Oa Pikikaa

E “oa” toou kua aravei ana koe i toou mapuanga. Kua akariro aia ia koe kia manako tangata pakari, e i te akaraanga te tauturu maira te reira kia piri atu koe ki toou au oa. Me taitaia koe, e oki ua ana koe kiaia no tetai “akamaru anga.” E tika rai, e irinaki ua ana koe ki runga iaia i roto i te au turanga e manganui.

Kare i roa ana, kua kite mai koe i tona tu kino. Te inangaro maira aia ia koe i te au taime ravarai, noatu e kare koe e akatikaia ana i tetai au ngai. Noatu e kua akariro aia ia koe ei tangata pakari, kua rave aia i te reira na te akakino anga i toou oraanga. E tei runga atu, kua keia aia i tetai tuanga o taau moni.

I tetai nga taime ua akenei, kua tauta koe i te akaruke i to korua pirianga, inara kare aia e inangaro i te tuku ia koe. Tei tupu mai, kua riro mai aia ei pu noou. Kua tataraara koe i te aravei anga iaia.

KO TE pirianga ia o te aronga kai avaava e te avaava. I muri ake i te kai avaava anga e 50 mataiti, kua maara i tetai vaine ko Earline tona ingoa e: “Ka rauka i te avaava i te tauturu mai iaku i to te piri atu anga ki tetai atu tangata. Kare te reira i te oa taito ua​—koia anake ua toku oa i tetai au taime.” Inara, mei ta Earline i kite mai, e oa pikikaa e te kino tikai te avaava. E tika rai, penei kua tataia te au tuatua i runga akenei no runga iaia​—e tai ua rai tumu. Te kite anga aia e e mea kino te kai avaava i roto i nga mata o te Atua no te mea te akaviivii ra te reira i to tatou au kopapa ta te Atua i oronga mai, kua akamutu aia i tana peu.​—2 Korinetia 7:1.

Kua iki katoa tetai tangata ko Frank tona ingoa i te akamutu i te kai avaava no te akamareka anga i te Atua. E no tetai au ra i muri mai i te kai anga i tana avaava openga, kua kite aia iaia i te totoro aere anga na raro i tona are i te kimi i tetai au tumu avaava taito tei topa na rotopu i te va rakau o te taua. “Ko te reira te taime i rave ei au i te ikianga,” i karanga ai a Frank. “Te kite anga au iaku i runga i toku nga rima e te turi i te kerukeru aere anga na roto i te one i te kimi i te au tumu avaava taito kua vinivini tikai au. Kare rava au i kai avaava akaou ana.”

Eaa i ngata ei i te akamutu i te kai avaava? E maata te au tumu ta te aronga kimikimi i kite mai: (1) Ka riro te au apinga avaava ei apinga inangaro roa atu mei te au apinga akakona ra. (2) Ka taeria te roro me akaaeaia te nikotini i roto i te itu tekoni. (3) E mea puapinga te kai avaava i roto i te oraanga o tetai tangata me kapiti putuputuia atu ki te kaikai, te inuinu, te pukapuka, e te akamaru anga i te taitaia, e te vai atura.

Inara, mei ta Earline raua ko Frank i akaari mai, ka rauka i te akamutu i teia tu kino no te inangaro anga i te kai avaava. Me te kai avaava ra koe e te inangaro ra i te akamutu, ko te tatau anga i te au atikara e aru maira, ka riro te reira ei akamataanga i tetai oraanga ou noou.