te ora 9:20 i te popongi. Te tumu tuatua maata a te Varaire, no runga ia Salamo 73:28, “E Mea Meitaki ra Iaku kia Akavaitata Atu ki te Atua.” I muri ake i ta te tiamana akakiteanga, ka aru mai te nga tuatua “Ka Tauturu te Au Uruoaanga ia Tatou kia Akapiri Vaitata kia Iehova” e “Ta te Tamaiti i Inangaro i te Akakite Atu.” E oti, ka uriuri manako te tuatua kapipiti “Aru i te Aronga Tei Akono Tamou i te Tuatua Muna a Iehova” e akapeea a Aberahama, Ruta, Hezekia, e Maria i te rave anga i te reira. Ka taopenga te porokaramu i te popongi ki te tuatua puapinga maata, “Akapeea a Iehova i te Akavaitata Mai Anga kia Tatou.”

Te tuanga mua o te avatea aiai Varaire ko te “Au Pauanga ki te Au Uianga no Runga ia Iehova,” aru mai ko te au tuatuaanga “Tuku i ta Iehova Akoanga kia Akakeu ia Tatou” e “Auraka Rava e ‘Riri ia Iehova.’” I muri ake ko te tuatua kapipiti e rima tuanga “Tauturu te Komunikeiti ki te Au Ngutuare kia Akapiri Vaitata kia Iehova.” Te tumu tuatua o teia au tuanga: “Ko Iehova, te Komunikeiti Meitaki Rava Atu,” “Te Au Tane, Komunikeiti ki ta Kotou Vaine!,” “Te Au Vaine, Komunikeiti ki ta Kotou Tane!,” “Te Au Metua, Komunikeiti ki ta Kotou Tamariki!,” e “Te Tamariki, Komunikeiti ki to Kotou Metua!” Ka taopenga te tuanga o te avatea aiai ki te tuatua “Te Akakite Maira te Au Mea Angaia i ‘te Atua Ora’!”

Te tumu tuatua maata no te Maanakai, “Tei te Aronga Tuatua-Tika ra Tana Muna,” akatumuia ki runga ia Maseli 3:32. Ka kapiti mai te tuatua kapipiti e rima tuanga,“Tauturu i te Au Tangata ‘E Akaongi Kotou i te Atua’” i te au tuanga “Akatakake e te Puapinga Kore,” “Kua Karanga Atura Aia kia Ratou,” “Akatupu i Taau Tuanga ei Tangata Tauturu Tutu Evangeria,” “Akaariu Mai ia Ratou na Roto i te Tu Memeitaki,” e e “Akakoromaki Pakari i Roto i Taau Tautaanga.” I muri ake i te nga tuatua “Ka Akaketaketa te Angaanga Orometua Tamou i Toou Pirianga kia Iehova” e “Te Aronga i Inangaro ia Iehova, Kare o Ratou Turorianga,” ka taopenga atu te tuanga ki tetai tuatua no runga i te papetito, e i muri ake ka orongaia te atianga kia papetitoia te aronga tei tau.

Te porokaramu a te avatea aiai Maanakai ka oronga mai i te tuatua kapipiti e varu tuanga, “Auraka e Akatika i Tetai Apinga kia Akamamao ia Koe mei ia Iehova”​—“Ta Satani Tautaanga Kikite,” “Parau,” “Moni,” “Oraanga Kopapa,” “Angaanga,” “Tamataora,” “Ngutuare Tangata,” e te “Tekinoroti.” Ka aru mai tetai nuku akatangianga puapinga, “Auraka e Akamutu me Akatikatikaia Mai e Iehova!” Ka taopenga te au tuanga o te ra ki te tuatua “Akapiri Vaitata kia Iehova, mei ia Ieremia Rai.”

Te tumu tuatua maata a te Tapati, no runga ia Iosua 23:8, “Kia Piri ra Kotou . . . kia Iehova.” I muri ake i te imene e te pure o te popongi, ko te tuatua kapipiti “Ariki Rekareka i to Iehova Au Tu Akaperepere” ka uriuri akaouia teia au tu e varu​—“Oaoa,” “Tangi Aroa,” “Ariki Rekareka,” “Takinga Meitaki,” “Papakitai Kore,” “Akakore i te Ara,” “Manako Tau,” e te “Tiratiratu.” Ka aru mai te akoanga ki te papuriki, “Akapeea Koe i te Akavaitata Anga ki te Atua?” Ka taopenga te tuanga o te popongi ki te tuatua poto no te Apii Punanga Tiaki o te epetoma.

Te akaariari anga puapinga no te avatea aiai a te Tapati, no runga i te aao anga i te kakau no te nuku tei akanooia i te anere mataiti mua. No runga te reira i te oro anga te au Kerititiano mei ia Ierusalema e ko te tumu tuatua “E Aerenga Akarongo e Kare i te Aerenga Kite Mata.” I muri ake i te nuku, ka taopenga te uruoaanga ma te tuatua “E Noo ua Rai ‘i Raro Ake i te Tapoki o Tei Teitei Ra.’”

Parani i teianei kia tae mai koe. Te kimianga i te ngai vaitata mai kia koe, atoroia atu te Are Patireia Uipaanga o te Au Kite o Iehova i toou ngai me kore tata mai ki te aronga nenei o teia makatini. Tei roto i te itiu o Te Punanga Tiaki o Tiurai-Tepetema 2010, te tokorua o ta tatou makatini, te papaanga o te au ngai uruoaanga katoatoa i roto i te au enua o te Patipika Tonga.